Мк 3 - У Сугынь

3 ГЛАВА 1-6 Иисус кошкышо кидан еҥым паремда. 7-12 Галилей теҥыз воктене. 13-19 Иисус латкок Апостолжым ойырен налеш. 20-30 Ия тӧран вийжым кучылтеш манын, Иисусым титаклат. 31-35 Иисусын Аваже да изаж-влак.

¹ Иисус адак синагогыш миен. Тушто кошкышо кидан еҥ лийын.

² Шуматкечын Иисус тиде еҥым паремда мо манын, Тудым титаклаш амалым кычалше-влак эскереныт.

³ Иисус кошкышо кидан еҥлан ойлен: «Кынел да ончык лек».

⁴ Вара нунын деч йодын: «Шуматкечын мом ышташ лиеш, порым але осалым? Чоным утараш але пытараш?» Нуно нимом ойлен огытыл.

⁵ Шӱмышт тынар кӱэмалтмылан ойганен, Иисус ӱмбакышт шыдын ончалын да тиде еҥлан каласен: «Кидетым шуялте». Тудо шуялтен, да кидше весыж гаяк таза лийын.

⁶ Фарисей-влак лектыныт да Ирод велке шогышо-влак дене пырля тунамак Иисус ваштареш каҥашаш тӱҥалыныт. Нуно Тудым пытарынешт улмаш.

^7-8 Иисус тунемшыж-влак дене пырля теҥыз деке каен. Почешыже Галилей, Иудей, Иерусалим, Идумей гыч, Иордан эҥер вес могырым, Тир ден Сидон верла гычат моткоч шуко калык миен. Иисусын мом ыштымыжым чыла колын, нуно Тудын деке моткоч шукын толыныт.

⁹ Тудым кугу калык тӱшка ынже шыгыремде манын, тунемшыж-влаклан пушым ямдым кучаш кӱштен.

¹⁰ Вет Иисус ятыр еҥым паремден, сандене черан-влак, Тудын деке тӱкнаш манын, чылан ончыко шеҥын пуреныт.

¹¹ Осал шӱлыш-влак, Тудым ужын, ончыланже шуҥгалтыныт да кычкыреныт: «Тый Юмын Эрге улат!»

¹² Шкенжым палымым ышташ огыл манын, Иисус нуным пенгыдын шижтарен.

¹³ Иисус курык ӱмбаке кӱзен да, кӧм ойырен налын, Шкеж деке ӱжын. Нуно Тудын деке миеныт.

¹⁴ Латкокытшым пеленже лияш шогалтен. Тудо нуным увертарен каласкалаш колтынеже улмаш,

¹⁵ нунылан черлым паремдаш да иям поктен лукташ властьым пуэн.

¹⁶ Тиде Симон – Иисус тудым Петр манын лӱмден –,

¹⁷ Зеведейын Иаковшо ден Иаковын Иоанн шольыжо – Иисус нуным Воанергес манын лӱмден, тиде «кӱдырчын эргыж-влак» манмым ончыкта –,

¹⁸ Андрей, Филипп, Варфоломей, Матфей, Фома, Иаков – Алфейын эргыже –, Фаддей, Симон Кананит

¹⁹ да Искариот манме Иуда – тудо вараракше Иисусым ужален.

²⁰ Нуно пӧртышкӧ пуреныт, тушко адак шуко еҥ погынен. Тидлан кӧра Иисус да тунемшыж-влак киндым кочкашат ярсен огытыл.

²¹ Чыла тидын нерген колмеке, Иисусын лишылже-влак Тудым пеленышт налаш каеныт. Тудо ушым йомдарен манын, еҥ-влак ойленыт.

²² Иерусалим гыч толшо закон туныктышо-влак ойленыт: «Тудын кӧргыштыжӧ веельзевул уло. Ия-влакын тӧраштын вийже дене иям поктен луктеш».

²³ Тунам Иисус, нуным Шкеж деке ӱжын, нунылан туштен ойлен: «Кузе сатана шкенжым шке поктен луктын кертеш?

²⁴ Кугыжаныш шелалтеш да шкеж ваштареш шке кынелеш гын, тудо шоген ок сеҥе,

²⁵ да ешыште икте ваштареш весе кынелеш гын, тыгай ешат илен ок сеҥе.

²⁶ Сатана шкенжын ваштареш шке кынелеш да кокыте шелалтеш гын, тудо шоген ок сеҥе, тудлан мучаш толын.

²⁷ Виян озам ондак пидын пыштыде, тудын пӧртышкыжӧ пурен погыжым нигӧ аген ок керт. Пидме деч вара веле пӧртшым аген кертеш.

²⁸ Тыланда чынак ойлем: кеч-кунар мыскыла гынат, айдемын шочшыжын кеч-могай языкшат, мыскылымыжат касаралтеш,

²⁹ но кӧ Святой Шӱлышым мыскыла гын, тудын языкше нигунам ок касаралт. Тудо курымешлан титаканыш лукмо лиеш».

³⁰ Кӧргыштыжӧ осал шӱлыш уло манмылан Иисус тыге ойлен.

³¹ Иисусын Аваже да изаж-влак толыныт. Нуно тӱжвалне шогеныт, Иисусым ӱжаш колтеныт.

³² Тудын йырже еҥ-влак шинченыт. Иисуслан каласеныт: «Уремыште Ават, изат да акат-влак Тыйым йодыт».

³³ А Иисус нунылан вашештен: «Кӧ Мыйын авам да кӧ Мыйын иза-шольым-влак улыт?»

³⁴ Тудо йырже шинчыше-влакым ончалын да каласен: «Теве Мыйын авам да иза-шольым-влак.

³⁵ Кӧ Юмын эрыкшым шукта, тудо Мыйын иза-шольым, ака-шӱжарем да авам».