Мк 14 - У Сугынь

14 ГЛАВА 1-2 Иерей-влак Иисусым пушташ шонат. 3-9 Вифанийыште Иисусым миро дене шӱрымаш. 10-11 Иисусым Иуда ужала. 12-21 Кугече кас кочкыш. 22-26 Святой кас кочкыш. 27-31 Тунемшыж-влакын кораҥмышт нерген Иисус ончылгоч каласа. 32-42 Гефсиманийыште Иисусын кумалмыже. 43-52 Иисусым кучен наҥгайымаш. 53-65 Синедрион ончылно. 66-72 Петрын кораҥмыже.

¹ Кок кече гыч Кугече да Шергинде пайрем тӱҥалшаш улмаш. Архиерей ден закон туныктышо-влак, Иисусым чояланен кучаш да пушташ манын, йӧным кычалыныт.

² Нуно ойленыт: «Пайрем годым тидым ышташ ок лий. Калык пудыранен кертеш».

³ Кунам Иисус Вифанийыште проказе черан Симонын пӧртыштыжӧ лийын да кочкын, тушко ик ӱдырамаш пурен, нард гыч лукмо пеш шергакан яндар миром алебастр кӱ атеш конден. Тудо ате шӱйым пудыртен, а ӱйжым Иисусын вуйышкыжо опталын.

⁴ Южышт, вуеш налын, икте-весыштлан ойленыт: «Молан миром арам кучылтмаш?

⁵ Тиде миром кум шӱдӧ утла динарийлан ужален, оксажым йорло-влаклан пуэдаш лиеш ыле». Нуно ӱдырамашым шылталеныт.

⁶ Но Иисус каласен: «Тудын деч кораҥза, мом тудым тургыжландареда? Тудо Мылам поро пашам ыштен.

⁷ Йорло-влак тендан дене эре лийыт, те кунам шонеда, нунылан порым ыштен кертыда. А Мый тендан дене эре ом лий.

⁸ Тудо мо кертмыжым ыштен: ончылгочак Мыйын капем тояш шӱрен ямдылен.

⁹ Тыланда чынак ойлем: уло тӱня мучко, кушто гына Поро Уверым каласкалаш тӱҥалыт, тыгак тиде ӱдырамашын мом ыштымыж нерген ойлаш да шкенжым шарнаш тӱҥалыт».

¹⁰ Латкок тунемшыж кокла гыч иктыже, Искариот манме Иуда, Иисусым ужалаш манын, архиерей-влак деке каен.

¹¹ Иудам колыштмеке, нуно куаненыт да тудлан ший оксам пуаш сӧреныт. Иисусым ужалаш манын, Иуда йӧнан жапым вучаш тӱҥалын.

¹² Шергинде пайремын икымше кечынже, кунам йӱла почеш кугече пачам шӱшкылаш кӱлеш улмаш, тунемше-влак Иисус деч йодыныт: «Тый кугече кочкышым кушто кочкаш шонет? Ме тудым ямдылаш кушко каена?»

¹³ Тунам Иисус нунын кокла гыч кокытшылан каласен колтен: «Олаш кайыза. Тушто те кувшин дене вӱдым нумал ошкылшо еҥым вашлийыда. Тудын почешыже кайыза.

¹⁴ Кудо пӧртыш пура, тудо сурт озалан каласыза: ”Туныктышо пӧлем нерген йодеш: тунемшыж-влак дене пырля кугече пачам кушто кочкын кертеш?”

¹⁵ Тиде еҥ тыланда йоҥгыдо да тидлан ямдылыме, ӱштын шындыме кӱшыл пӧлемым ончыкта. Тушан мыланна чыла ямдылыза».

¹⁶ Тунемшыж-влак каеныт, олашке пуреныт. Чылажат Иисус ойлымо семынак лийын. Нуно кугече кочкышым ямдыленыт.

¹⁷ А кастене тушко латкок тунемшыж дене пырля Иисус толын.

¹⁸ Кунам нуно ӱстелтӧрыштӧ лийыныт да кочкыныт, Тудо каласен: «Тыланда чынак ойлем: тендан кокла гыч иктыже, кӧ кызыт Мый денем пырля кочкеш, Мыйым ужала».

¹⁹ Тунемшыж-влак ойгаҥыныт, икте почеш весе Тудын деч йодышташ тӱҥалыныт: «Мыяк огыл дыр? Мыяк огыл дыр?»

²⁰ Иисус каласен: «Тиде – латкокыт гыч иктыже, кӧ кӱмыжыш Мый денем пырля киндым тушкалта.

²¹ Айдеме Эрге нерген кузе возымо, тиде илыш гыч Тудо туге кая, но Айдеме Эргым ужалышылан ойго лиеш! Ок шоч гын, тиде еҥлан сайрак ыле».

²² Кочмышт годым Иисус киндым налын, благословитлен, тодылын, тунемшыж-влаклан пуэн да каласен: «Налза, кочса. Тиде – Мыйын Капем».

²³ Вара чашым налын, тауштен пелештен да нунылан пуэн. Чыланат тушеч йӱыныт.

²⁴ Иисус ойлен: «Тиде – Мыйын шуко еҥ верч йоктарыме у сугынь Вӱрем.

²⁵ Тыланда чынак ойлем: Юмын Кугыжаныште у йошкар аракам йӱмӧ кече шумешке, Мый виноград саска гыч ыштымым ом йӱ».

²⁶ Нуно Юмылан таум ыштен муреныт, вара Елеон курыкыш каеныт.

²⁷ Иисус нунылан ойлен: «Чылан те Мый дечем тиде йӱдым кораҥыда. Возымо: ”Кӱтӱчыжым перен шуэм, да шорык кӱтӱ шалана”.

²⁸ Но, ылыж кынелмекем, Мый тендам Галилейыште вашлиям».

²⁹ Петр Тудлан каласен: «Чылан Тый дечет кораҥыт гынат, мый тидым ом ыште!»

³⁰ Иисус вашештен: «Тыланет чынак ойлем: таче, тиде йӱдымак, агытан кок гана муралтымешке, тый кум гана Мыйын нерген ”Тудым ом пале” манат».

³¹ Но Петр чотрак ӱшандарен ойлен: «Тый денет пырля мылам колаш логалеш гынат, мый Тыйын нерген ”ом пале” манын ом ойло!» Моло тунемшыжат тидымак ойленыт.

³² Нуно Гефсиманий манме верыш толыныт, да Иисус тунемшыж-влаклан каласен: «Мыйын кумалмем годым тыште шинчыза».

³³ Тудо Шкеж дене пырля Петрым, Иаковым да Иоанным налын. Иисусым шучкылык да неле йӧсланымаш авалташ тӱҥалын.

³⁴ Тудо манын: «Мыйын чонем колышаш гай ойганен. Тыште лийза да ида мале».

³⁵ Изиш ӧрдыжкырак кораҥмеке, Иисус мланде ӱмбаке кумык возын. Лиеш гын, тиде шагат Мый дечем эртен кайыже ыле манын кумалын.

³⁶ Тудо ойлен: «Авва! Ачай! Тый чыла кертат. Тиде чашым Мый дечем кораҥден наҥгае, но тек Мыйын шонымо семын огыл, а Тыйын шонымет семын лиеш».

³⁷ Вара Тудо тунемшыж-влак деке пӧртылын, нуным малышым ужын да Петрлан ойлен: «Симон, тый малет? Ик шагатымат малыде эртарен кертын отыл?

³⁸ Алгаштаралташ огыл манын шекланыза, кумалза. Чон чулым, но кап вийдыме».

³⁹ Иисус уэш каен да тудо мут денак кумалын.

⁴⁰ Пӧртылмекыже, тунемшыж-влакым адакат малышым ужын. Нунын шинчагомдышышт нелемын, да Иисуслан мом вашешташат пален огытыл.

⁴¹ Кумшо гана толмеке, Иисус каласен: «Те алят маледа да канеда! Сита! Жап шуын. Айдеме Эрге языкан-влак кидыш пуалтеш.

⁴² Кынелза, каена: теве Мыйым ужалыше лишемеш».

⁴³ Иисус але ойленат пытарен огыл, латкокыт гыч иктыже, Иуда, да тудын дене пырля шуко калык керде да шугыньо дене толын. Нуным архиерей, закон туныктышо ден калык кугурак-влак колтеныт.

⁴⁴ Ужалыше нунылан Иисусым тыге палдараш сӧрен улмаш: «Кӧм мый шупшалам, тиде Иисус. Тудым кучыза да шекланен наҥгайыза».

⁴⁵ Толмеке, Иуда вик Иисус деке миен да манын: «Равви! Равви!» Вара Иисусым шупшалын.

⁴⁶ Иисус ӱмбаке кидыштым нӧлталыныт да Тудым руалтен кученыт.

⁴⁷ Тушто шогышо кокла гыч иктыже кердыжым луктын да архиерейын тарзыжым руалын, тудын пылышыжым ойырен шуэн.

⁴⁸ Иисус нунылан каласен: «Аген коштшо ӱмбаке лекмыла, кердым, шугыньым налын, те Мыйым кучаш толында.

⁴⁹ Кече еда храмыште тендан дене лийынам да калыкым туныктенам, а те Мыйым руалтен кучен огыдал. Но Возымаште каласыме шукталтшаш».

⁵⁰ Иисусым коден, чыла тунемшыже куржын пытен.

⁵¹ Но ик самырык пӧръеҥ Иисус почеш каен. Тудын чара могырыштыжо вынер леведыш веле лийын. Тудым руалтен кученыт,

⁵² а тудо, леведышыжым коден, нунын деч чараматын куржын.

⁵³ Иисусым архиерей деке наҥгаеныт, да тушко чыла архиерей, калык кугурак да закон туныктышо-влак погыненыт.

⁵⁴ Петр ӧрдыжтырак лийын, Тудын почеш архиерейын кудывечышкыже пурен да тарзе-влак дене пырля тул воктене ырыктен шинчен.

⁵⁵ Архиерей-влак да уло Синедрион, Иисусым пуштыкташ амалым муаш манын, Тудын ваштареш таныклымашым кычалыныт, но муын кертын огытыл.

⁵⁶ Тудын ваштареш шояклен таныклыше шукын лийыныт, но нунын таныклымышт ваш-ваш келшен толын огытыл.

⁵⁷ Южышт шогалыныт да Иисус ваштареш шояклен тыге ойленыт:

⁵⁸ «Ме Тудын тыгай ойлымыжым колынна: ”Мый еҥ-влакын кид дене ыштыме тиде храмым шалатем да, айдеме кид тӱкныде, кум кечыште весым чоҥен шогалтем”».

⁵⁹ Но нунын тыгай таныклымыштат икте-весе дене келшен толын огытыл.

⁶⁰ Тунам архиерей кынел шогалын, ончык лектын да Иисус деч йодын: «Ваштарешет титаклен ойлымыштлан Тый нимом от вашеште?»

⁶¹ Но Иисус шып шоген, нимом вашештен огыл. Архиерей Тудын деч адак йодын: «Тый Христос, моктымо Юмын Эргыже, улат мо?»

⁶² «Мый, – вашештен Иисус, – те Айдеме Эргын Куатан Юмын пурла могырыштыжо шинчымыжым да кавасе пыл ӱмбалне толмыжым ужыда.»

⁶³ Тунам архиерей вургемжым кушкедын да каласен: «Адак могай таныклыше-влак мыланна кӱлыт!

⁶⁴ Те Юмым мыскылымыжым колда. Тидлан мом каласеда?» Иисус титакан да колышаш манын чылан келшеныт.

⁶⁵ Тунам южышт Тудын ӱмбаке шӱведаш тӱҥалыныт. Иисусын шӱргыжым петыреныт, Тудым переныт да ойленыт: «Ынде пророкла каласе!» Тарзе-влакат Иисусым кыреныт.

⁶⁶ Кунам Петр ӱлнӧ, кудывечыште, лийын, тушко архиерейын тарзе ӱдыржӧ-влак кокла гыч иктыже толын.

⁶⁷ Тул воктене ырыктыше Петрым ужын, тӱсленрак ончалын да ойлен: «Тыят Назарет гыч толшо тиде Иисус дене пырля лийынат».

⁶⁸ Но Петр тореш ойлен. «Мом тый ойлет – мый ом пале да ом умыло», – манын да ончыл кудывечыш лектын. Тунам агытан муралтен.

⁶⁹ Ӱдыр тудым адак ужын да тушто шогышо-влаклан ойлен: «Тиде еҥат нунын кокла гыч».

⁷⁰ Петр адакат тореш каласен. Изиш лиймеке, воктен шогышо-влак тудлан ойленыт: «Чынак тый нунын кокла гыч улат. Тыят Галилей гыч улат, тыйын ойлыметат нунын гай».

⁷¹ Петр Юмо ончылно товатлен ойлаш тӱҥалын: «Кӧн нерген ойледа, мый Тудым ом пале».

⁷² Тунам агытан кокымшо гана муралтен, да Петр Иисусын ойлымыжым шарналтен: «Агытан кок гана муралтымешке тый кум гана Мыйын нерген ”Тудым ом пале” манат». Вара тудо шорташ тӱҥалын.