Мк 13 - У Сугынь

13 ГЛАВА 1-2 Храмым шалатыме нерген ончылгоч каласымаш. 3-13 Эҥгекын тӱҥалмыже. 14-23 Кугу йӧсланымаш. 24-31 Айдеме Эргын толмыжо. 32-37 Кече ден шагатше пале огыл.

¹ Храм гыч Иисус лекме годым тунемшыж-влак кокла гыч иктыже Тудлан ойлен: «Туныктышо! Ончал, могай кӱ-влак! Могай оралте-влак!»

² Иисус тудлан вашештен: «Тый нине кугу оралтым ужат. Но тыште кӱ ӱмбалан кӱ ок код, чыла шалатыме лиеш».

³ Елеон курыкышто храм ваштареш шинчымыж годым Иисус деке Петр, Иаков, Иоанн да Андрей йодыш дене посна миеныт.

⁴ «Мыланна каласе, кунам чыла тиде лиеш? Тидлан жап шумым могай палдарыше пале ончыкта?»

⁵ Иисус нунылан ойлаш тӱҥалын: «Шекланыза, нигӧат тендам ынже ондале.

⁶ Мыйын лӱмем дене шукын толыт да ойлат: ”Тиде Мый улам”, да ятырыштым ондалат.

⁷ Кунам те сар йӱкым да сар нерген увер-влакым колыда, ида лӱд. Чыла тиде лийшаш, но тиде але мучаш огыл.

⁸ Калык ӱмбаке калык кынелеш, кугыжаныш ӱмбаке – кугыжаныш. Верын-верын мланде чытырналтеш, шужымаш да калык пудыранымаш толыт, но тиде – орлыкын тӱҥалтышыже веле.

⁹ Шекланен шогыза! Тендам судитлаш пуат, синагоглаште кыраш тӱҥалыт. Мыланем верч тендам вуйлатыше да кугыжа-влак ончыко шогалтат. Тиде нунылан таныклымаш лиеш.

¹⁰ Но тылеч ондак чыла калык коклаште Поро Уверым каласкалыман.

¹¹ Кунам тендам судыш кучен наҥгаят, мом ойлышаш нерген ончылгоч ида азаплане. Мо тыланда тудо шагатыште пуалтеш, тудымак ойлыза, вет те огыл ойлаш тӱҥалыда, а Святой Шӱлыш.

¹² Изаже шольыжым, ачаже шочшыжым пушташ пуат, а йоча-влак ача-авашт ваштареш кынелыт да нуным пуштыт.

¹³ Мыйын лӱмем верчын тендам чыланат ужмышудымо лийыт, но кӧ мучаш марте чытен лектеш, утаралтеш.

¹⁴ Кушто лийшаш огыл, тушто Даниил пророкын ойлымо йырнык пустаҥмашым ужмекыда – лудшо тек умыла –, Иудейыште улшо-влак тек курыкышко куржыт.

¹⁵ Кӧ пӧрт леведыш ӱмбалне гын, тек ок воло да пӧртшӧ гыч иктаж-мом налаш ок пуро.

¹⁶ Кӧ пасушто, тек вургемжым налаш ок пӧртыл.

¹⁷ Ойго лиеш тудо кечылаште мӱшкыран ӱдырамаш ден чызым пукшышо ава-влаклан!

¹⁸ Тендан куржмыда телым ынже лий манын, Юмым сӧрвалыза.

¹⁹ Тудо кечылаште тугай кугу орлык лиеш, могайже тӱня тӱҥалтыш гыч, Юмо тудым пӱрымӧ деч вара, але лийынжат огыл да нигунам огеш лий.

²⁰ Тиде кече-влакым Господь огеш кӱчыкемде ыле гын, иктат утлен ок код ыле. Но ойырен налме еҥже-влаклан кӧра тиде кече-влакым кӱчыкемден.

²¹ Тунам тыланда ”Теве тыште Христос!” але ”Тушто Христос!” манын иктаж-кӧ каласа гын, ида ӱшане.

²² Вет шояк христос ден шояк пророк-влак лектыт да ойырен налме-влакымат лийме семын ондалаш тӱрлӧ палдарыше пале ден чудым ыштат.

²³ Теже шекланыза! Тыланда Мый чылажымат ончылгочак каласенам.

²⁴ Но тунам, тиде азап деч вара, кече пычкемышалтеш, тылзе волгалтарымыжым чарна,

²⁵ шӱдыр-влак кава гыч камвозыт да пылпомыш вий-влак вер гыч тарванат.

²⁶ Тунам еҥ-влак Айдеме Эргын кугу куат да чап дене пыл ӱмбалне толмыжым ужыт.

²⁷ Тудо Суксыж-влакым колта да тӱнян ныл могыржо гыч, пылпомышын ик тӱржӧ гыч тӱҥалын, вес тӱрышкыжӧ шумеш шке ойырен налме еҥже-влакым пога.

²⁸ Смоква пушеҥге нерген туштен ойлымо деч тунемза. Кунам тудын укшлаже ылыжыт да лышташым колтат, те паледа: вашке кеҥеж толеш.

²⁹ Тыштат тыгак. Кунам ойлымемын шукталтмыжым ужыда, палыза: тудо лишнак, омса воктенак.

³⁰ Тыланда чынак ойлем: чыла тиде шукталтмеш, тиде тукым пытен ок шу.

³¹ Кава ден мланде пытат, но Мыйын шомакем огеш пыте.

³² Тиде кече да шагат кунам толын шуэш, нигӧ ок пале: пылпомышсо Суксо-влакат, Эргат огыт пале, Ача веле пала.

³³ Сандене шекланыза, кумалза, ида мале. Тиде жап кунам толмым те огыда пале.

³⁴ Тидым кужу корныш кайыше еҥ дене таҥастараш лиеш. Тудо пӧртшым тарзыж-влаклан ончаш кода, кажне тарзылан посна пашам пуа, а капка ороллан шекланаш кӱшта.

³⁵ Теат шекланен шогыза! Вет сурт оза кунам пӧртылшашым огыда пале: ала кастене, ала пелйӱдлан, ала агытан мурымо дене пырля, ала эрдене эрак.

³⁶ Тудо вучыдымын толеш, сандене шекланыза, тендам мален кийышым ынже уж.

³⁷ Мом тыланда ойлем, чылалан ойлем: шекланен шогыза!»