Мк 12 - У Сугынь

12 ГЛАВА 1-12 Виноград аҥам кучышо-влак нерген туштен каласымаш. 13-17 Кесарьлан йозак. 18-27 Ылыжме нерген йодыш. 28-34 Эн тӱҥ кӱштымаш. 35-37 Христос – Тудо кӧн Эргыже? 38-40 Иисус закон туныктышо-влак деч шекланаш кӱшта. 41-44 Тулык ӱдырамашын надырже.

¹ Иисус нунылан туштен ойлаш тӱҥалын. «Ик еҥ пасуэшыже виноградым шынден. Тудын йырже печым печен, саска вӱдым темден лукмо верым кӱнчен да башньым чоҥен. Вара аҥам виноград куштышо-влаклан кучаш пуэн да шкеже каен.

² Жап шумеке, виноград ончышо-влак деч саскам налаш манын, оза нунын деке тарзыжым колтен.

³ Нунышт тарзым кученыт, тудым кыреныт да нимо деч посна колтеныт.

⁴ Тунам оза нунын деке вес тарзым колтен, но тудын ӱмбаке кӱм кышкеныт, вуйжым сусыртеныт да, мыскылен, мӧҥгеш колтеныт.

⁵ Оза эше вес тарзым колтен. Тудыжым пуштыныт. Оза шуко молымат колтен, но нуно чыланыштымат але кыреныт, але пуштыныт.

⁶ Озан эше икте кодын: йӧратыме эргыже. Пытартышлан нунын деке тудым колтен. ”Эргым ончылно нуно вожылыт”, – ойлен тудо.

⁷ Но виноградым ончышо-влак икте-весыштлан ойленыт: ”Тиде наследник. Айста тудым пуштына, наследствыже мемнан лиеш”.

⁸ Нуно тудым руалтен кученыт, пуштыныт да виноград аҥа гыч луктын кудалтеныт.

⁹ Виноград аҥан озаже ынде мом ышта? Тудо мия, виноград ончышо-влакым пытара, а виноград аҥам весылан пуа.

¹⁰ Але Возымаште тидым те лудын огыдал: ”Чоҥышо-влакын йӧрдымыш лукмо кӱышт негыз пусак кӱ лийын:

¹¹ тидыже Господь деч, мемнан шинча ончылнына моткоч ӧрыктарыше”.»

¹² Иудей-влакын вуйлатышышт Иисусын туштен ойлымыжо нунын нерген улмым умыленыт, сандене Иисусым тунамак руалтен кучынешт улмаш. Но нуно калык деч лӱдыныт да Иисусым коден каеныт.

¹³ Иисусым мутешыже кучаш манын, Тудын деке икмыняр фарисей ден Ирод велке шогышо-влакым колтеныт.

¹⁴ Нунышт миеныт да Тудлан ойленыт: «Туныктышо! Тыйын чын улметым ме палена. Тый еҥлан йӧраш тӧчымӧ нерген от шоно, Тыланет чыла еҥ иктӧр, Юмын корныжлан чын туныктет. Кесарьлан йозакым тӱлаш лиеш але уке? Тудым ме тӱлышаш улына але уке?»

¹⁵ Иисус нунын сайла кояш тӧчымыштым пален да каласен: «Молан Мыйым тергеда? Мылам ончалаш динарийым кондыза».

¹⁶ Тудлан оксам конденыт. Иисус йодын: «Кӧм тышан сӱретлыме? Кӧн лӱмжӧ сералтын?» Нуно вашештеныт: «Кесарьын».

¹⁷ Тунам Иисус нунылан каласен: «Тыгеже кесарьлан кесарьыным, Юмылан Юмыным пуыза». Нуно Тудлан чот ӧрыныт.

¹⁸ Вара Иисус деке саддукей-влак толыныт. Нуно колышо огеш ылыж манын шотленыт. Нуно йодыныт:

¹⁹ «Туныктышо! Моисей мыланна тыге возен: иктаж-кӧн ватан, но йочадыме изаже але шольыжо кола гын, тудын ватыжым изаже але шольыжо марлан налшаш. Тидыжым колышын тукымжым шуяш ыштыман.

²⁰ Шым изак-шоляк лийын. Кугуракше ӱдырым налын, йочан лийдеак колен.

²¹ Сандене тулыкеш кодшо ватыжым шольыжо марлан налын. Но шольыжат колен, тудынат йочаже лийын огыл. Тыгак лийын кумшо денат.

²² Чыла шымыт тудым марлан налын, иктыштынат йочашт кодын огыл. Чылашт деч вара ӱдырамашат колен.

²³ Ылыжмекышт, кузе лиеш? Тудо шымытыштынат ватыже лийын гын, колымаш гыч ылыж кынелмеке, кӧн ватыже лиеш?»

²⁴ Иисус каласен: «Те Возымашым да Юмын куатшым огыда пале, сандене йоҥылыш лийыда.

²⁵ Колымаш гыч ылыж кынелмеке, еҥ-влак ӱдырымат огыт нал, марланат огыт лек. Нуно пылпомышто Суксо гай лийыт.

²⁶ Колышо-влакын ылыжмышт нерген Моисейын книгаштыже те лудын огыдал мо? Йӱлышӧ вондер гыч Юмо Моисейлан ойлен: ”Мый Авраамын Юмыжо, Исаакын Юмыжо, Иаковын Юмыжо улам”.

²⁷ Юмо колышо-влакын Юмышт огыл, Тудо илыше-влакын Юмышт! Те моткочак йоҥылыш лийыда».

²⁸ Закон туныктышо кокла гыч иктыже, нунын ӱчашымыштым да Иисусын сайын вашештымыжым колмеке, Тудын деке миен йодын: «Кӱштымаш кокла гыч эн тӱҥжӧ кудо?»

²⁹ Иисус вашештен: «Эн тӱҥ кӱштымаш тиде: ”Израиль, колышт! Мемнан Господь Юмына – ик Господь веле.

³⁰ Господь Юметым уло шӱмет, уло чонет, уло умылымашет, уло виет дене йӧрате”. Тиде эн тӱҥ кӱштымаш.

³¹ Кокымшо кӱштымаш тыгаяк кугу: ”Лишылетым шкендым йӧратыме семынак йӧрате”. Нине кок кӱштымаш деч кугужо уке».

³² Закон туныктышо Тудлан каласен: «Моткоч сай, Туныктышо! Тый чыным каласышыч: Юмо икте веле, Тудын деч моло вес Юмо уке.

³³ Юмым уло шӱм, уло уш-акыл, уло чон, уло вий дене йӧратыме, лишылымат шкендым йӧратыме семын йӧратыме – йӱлалтен пуымо да моло надыр дечат кӱлешанрак».

³⁴ Закон туныктышын шот дене вашештымыжым ужын, Иисус тудлан каласен: «Тый Юмын Кугыжаныш деч тораште отыл». Тылеч вара Иисуслан нигӧат йодышым пуэдаш тоштын огыл.

³⁵ Храмыште туныктен ойлымыж годым Иисус йодын: «Закон туныктышо-влак кузе Христосым Давидын Эргыже манын кертыт?

³⁶ Святой Шӱлыш кумылаҥдыме дене Давид шкеже ойлен: ”Господь мыйын Господемлан каласен: Тыйын тушманет-влакым йол йымакет пыштымешкем, пурла велыштем шинче”.

³⁷ Давид шкеже Тудым Господь манеш гын, кузе Тудо Давидын эргыже лийын кертеш?» Шуко калык Иисусым кумылын колыштын.

³⁸ Иисус туныктымаштыже ойлен: «Закон туныктышо-влак деч шекланыза. Нуно чапле вургемым чийымым, калык погынымо верлаште лиймышт годым шкаланышт вуй савымым йӧратат,

³⁹ синагоглаште эн ончылно шинчынешт, пайремыште эн пагалыме верым налнешт.

⁴⁰ Нуно тулык ӱдырамаш-влакын суртыштым йорлештарат да лӱмжылан гына кужу жап кумалыт. Тыгай-влакым поснак пеҥгыде суд вуча».

⁴¹ Иисус надыр оксам пыштыме вер ваштареш шинчын да калык тушко надырым кузе пыштымым ончен. Шуко поянже оксам ятыр пыштен.

⁴² Вара ик йорло тулык ӱдырамаш толын да кок лептам, вес семынже кодрантым пыштен.

⁴³ Иисус тунемшыж-влакым Шкеж деке ӱжын да каласен: «Тыланда чынак ойлем: тиде йорло тулык ӱдырамаш надырым чыла моло еҥ деч шукырак пыштен.

⁴⁴ Нуно утышт деч пыштеныт, а тудо шкенжын йорлылыкшо деч мо улыжым, илышыжлан мо кӱлмым чыла пуэн».