Мк 10 - У Сугынь

10 ГЛАВА 1-12 Мужыраҥме да ойырлымо нерген. 13-16 Иисус ден йоча-влак. 17-31 Поян. 32-34 Иисус шке колымыж да ылыжмыж нерген кумшо гана ойла. 35-45 Иаков ден Иоаннын йодмышт. 46-52 Иисус Вартимей лӱман сокырым паремда.

¹ Иисус, тушечын кайымеке, Иордан вес могырысо Иудей кундемыш толын. Тудын деке адакат калык погынен, Иисус нуным ончычсо семынак туныктен.

² Тудын деке фарисей-влакат толыныт. Нуно Тудым тергаш шонен йодыныт: «Марийлан ватыжым ойырен колташ лиеш мо?»

³ Иисус вашештен йодын: «А мом тыланда Моисей шӱден?»

⁴ Нуно ойленыт: «Моисей ойырлымо нерген кагазым возаш да ойырлаш лиеш манын».

⁵ Иисус вашештен: «Пешкыде шӱман улмыланда кӧра Моисей тыгай законым тыланда возен.

⁶ Тӱҥалтыштак, кунам Юмо тӱням да еҥ-влакым ыштен, нунылан пӧръеҥ ден ӱдырамаш лияш пӱрен.

⁷ Сандене пӧръеҥ ачаж ден аважым кода, шке ватыж дене ушна,

⁸ да нуно коктын ик кап да чон лийыт. Тыгеракын, нуно ынде кокыт огыл, а икте улыт.

⁹ Мом Юмо ушен, айдеме ынже ойыро».

¹⁰ Пӧртыштӧ тунемшыж-влак Иисус деч тидын нергенак угыч йодыныт.

¹¹ Иисус нунылан тыге вашештен: «Кӧ шке ватыжым ойырен колта да весым марлан налеш, ватыж ваштареш яжарланыме языкым ышта.

¹² А вате, марийже деч ойырлен, весылан марлан лектеш гын, тудат яжарлана».

¹³ Нунын деке тӱкныжӧ манын, Иисус деке йочаштым конденыт. Но тунемшыж-влак кондышо-влакым чареныт.

¹⁴ Кунам Иисус тидым ужын, шыдешкен да каласен: «Йоча-влакым Мый декем пуртыза, нуным ида чаре, вет Юмын Кугыжаныш – нунын гай еҥ-влакын.

¹⁵ Тыланда чынак ойлем: кӧ Юмын Кугыжанышым йоча семын порын ок вашлий, тудо тушко пурен ок керт».

¹⁶ Иисус йоча-влакым ӧндалын, нунын ӱмбаке кидшым пыштен да нуным благословитлен.

¹⁷ Иисусын корныш лекмыж годым Тудын дек ик еҥ куржын миен, ончыланже сукен шинчын да йодын: «Поро Туныктышо! Курымашлык илышым налаш манын, мыланем мом ыштыман?»

¹⁸ Иисус тудлан каласен: «Молан тый Мыйым поро манат? Юмо деч моло нигӧ поро огыл.

¹⁹ Тудын кӱштымыжым тый палет: ”Ит яжарлане”, ”Ит пушт”, ”Ит шолышт”, ”Шойыштын, еҥ ӱмбаке таныклен ит ойло”, ”Еҥыным ондален ит нал”, ”Ача-аватым пагале”»...

²⁰ «Туныктышо, – вашештен еҥ, – чыла тидым самырык годсек мый шуктен шогем.»

²¹ Иисус тудын ӱмбаке йӧратен ончалын да каласен: «Икте гына тыланет ок сите: кае да уло погетым ужале, оксажым йорло-влаклан пу. Тунам пылпомышто тыйын поянлыкет лиеш. Вара тол, ыресетым нал да почешем кай».

²² Но тыгай ойлан пӧръеҥ шӱлыкаҥын да ойганен кораҥын. Тудо моткоч поян улмаш.

²³ Иисус йырваш ончалын да тунемшыж-влаклан каласен: «Поян еҥлан Юмын Кугыжанышыш пураш моткоч йӧсӧ!»

²⁴ Нине мутшо тунемшыж-влакым чот лӱдыктен, но Иисус уэш каласен: «Икшывем-влак, поянлыклан ӱшаныше-влаклан Юмын Кугыжанышыш пураш моткоч йӧсӧ!

²⁵ Верблюдлан имышу вошт лекташ куштылго огыл, а поянлан Юмын Кугыжанышыш пураш эшеат нелырак».

²⁶ Тунемшыж-влак эшеат чот ӧрыныт да икте-весышт деч йодыштыныт: «Тыгеже кӧ утаралт кертеш?»

²⁷ Иисус нунын ӱмбак ончалын да каласен: «Еҥ-влаклан тиде ышташ лийдыме, но Юмылан огыл. Юмо чыла ыштен кертеш».

²⁸ Тунам Петр ойлаш тӱҥалын: «Теве ме чыла коденна да Тыйын почешет каенна».

²⁹ Иисус каласен: «Тыланда чынак ойлем: кӧ гына Мыйын верч да Поро Увер верч пӧртым, иза-шольым, ака-шӱжарым, ача-авам, ватым, йочам але пасум коден,

³⁰ тудо ынде кызытсе саманыште, шыгыремдылме жапыште, шӱдӧ пачаш шукырак пӧртым, иза-шольым, ака-шӱжарым, авам, йочам, пасум налде ок код. А шушаш саманыште тудо курымаш илышым налде ок код.

³¹ Туге гынат ончылсо-влак шукышт шеҥгелне да шеҥгелсе-влак шукышт ончылно лийыт».

³² Нуно корно дене Иерусалим велкыла тайыл ваштареш кӱзеныт. Иисус ончылно ошкылын, а тунемшыж-влак ӧрыныт, почешыже лӱдын каеныт. Тудо латкок тунемшыжым адак Шкеж деке ӱжын да Шкеж дене мо лийшаш нерген каласкалаш тӱҥалын:

³³ «Теве ме Иерусалимыш миен шуына. Айдеме Эрге архиерей ден закон туныктышо-влаклан кучен пуалтеш. Нуно Тудым пушташ пунчалыт да чын Юмым палыдыме-влакын кидыш пуат.

³⁴ Тудым игылтыт, ӱмбакыже шӱведат, сола дене кырат, а вара пуштыт. Но кумшо кечын Тудо ылыж кынелеш».

³⁵ Иисус деке Зеведейын Иаков ден Иоанн эргышт лишемыныт. «Туныктышо, – каласеныт нуно, – мом Тый дечет йодына, мыланна ыште.»

³⁶ Тудо йодын: «Те Мый дечем мом ыштымым вучеда?»

³⁷ Нуно маныныт: «Кунам чапыштет лият, мыланна иктыжлан пурла могырыштет, весыжлан шола могырыштет шинчаш пу».

³⁸ Иисус нунылан каласен: «Те мом йодмыдам огыда пале. Мыйын йӱшаш чаше гыч йӱын кертыда мо? Мыйын тынеш пурымем семын тынеш пурен кертыда мо?»

³⁹ «Кертына», – вашештеныт нуно. Иисус нунылан ойлен: «Мыйын йӱшаш чаше гыч теат йӱаш тӱҥалыда. Тынешат Мыйын семынак пуреда.

⁴⁰ Но воктекем пурла да шола велыш шындаш Мый дечем огыл, а нине верым кӧлан ямдылыме, нунын лийыт».

⁴¹ Тиде мутланыме нерген моло лу тунемшыже колмеке, Иаков ден Иоаннлан сыреныт.

⁴² Иисус нуным Шкеж деке ӱжын да каласен: «Те паледа: калык-влакын вуйлатышыштлан шотлалтше-шамыч нунын дене озаланат, да виянышт калык-влакым кид йымалнышт кучат.

⁴³ Но тендан коклаште тек тыге огеш лий. Тендан коклаште кӧ кугурак лийнеже, тудо тек тарзыда лиеш,

⁴⁴ кӧ ончылно лийнеже, чылаштынат кулжо лийшаш.

⁴⁵ Айдеме Эргат Шкаланже тарзыланыкташ огыл, а тарзе лияш да шуко айдемым тӱлен налаш манын, шке чонжым пуаш толын».

⁴⁶ Нуно Иерихоныш миен шуыныт. Тунемшыж-влак да шуко калык дене пырля Иерихон гыч Иисусын лекмыж годым Тимейын Вартимей эргыже, сокыр кӱчызӧ, корно воктене шинчен.

⁴⁷ Воктечынже Назорей Иисус эртымым пален налмеке, тудо кычкыраш тӱҥалын: «Иисус, Давидын Эргыже! Мыйым серлаге!»

⁴⁸ Шыпланыже манын, тудым шукын чареныт. Но Вартимей утларак чот веле кычкырен: «Давидын Эргыже! Мыйым серлаге!»

⁴⁹ Иисус чарнен шогалын да тудым ӱжаш каласен. Сокырым ӱжаш миеныт да каласеныт: «Ит лӱд! Кынел, Тудо тыйым ӱжеш».

⁵⁰ Вартимей ӱмбал вургемжым кудаш кудалтен, кынелын да Иисус деке миен.

⁵¹ Иисус йодын: «Тый Мый дечем мом ыштымым вучет?» Тудо манын: «Раввуни, шинчам почылтшо».

⁵² Тунам Иисус тудлан каласен: «Кае, тыйым ӱшанымет утарен». Сокырын шинчаже тунамак почылтын да тудо Иисус почеш корно дене каен.