Мк 1 - У Сугынь

1 ГЛАВА 1-8 Тынеш Пуртышо Иоанн. 9-13 Иисусым тынеш пуртымаш да тергымаш. 14-20 Икымше тунемшыж-влак. 21-28 Капернаумысо синагогышто. 29-34 Иисус шуко еҥым паремда. 35-39 Иисус Галилейыште туныктен каласкала. 40-45 Проказе черан еҥым паремдымаш.

¹ Юмын Эрге Иисус Христосын Евангелийжын тӱҥалтышыже

² Пророк-влакын книгаштышт тыге возымо: «Теве Тыйын ончылнет Мый Шкемын Суксем колтем, Тудо Тылат корным ямдыла.

³ Ир мландыште кычкырышын йӱкшӧ шокта: ”Господьлан корным ямдылыза! Тудын йолгорныжым вияшым ыштыза!”»

⁴ Иоанн толын. Тудо еҥ-влакым ир мландыште тынеш пуртен да языкыштым касарыкташ манын, язык верч ӧкынен, тынеш пураш туныктен.

⁵ Тудын деке уло Иудей эл да Иерусалимысе калык лектыныт. Нуно шке языкыштым почын ойленыт, да Иоанн чыланыштымат Иордан эҥереш тынеш пуртен.

⁶ Иоанн верблюд меж вургемым чиен коштын, кыдалыштыже шӱштӧ ӱштӧ лийын. Тудо шурнышырчыкым да ир мӱкшын мӱйжым кочкын илен.

⁷ Иоанн тыге увертарен: «Мыйын почешем мый дечем Виянрак толеш. Мый Тудын йолчием кылжым, кумык лийын, рудашат ом йӧрӧ.

⁸ Мый тендам вӱд дене тынеш пуртем, а Тудо тендам Святой Шӱлыш дене тынеш пурташ тӱҥалеш».

⁹ Тудо жапыште Галилейысе Назарет гыч Иисус толын, да Иоаннлан Шкенжым Иордан эҥереш тынеш пуртыктен.

¹⁰ Вӱд гыч лекмыж годым Иисус шелалт почылтшо пылпомышым да ӱмбакыже кӧгӧрчен семын волышо Святой Шӱлышым ужын.

¹¹ Пылпомыш гыч йӱк шоктен: «Тый Мыйын йӧратыме Эргым улат, Мыйын поро кумылем Тый денет!»

¹² Тидын деч вара Святой Шӱлыш Иисусым вигак ир мландыш наҥгаен.

¹³ Тушто, ир мландыште, Тудо нылле кече лийын, да сатана Тудым алгаштараш тӧчен. Иисус янлык-влак коклаште лийын, Тудлан Суксо-влак служитленыт.

¹⁴ Иоанным кучен петырыме деч вара Иисус Галилейыш толын да Юмын Кугыжанышын Поро Увержым каласкален

¹⁵ ойлен: «Жап шуын, Юмын Кугыжаныш ынде лишемын. Языкым касарыктен, Юмо деке савырныза да Евангелийлан ӱшаныза!»

¹⁶ Галилей теҥыз сер воктене коштмыж годым Иисус вӱдышкӧ вапшым кышкыше Симон ден тудын Андрей шольыжым ужын. Нуно колызо лийыныт.

¹⁷ Нунылан Иисус каласен: «Мыйын почешем кайыза. Мый тендам айдеме кучышым ыштем!»

¹⁸ Нуно тунамак вапшыштым коденыт да Тудын почешыже каеныт.

¹⁹ Умбакырак торлымеке, Иисус Зеведейын Иаков ден Иоанн эргыж-влакым ужын. Нуно пушышто шинченыт да вапшым тумыштеныт.

²⁰ Иисус нунымат тунамак ӱжын. Нуно, Зеведей ачаштым да тарлыме пашаеҥ-влакым пушеш коден, Тудын почеш каеныт.

²¹ Иисус тунемшыж-влак дене Капернаумыш миен. Икымше шуматкечынак Тудо синагогыш пурен да туныктен.

²² Калык Тудын туныктымыжлан ӧрын. Нуным закон туныктышо-влак семын огыл, а власть улшан семын туныктен.

²³ Тиде жапыштак тысе синагогышто осал шӱлыш кучыман еҥ улмаш да кычкыраш тӱҥалын:

²⁴ «Назарет Иисус, мемнам ит логал! Мом Тый мемнан дене ыштынет? Мемнам пытараш толынат? Кӧ улметым мый палем, Тый Юмын Святойжо улат!»

²⁵ Но Иисус осал шӱлышым чарен каласен: «Шып лий! Кӧргыж гыч лек!»

²⁶ Осал шӱлыш тиде еҥым чытырыктен да, чот кычкыралын, тудын кӧргыж гыч лектын.

²⁷ Чылан чот лӱдыныт да икте-весышт деч йодыштыныт: «Мо тиде? Тиде могай у туныктымаш? Тиде Айдеме осал шӱлыш-влакланат виян кӱшта, да нунышт Тудын мутшым колыштыт».

²⁸ Тунамак Иисус нерген ойлымо шомак уло Галилей мланде мучко шарлен.

²⁹ Синагог гыч лектын, нуно тунамак Иаков да Иоанн дене пырля Симон ден Андрейын мӧҥгышкышт каеныт.

³⁰ Симонын оньыкуваже шокшымужо дене черле киен, тудын нерген Иисуслан вигак ойленыт.

³¹ Иисус тудын деке миен, кидшым кучен да кынелаш полшен. Шокшымужо тунамак пытен, да ӱдырамаш уна-влакым ончаш тӱҥалын.

³² Кастене, кече шичмеке, Иисус деке черле-влакым да иян кид йымакыже логалше-влакым чыланыштымат намиеныт.

³³ Омса ончыко уло ола погынен.

³⁴ Иисус тӱрлӧ чер деч шуко еҥым паремден. Тудо ятыр иям поктен луктын, но нунылан ойлаш кӱштен огыл, вет Тудым, Тудо Христос улмым нуно паленыт.

³⁵ Иисус эрдене эрак волгыжаш тӱҥалме деч ончыч кынелын, тымык верыш каен да тушто кумалын.

³⁶ Симон да тудын дене пырля лийше-влак Иисус почеш вашкеныт.

³⁷ Тудым мумеке, Тудлан ойленыт: «Чыланат Тыйым кычалыт».

³⁸ Иисус нунылан манын: «Лишыл яллашке да олалашке каена. Мыланем туштат туныктен каласкалаш кӱлеш. Тидланак Мый толынам».

³⁹ Тудо уло Галилей мучко коштын, синагоглаште увертарен каласкален, ия-влакым поктен луктын.

⁴⁰ Иисус деке проказе черан еҥ лишемын, Тудын ончылан сукен шинчын да сӧрвален йодын: «Паремдынет гын, мыйым эрныктен кертат».

⁴¹ Иисус тудым чаманен, кидшым шуялтен, тудын деке тӱкнен да каласен: «Паремдынем, эрналт!»

⁴² Иисус тыге пелештымеке, тиде еҥын проказе черже тунамак пытен, тудо эрнен.

⁴³ Тиде еҥым Иисус тунамак поктен колтен, но тылеч ончыч тудлан пеҥгыдын каласен:

⁴⁴ «Шеклане, тидын нерген нигӧлан нимом ит ойло. Кай да шкендым иерейлан ончыкто, эрналтмет лӱмеш Моисейын кӱштымӧ надыржым намие. Тидын дене тый паремметым ончыктет».

⁴⁵ Но тудо каен да шкеж дене мо лийме нерген чылалан каласкалаш тӱҥалын. Тидлан кӧра олашке Иисус еҥ ончылно пурен кертын огыл. Тудо олала деч ӧрдыжтӧ, тымык верлаште, лийын. Иисус деке калык чыла верла гычат миен.