Мф 7 - У Сугынь

7 ГЛАВА 1-6 Вес еҥым судитлыме нерген. 7-12 Сӧрвалыза, кычалза, пералтыза. 13-14 Шыгыр капка. 15-23 Пушеҥгым саскаж дене палат. 24-29 Кок негыз.

¹ Ида судитле, тунам теат огыда судитлалт.

² Кузе весым судитледа, теат тугак судитлыме лийыда; могай виса дене те виседа, тугай денак тыландат висалтеш.

³ Молан тый лишылетын шинчаштыже шӱкым ужат, а шкендыныште пырням от шиж?

⁴ Але шкендын шинчаштет пырня улмо ӱмбач кузе лишылетлан ”ане, мый тыйын шинчат гыч шӱкым луктам” манын каласет?

⁵ Сайла кояш тӧчышӧ! Ондак шке шинчат гыч пырням лук, вара веле лишылетын шинчаж гыч шӱкым кузе лукташ, ужат.

⁶ Нимо святойым пий-влаклан ида пу, сӧсна-влак ончыко ракывотшердам ида кышке, уке гын, тудым йолышт дене тошкат, ӱмбакыда кержалтын, тендам пурын кӱрыштыт.

⁷ Сӧрвалыза – тыланда пуалтеш, кычалза – муыда, пералтыза – тыланда почылтеш,

⁸ вет сӧрвалыше налеш, кычалше муэш, пералтышылан почылтеш.

⁹ Эргыда киндым йодеш гын, тендан коклаште тудлан кӱм пуышо айдеме уло мо?

¹⁰ Але колым йодшо эргыжлан кишкым пуышо?

¹¹ Тыгеже, те осал улмо ӱмбачат шочшыланда сай пӧлекым пуэн моштеда гын, Пылпомышсо Ачада йодшылан порым ок пу мо?

¹² Еҥ-влакым шкаланда мом ыштыктынеда, шкежат нунылан тидымак ыштыза. Закон ден пророк-влакын туныктымышт тыгае.

¹³ Шыгыр капкаш пурыза, вет колымашке наҥгайыше капка лопка, корно кумда, шукын тиде корно дене каят.

¹⁴ Илышыш наҥгайыше капка шыгыр, корно аҥысыр, шагалынже тудым кычал муыт.

¹⁵ Шояк пророк-влак деч шекланыза. Нуно тендан деке шорык коваштым чиен толыт, а кӧргыштышт опкын пире улыт.

¹⁶ Нуным те саскашт дене паледа. Иман вондо гыч виноградым, лопшудо гыч смоква саскам погат мо?

¹⁷ Сай пушеҥге сай саскам пуа, а уда пушеҥгын саскажат йӧрдымӧ.

¹⁸ Сай пушеҥге йӧрдымӧ саскам шочыктен ок керт, а уда пушеҥге сай саскам шочыктен ок керт.

¹⁹ Сай саскам пуыдымо чыла пушеҥгым руат да тулыш шуат.

²⁰ Тыгеже, шояк пророк-влакым саскашт дене паледа.

²¹ Мыланем ”Господь, Господь” манше-влак кокла гыч Пылпомыш Кугыжанышыш чыланжак огыт пуро, тушко Пылпомышсо Ачамын эрыкшым шуктышо-влак веле логалыт.

²² Суд кечын Мыланем шукын ойлаш тӱҥалыт: ”Господь! Господь! Ме Тыйын лӱмет дене огыл мо пророкла ойленна? Тыйын лӱмет дене огыл мо иям поктен луктынна да Тыйын лӱмет дене огыл мо шуко чудым ыштенна?”

²³ Тунам нунылан увертарем: ”Мый тендам нигунам пален омыл. Закондымылыкым ыштыше-влак, Мый дечем кораҥза!”

²⁴ Кӧ Мыйын нине шомакем колыштеш да ойлымем семын ышта, тудо пӧртшым кӱ ӱмбалан чоҥышо ушан еҥ гай лиеш.

²⁵ Йӱр талын йӱрын, эҥер сер гыч лектын, озыркан мардеж пуаш тӱҥалын да пӧрт ӱмбаке керылтын. Но пӧрт сӱмырлен огыл, вет тудо кӱ ӱмбалан негызлыме улмаш.

²⁶ А кӧ Мыйын нине шомакем колыштеш да ойлымем семын ок ыште, пӧртшым ошма ӱмбалан чоҥышо шонен моштыдымо еҥ гай лиеш.

²⁷ Йӱр талын йӱрын, эҥер сер гыч лектын, озыркан мардеж пуаш тӱҥалын да пӧрт ӱмбаке керылтын. Пӧрт сӱмырлен, сӱмырлымыжӧ пеш кугу лийын».

²⁸ Иисус ойлен пытарымеке, калык Тудын туныктымыжлан пеш ӧрын:

²⁹ нуным закон туныктышо да фарисей-влак семын огыл, а власть улшан семын туныктен.