Мф 6 - У Сугынь

6 ГЛАВА 1-4 Йорлылан полшымо нерген. 5-15 Кумалме нерген. 16-18 Пӱтым кучымо нерген. 19-21 Пылпомышсо поянлык. 22-23 Кап да шинча. 24-34 Юмо да поянлык. Тыршыме да тургыжланыме.

¹ Шекланыза, йорлылан полшымыда годым калык ончылно, шкендам еҥ-влаклан ончыкташ тӧчен, нимом ида ыште, уке гын, Пылпомышсо Ачада деч суапым огыда нал.

² Тугеже, йорлылан полшымет годым тидын нерген ит кычкыре. Сайла кояш тӧчышӧ-влак, еҥ моктымым вучен, синагоглаште да уремлаште тыге ыштылыт. Тыланда чынак ойлем: нуно шкеныштын суапыштым ынде налыныт.

³ А кунам тый йорлылан полшет, пурла кидетын мом ыштымыжым шола кидет ынже пале,

⁴ тыйын полшымет тек шолып лиеш. Еҥлан койдымым ужшо Ачат тылат шинчаш койшын пӧртылта.

⁵ А кумалмет годым сайла кояш тӧчышӧ гай ит лий. Нуно, еҥ ончылно шкеныштым ончыкташ манын, синагоглаште да урем луклаште шогал кумалаш йӧратат. Тыланда чынак ойлем: нуно шкеныштын суапыштым ынде налыныт.

⁶ А тый, кунам кумалат, пӧлемышкет пуро, омсатым петыре, пеленет улшо ужаш лийдыме Ачатлан кумал. Еҥлан койдымым ужшо Ачат тылат шинчаш койшын пӧртылта.

⁷ Кумалмыда годым Юмым палыдыме еҥ-влак семын утыжым ида ойло. Нуно шомакышт шукылан кӧра юмо колеш шонат.

⁸ Нунын гай ида лий, вет Ачада тыланда мо кӱлешым йодмыда деч ончычак пала.

⁹ А те тыге кумалза: Пылпомышто улшо мемнан Ачана! Тыйын святой лӱмет мокталтше,

¹⁰ Тыйын Кугыжанышет толжо, Тыйын эрыкет мланде ӱмбалнат пылпомышсо гаяк лийже.

¹¹ Мемнан илышаш киндым, тачылыкым, мыланна пу.

¹² Еҥ-шамычын мыланна ыштыме языкыштым кудалтымына гаяк мемнан языкнамат кудалте.

¹³ Языкышке мемнам ит пурто, осал дечын мемнам утаре. Вет Тыйын Кугыжанышет, куатет, чапет курым-курымеш. Аминь.

¹⁴ Еҥ-влакын сулыкыштым кудалтеда гын, Пылпомышсо Ачада тенданымат кудалта.

¹⁵ А еҥ-влакын сулыкыштым огыда кудалте гын, Пылпомышсо Ачадат тендан языкдам ок кудалте.

¹⁶ Пӱтым кучымыда годым сайла кояш тӧчышӧ-влак семын шӱлыкан тӱсым ида нал. Нуно ойгырышыла коймышт дене пӱтым кучымыштым еҥ-влаклан ончыктынешт. Тыланда чынак ойлем: нуно шке суапыштым ынде налыныт.

¹⁷ А тый пӱтым кучымет годым вуешет ӱйым шӱрӧ да шӱргетым муш.

¹⁸ Тунам пӱтым кучыметым еҥ-влак огыл, а пеленет улшо ужаш лийдыме Ачат пала. Тудыжо еҥлан койдымым ужеш да тылат шинчаш койшын пӧртылта.

¹⁹ Шкаланда мланде ӱмбалсе поянлыкым ида пого, тыште тудым когарш ден рӱдаҥыш пытарат, вор-влак кӱнчен пурат да шолыштыт.

²⁰ Пылпомышсо поянлыкым шкаланда погыза, пылпомышто когаршат, рӱдаҥышат огыт пытаре, вор-влакат кӱнчен огыт пуро да огыт шолышт.

²¹ Кушто тендан поянлыкда, туштак шӱмдат лиеш.

²² Капетын лампыже – шинчат. Тугеже, шинчат яндар гын, уло капет волгыдо лиеш,

²³ а шинчат начар гын, уло капет пычкемыш лиеш. Тугеже, тыйын волгыдет пычкемыш гын, пычкемышыже могайрак!

²⁴ Нигӧ кок озалан тарзыланен ок керт: иктыжым ужмышудымо лиеш да весыжым йӧрата, але иктыжлан чоным пуэн ышта, весыжым ок шотло. Те ик жапыштак Юмылан да поянлыклан служитлен огыда керт.

²⁵ Сандене тыланда ойлем: мом кочкына да мом йӱына манын, чонда верч ида азаплане, ӱмбакына мом чиена манын, капда нергенат ида ойгыро. Кочкыш деч чон да чием деч кап шергырак огыл мо?

²⁶ Кавасе кайык-влакым ончалза: нуно огыт ӱдӧ, огыт тӱред, амбарышкат огыт опто, тендан Пылпомышсо Ачада нуным пукша. Те нунын деч шергырак огыдал мо?

²⁷ А тендан кокла гыч кӧ азапланымыж дене кеч ик кынергутлан кап кугытшым кужемден кертеш?

²⁸ Молан вургем верч азапланеда? Пасусо лилий пеледыш-влак кузе кушкыт, шекланыза: пашам огыт ыште, огыт шӱдырӧ.

²⁹ Но тыланда ойлем: поянлыкше дене чапланен гынат, Соломонат нунын кокла гыч иктыж гаят чиен огыл.

³⁰ Таче пасушто кушшо, а эрла коҥгашке шуышаш шудымат Юмо тыге чикта гын, тендам, шагал ӱшаныше-влак, Тудо утларакат сайын ок чикте мо?

³¹ Тыгеже, ида тургыжлане. ”Мом мыланна кочкаш?”, ”Мом йӱаш?” але ”Мом чияш?” манын ида ойло.

³² Чыла тидым чын Юмым палыдыме еҥ-влак кычалыт, а Пылпомышсо Ачада тыланда чыла тиде кӱлмым пала.

³³ Эн чот Юмын Кугыжанышым да Тудын чынжым кычалза, тунам чыла тиде тыланда пырля пуалтеш.

³⁴ Тугеже, эрласе кече нерген ида тургыжлане, вет эрласе кечын шкенжын азапланымыже уло: кажне кечылан шке тургымжо сита.