Мф 5 - У Сугынь

5 ГЛАВА 1-12 Чын пиал. 13-16 Шинчал да волгыдо. 17-20 Закон нерген. 21-26 Шыдешкен илыме нерген. 27-32 Яжарланыме да ойырлымо нерген. 33-37 Товатлыме нерген. 38-42 Ӱчым шуктымо нерген. 43-48 Тушмандам йӧратыза.

¹ Калык тӱшкам ужмеке, Иисус курыкыш кӱзен, а кунам шинчын, воктекыже тунемшыж-влак миеныт.

² Иисус ойлаш тӱҥалын, нуным тыге туныктен:

³ «Шкеныштым Юмын ончылно изилан ужшо-влак поро пиалан улыт: Пылпомыш Кугыжаныш – нунын.

⁴ Ойгырышо-влак поро пиалан улыт: нуно лыпландарыме лийыт.

⁵ Ӱҥышӧ-влак поро пиалан улыт: нуно уло мландым наследство семын налыт.

⁶ Кӧн кочмо-йӱмӧ шумо семын чыным шуктымым ужмыжо шуэш, поро пиалан: тудо темеш.

⁷ Чаманыше-влак поро пиалан улыт: нуно чаманыме лийыт.

⁸ Яндар шӱман-влак поро пиалан улыт: нуно Юмым ужыт.

⁹ Тыныслыкым кондышо-влак поро пиалан улыт: нуно Юмын шочшыжо-влак манын лӱмдалтыт.

¹⁰ Чын ыштыме верч поктылмо-влак поро пиалан улыт: Пылпомыш Кугыжаныш – нунын.

¹¹ Кунам тендам Мыланем кӧра вурсат, поктылыт да тендан нерген тӱрлӧ осал шоякым каласкалат, те поро пиалан улыда.

¹² Куаныза да йывыртыза, пылпомышто тыланда кугу суап лиеш: тендан деч ончыч илыше пророк-влакымат тыгак поктылыныт.

¹³ Те мландын шинчалже улыда. Шинчал шинчалан лиймым чарна гын, кузе тудым уэш шинчаланым ышташ? Ынде тудо нимолан ок йӧрӧ, тудым луктын шуат да еҥ-влак тошкат веле.

¹⁴ Те тӱнян волгыдыжо улыда. Курык ӱмбалне шогышо ола шылын огеш керт.

¹⁵ Чӱктымеке, лампым ате йымаке огыл, а лампыпӱкеныш шындат, да пӧртыштӧ тудо чылалан волгалтара.

¹⁶ Тек тендан волгыдыдат еҥ-влак ончылно тыгак волгалтара. Тек нуно поро пашадам ужыт да Пылпомышсо Ачадам чапландарат.

¹⁷ Законым але пророк-влакын туныктымыштым кораҥдаш толынам манын ида шоно. Мый кораҥдаш огыл, а шукташ толынам.

¹⁸ Тыланда чынак ойлем: чыла тиде шукталтмешке, пылпомыш да мланде пытыме марте, закон гыч ик изи букват, ик удыралтышат ок йом.

¹⁹ Тыгеракын, кӧ эн изи ик кӱштымашым пудырта да весымат тыге ышташ туныкта гын, тудо Пылпомыш Кугыжаныште эн изилан шотлалташ тӱҥалеш, а кӧ кӱштымым шукта да тидлан еҥ-влакым туныкта, тудо Пылпомыш Кугыжаныште кугулан шотлалтеш.

²⁰ Тыланда ойлем: Юмын эрыкшым закон туныктышо ден фарисей-влак деч утларак ӱшанлын шуктен огыда шого гын, те Пылпомыш Кугыжанышыш пурен огыда керт.

²¹ Кугезе-влаклан ойлымым те колында: ”Ит пушт”. Кӧ пуштеш, суд ончылно мутым кучышаш.

²² А Мый тыланда ойлем: кӧ шкенжын лишылжылан арам шыдешкен ила, суд ончылно мутым кучышаш, а кӧ лишыл еҥжым нимолан йӧрдымӧ манеш – Синедрион ончылно мутым кучаш тӱҥалеш, а кӧ весым ”ораде” манеш, тудо тамык тулыш логалеш.

²³ Тугеже тый, жертвенник деке надыретым кондышетла, лишыл еҥетын ӱмбакет ӧпкеже улмым тушто шарналтет гын,

²⁴ надыретым тиде вер ончылан кодо, ондак кае да лишылет дене сӧрасе, вара веле пӧртыл да надыретым пу.

²⁵ Тавалыше еҥ дене корнышто пырля улмыда годымак писын сӧрасе. Уке гын, тудо тыйым судьялан пуа, а тудыжо ороллан пуа да тыйым казаматыш шындат.

²⁶ Тылат чынак ойлем: чыла пуышашлыкетым пытартыш ырет марте тӱлымешке, тушечын от лек.

²⁷ Кугезе-влаклан мом каласымым те колында: ”Ит яжарлане”.

²⁸ А Мый тыланда ойлем: кӧ ӱдырамаш ӱмбаке сутланен онча, ынде шке шӱм-чоныштыжо тудын дене яжарланен.

²⁹ Тыйым пурла шинчат алгаштара гын, тудым луктын шу. Уло капет тамыкыш кудалталтмешке, посна ужашет пыта гын, тылат сайрак лиеш.

³⁰ Тыйым пурла кидет алгаштара гын, тудым руал ойыро да ӧрдыжкӧ шу. Уло капет тамыкыш кудалтыме лиймеш, посна ужашет пыта гын, тылат сайрак.

³¹ Тыгак каласыме: ”Кӧ ватыжым ойырен колта, тудо ватыжлан ойырлымо нерген кагазым пуышаш”.

³² А Мый тыланда ойлем: кӧ ватыжым яжарланыме титак деч посна ойыра, тудо ӱдырамашым яжарланымашке шӱка, а кӧ ойырен колтымым марлан налеш, тудо яжарлана.

³³ Кугезе-влаклан тыге ойлымымат те колында: ”Товатлыметым ит пудырто, Господь ончылно товатлыметым шуктен шого”.

³⁴ А Мый тыланда ойлем: йӧршын ида товатле. Ида товатле пылпомыш дене: тудо Юмын престолжо.

³⁵ Ида товатле мланде денат: тудо Юмын йолым шындыме верже. Иерусалим дене ида товатле: тудо кугу Кугыжан олаже.

³⁶ Шке вует дене ит товатле: тый ик ӱп пырчымат ошышкат, шемышкат савырен от керт.

³⁷ ”Туге” але ”уке” манын веле каласыза, тылеч утыжо – осал дечын.

³⁸ Мом ойлымым те колында: ”Шинчалан – шинча, пӱйлан – пӱй”.

³⁹ А Мый тыланда ойлем: осалым ыштыше ваштареш ида шогал. Кӧ тыйын пурла шӱргетым сова гын, весыжымат тудлан савырал.

⁴⁰ Тувыретым шупшын налаш манын, кӧ тый денет судитлалтнеже, тудлан ӱмбал вургеметымат пу.

⁴¹ А кӧ тыйым ик меҥгым виеш пеленже коштыкта, тудын дене кокытым кае.

⁴² Тый дечет йодшылан пу, кӱсын налаш шонышо деч тупынь ит савырне.

⁴³ Мом ойлымым те колында: ”Лишылетым йӧрате, тушманетым ужмышудымо лий”.

⁴⁴ А Мый тыланда ойлем: тушмандам йӧратыза, тендам каргышылан порым тыланыза, тендам ужмышудымо-влаклан порым ыштыза, тендам вурсышо да поктылшо верч кумалза.

⁴⁵ Тунам те Пылпомышсо Ачадан чын шочшыжо улыда. Осал-влакланат, поро-влакланат Тудо шке кечыжым луктеш, чын ыштышыланат, чын огыл ыштышыланат йӱрым колта.

⁴⁶ Те шкендам йӧратыше-влакым йӧратеда гын, тидланже тыланда могай суап лиеш? Йозак погышо-влакат тыгак огыт ыште мо?

⁴⁷ Те шкендан лишыл-влакдам гына саламледа гын, мом поснак сайым ыштеда? Чын Юмым палыдыме-влакат тыгак огыт ыште мо?

⁴⁸ Сандене, Пылпомышсо Ачада могай поро, тугаяк поро лийза.