Мф 28 - У Сугынь

28 ГЛАВА 1-10 Ылыж кынелмаш. 11-15 Сарзе-влакын ойлымышт. 16-20 Тунемшыж-влаклан Иисусын кӱштымыжӧ.

¹ Шуматкече деч вара, арнян икымше кечын волгалташ тӱҥалме годым, Мария Магдалина ден вес Мария шӱгарым ончаш толыныт.

² Теве мланде виян чытырналтын: Господьын Суксыжо пылпомыш гыч волен, шӱгар деке миен да аҥысе кӱм кораҥден, ӱмбакыже шинчын.

³ Суксын тӱсшӧ волгенче гай улмаш, вургемже лум гай ошо.

⁴ Туддеч лӱдын, оролышо-влак чытыраш тӱҥалыныт да колышо гай лийыныт.

⁵ А Суксо мутшым ӱдырамаш-влак велке савырен ойлен: «Те ида лӱд. Палем, те пудален сакыме Иисусым кычалыда.

⁶ Тудо тыште уке, ойлымыжо семынак ылыжын, лишкырак толза да Господьын кийыме вержым ончалза.

⁷ Вара писынрак кайыза да Тудын тунемшыж-влаклан каласыза: Тудо колымаш гыч ылыжын да тендам Галилейыште вашлиеш. Тушто Тудым ужыда. Мый кызыт тыланда ойлышашем каласенам».

⁸ Ӱдырамаш-влак шӱгар деч писын кораҥыныт, лӱдын да чот куанен, Иисусын тунемшыж-влаклан увертараш куржыныт.

⁹ Теве тунемшыж-влаклан увертараш кайымышт годым Иисус нуным вашлийын да каласен: «Куаныза!» Нуно лишемыныт, ончыланже сукен, вуйым савен, йолжым ӧндалыныт.

¹⁰ Иисус ойлен: «Ида лӱд, мийыза да лишыл йолташем-влаклан Галилейыш каяш каласыза. Нуно Мыйым тушто ужыт».

¹¹ Ӱдырамаш-влак кайымеке, орол кокла гыч южышт олашке пуреныт, архиерей-влаклан мо лиймым чыла увертареныт.

¹² А нунышт калык кугурак-влак дене погыненыт, каҥашен налмеке, сарзе-влаклан шуко оксам пуэныт

¹³ да ойленыт: «Тудын тунемшыж-влак йӱдым толыныт да малымына годым капшым шолышт наҥгаеныт манын каласыза.

¹⁴ Вуйлатыше деке тидын нерген увер миен шуэш гын, ме тудым ӱшандарена, да тыланда нимо шотыштат азапланыме ок кӱл».

¹⁵ Сарзе-влак, оксам налын, каласыме семынак ыштеныт. Нунын ойлымыштым иудей-влак коклаште тачысе кече мартеат шаркалат.

¹⁶ А латик тунемшыже Галилейыш Иисусын кӱштымӧ курык ӱмбаке каен.

¹⁷ Иисусым ужмеке, ончыланже кумык возыныт, а южышт кокытеланеныт.

¹⁸ Иисус нунын деке лишемын да каласен: «Мылам пылпомышто да мландӱмбалне пӱтынь власть пуалтын.

¹⁹ Сандене кайыза да чыла калык-влакым туныктыза. Ача, Эрге да Святой Шӱлыш лӱмеш нуным тынеш пуртыза,

²⁰ тыланда чыла кӱштымем шуктен шогаш туныктыза. Тӱня пытымешке, Мый кече еда тендан дене пырля лиям. Аминь».