Мф 27 - У Сугынь

27 ГЛАВА 1-2 Иисусым Понтий Пилатын кидышке пуат. 3-10 Иудан колымыжо. 11-14 Пилатын йодыштмыжо. 15-26 Пушташ пунчалмаш. 27-31 Сарзе-влакын игылтмышт. 32-44 Иисусым пудален сакымаш. 45-56 Иисусын колымыжо. 57-61 Иисусым тойымаш. 62-66 Шӱгарым оролымаш.

¹ Эрдене эрак архиерей ден калык кугурак-влак, чылан погынен, Иисусым пушташ пуымо нерген каҥашеныт.

² Вара Тудым пидын наҥгаеныт да Понтий Пилатын, вуйлатышын, кидыш пуэныт.

³ Иисусым пушташ судитлымым пален налмеке, Тудым кучыктен пуышо Иуда чот ӧкынен да архиерей ден калык кугурак-влакын пуымо кумло ший оксаштым мӧҥгеш пӧртылтен.

⁴ «Титакдыме вӱрым ужален, мый языкым ыштенам», – манын. Нунышт тудлан каласеныт: «Мыланнаже мо? Шке ончо».

⁵ Храмыште оксажым кудалтен, Иуда лектын каен да пикталтын.

⁶ Архиерей-влак оксам налыныт да каласеныт: «Тидым храмын казнаш пышташ ок лий. Тидыже – вӱрын акше».

⁷ Мутланен келшымеке, тиде окса дене кӧршӧк ыштышын пасужым йот эл гыч толшо-влакым тояш налыныт.

⁸ Сандене тиде пасум таче мартеат «Вӱр пасу» маныт.

⁹ Тыге Иеремий пророк гоч каласыме шомак шукталтын, тудо ойлен: «Нуно кумло ший оксам, Израиль эрге-влакын тудо Айдемылан палемдыме акым, налыныт

¹⁰ да, Господь мылам кӱштымыж семынак, тиде окса дене кӧршӧк ыштышын пасужым тӱлен налыныт».

¹¹ А Иисус вуйлатыше ончык шогалын. Вуйлатыше Тудын деч йодын: «Тый иудей-влакын Кугыжашт улат?» Иисус тудлан каласен: «Шке тидым каласышыч».

¹² А кунам Иисусым архиерей ден калык кугурак-влак титакленыт, Тудо нимомат вашештен огыл.

¹³ Тунам Пилат Тудлан ойлен: «Тыйын ваштарешет кунар таныклат, от кол мо?»

¹⁴ Но Иисус ик титаклымыштланат вашештен огыл, садлан вуйлатыше пешак ӧрын.

¹⁵ Петырен шындыме кокла гыч калыкын ойырен налме ик еҥым Кугече пайрем годым вуйлатыше эрыкыш луктеш улмаш.

¹⁶ Тунам петырымаште чылалан палыме Варавва лӱман еҥ шинчен.

¹⁷ Тыгеракын, калык погынымеке, Пилат нунын деч йодын: «Тыланда мый Вараввам але Христос манын лӱмдымӧ Иисусым колтем? Кудыжым колтыктынеда?»

¹⁸ Пилат пален: Иисусым кӧранымыштлан кӧра тудын кидыш пуэныт.

¹⁹ Тунам, судитлыме верыште шинчымыж годым, тудлан ватыже каласаш колтен: «Саде чын ыштыше Айдемылан нимом ит ыште, мый таче Тудын верч омо дене чот йӧсланенам».

²⁰ Но архиерей ден калык кугурак-влак Вараввалан эрыкым йодаш, а Иисусым пуштыкташ манын, калыкым таратеныт.

²¹ Вуйлатыше калык тӱшка деч адак йодын: «Нине кокыт гыч кудыжым колтыктынеда?» Нуно каласеныт: «Вараввам».

²² Пилат нунылан ойлен: «Мом вара мый Христос манме Иисус дене ыштем?» Тудлан чылан вашештеныт: «Тек пудален сакыме лиеш!»

²³ Вуйлатыше каласен: «Могай осалым Тудо ыштен?» Но нуно эшеат виян кычкыреныт: «Тек пудален сакыме лиеш!»

²⁴ Пилат ужын: нимо ок полшо, а пудыранымаш утыр вияҥеш веле, сандене, вӱдым налын, калык ончылно кидшым мушкын да каласен: «Тиде чын ыштыше Айдемын вӱржылан мый титакан омыл, шке ончыза».

²⁵ Уло калык вашештен: «Тудын вӱржӧ мемнан да икшывына-влак ӱмбалне!»

²⁶ Тунам Пилат нунылан Вараввам колтен, а Иисусым сола дене кырыктен, пудален сакаш пуэн.

²⁷ Вара вуйлатышын сарзыже-влак Иисусым преторийыш намиеныт, Тудын йырже уло полкым погеныт.

²⁸ Иисусын вургемжым кудашыныт да йошкар вургемым чиктеныт.

²⁹ А вара, шуанвондо дене вуйшӱдышым тодын, Тудын вуйышкыжо пыштеныт да пурла кидышкыже тоям кучыктеныт. Сарзе-влак, ончыланже сукен шинчын, Иисусым игылтын ойленыт: «Куане, иудей-влакын Кугыжашт!»

³⁰ Тудын ӱмбаке шӱведеныт, тояжым налын, вуйжо гыч кыреныт.

³¹ Тудым игылтмекышт, ӱмбачше йошкар вургемым кудашыныт, шке вургемжым чиктеныт да пудален сакаш наҥгаеныт.

³² Лекмышт годым нуно Кириней гыч улшо Симон лӱман еҥым вашлийыныт, тудлан Иисусын ыресшым нумал наҥгайыктеныт.

³³ Нуно Голгофа манме верыш миеныт, тиде лӱмжӧ «саҥга вер» манмым ончыкта.

³⁴ Тушто Иисуслан шекш дене варыме уксусым йӱаш пуэныт. Иисус подыл ончен, но ынеже йӱ улмаш.

³⁵ Иисусым пудален сакымеке, шывагам кучен, вургемжым пайленыт

³⁶ да Тудым оролен шинченыт.

³⁷ Иисусын вуй ӱмбаланже Тудын титакшым ончыктен возымым пижыктеныт: «Тиде Иисус, иудей-влакын Кугыжашт».

³⁸ Тудын дене пырля кок агышым пудален сакеныт: иктыжым пурла могыреш, весыжым шола могыреш.

³⁹ Эртен кайыше-влак, вуйым рӱзен, Иисусым игылт ойленыт:

⁴⁰ «Тый, храмым шалатен да кум кечыште угыч чоҥен кертше, ынде Шкендым Шке утаре! Тый Юмын Эрге улат гын, ырес гыч воло».

⁴¹ Тыгак архиерей-влакат закон туныктышо, калык кугурак ден фарисей-влак дене пырля игылт ойленыт:

⁴² «Молым утарен, а Шкенжым утарен ок керт. Тудо Израильын Кугыжаже гын, тек ынде ырес гыч вола, тунам Тудлан ӱшанена.

⁴³ Тудо Юмылан ӱшанен. Юмо Тудым утарынеже гын, тек кызыт утара, вет Тудыжо Шкенжым Юмын Эрге манын».

⁴⁴ Иисус дене пырля пудален сакыме агыше-влакат Тудым тыгак вурсеныт.

⁴⁵ Кудымшо шагат гыч индешымше шагат марте уло мланде мучко пычкемыш лийын.

⁴⁶ Индешымше шагат жапыште Иисус виян йӱк дене кычкыралын: «Или, Или! Лама савахфани?» Тидыже «Юмем, Юмем! Молан Мыйым коденат?» манме лиеш.

⁴⁷ Воктен шогышо-влак кокла гыч южышт тидым колын ойленыт: «Тудо Илиям ӱжеш».

⁴⁸ Нунын кокла гыч иктыже тунамак куржын миен, губкым налын, уксусеш нӧртен, тоя вуеш керын да Иисуслан йӱаш пуэн.

⁴⁹ А молышт ойленыт: «Вучалте, ончалына, Илия Тудым утараш толеш мо?»

⁵⁰ Но Иисус адакат чот кычкыралын, да чонжо лектын.

⁵¹ Тунамак храмысе пӱрдыш кӱшычын ӱлыкӧ кокыте кушкедлен, мланде чытырналтын, кугу кӱ-влак шелалтыныт,

⁵² шӱгар рож-влак почылтыныт. Колышо шуко святойын капышт ылыжыныт

⁵³ да шӱгар гыч лектыныт, Иисусын ылыж кынелмекыже, нуно святой олашке пуреныт да шукылан конченыт.

⁵⁴ Шӱдывуй да тудын дене пырля Иисусым оролышо-влак, мланде чытырымым да мо лиймым ужмеке, пешак лӱдыныт да ойленыт: «Тудо чынжымак Юмын Эрге улмаш».

⁵⁵ Тушто тыгак шуко ӱдырамаш лийын да ӧрдыж гыч ончен шоген, нуно Иисус почеш Галилей гычак толыныт да Тудлан служитленыт улмаш.

⁵⁶ Нунын коклаште Мария Магдалина, Иаков ден Иосийын Мария авашт да Зеведейын эргыж-влакын авашт лийыныт.

⁵⁷ А кас шумеке, Аримафей гыч улшо Иосиф лӱман поян еҥ толын. Тудат Иисусын тунемшыже лийын.

⁵⁸ Тудо, Пилат деке миен, Иисусын капшым йодын. Пилат капым пуаш кӱштен.

⁵⁹ Иосиф капым налын, тудым яндар йытын вынер дене вӱдылын

⁶⁰ да шкаланже ямдылыме у шӱгарыш пыштен. Шӱгаржым курык саҥгаш кӱнчымӧ улмаш. Иосиф шӱгар аҥжым кугу кӱ дене петырен да каен.

⁶¹ Туштак Мария Магдалина ден вес Мария лийыныт, нуно шӱгар ваштареш шинченыт.

⁶² Вес кечын, кугарня эрлашыжым, архиерей ден фарисей-влак Пилат деке погыненыт

⁶³ да ойленыт: «Озана, ме шарналтышна, саде ондалышет илымыж годым ”Кум кече эртымеке, Мый ылыж кынелам” манын каласен.

⁶⁴ Садлан кумшо кече марте шӱгаржым оролаш кӱштӧ. Уке гын, тунемшыж-влак Тудын капшым, йӱдым толын, шолышт кертыт да калыклан ”Колымаш гыч ылыжын” манын ойлаш тӱҥалыт. Тунам пытартыш ондалымыже икымше дечат ударак лиеш».

⁶⁵ Пилат нунылан каласен: «Оролда улыт, кайыза, моштымыда семын оролыза».

⁶⁶ Нуно каеныт да шӱгарым оролаш шогалтеныт, кӱэшыже печатьым пыштеныт.