Мф 26 - У Сугынь

26 ГЛАВА 1-5 Иисус ваштареш шолып мутланен келшымаш. 6-13 Иисусым ӱй дене шӱрымаш. 14-16 Иисусым ужалаш Иуда йӧным кычалеш. 17-25 Кугече кочкыш. 26-30 Святой кас кочкыш. 31-35 Петрын кораҥмыж нерген Иисус ончылгоч каласкала. 36-46 Иисус Гефсиманийыште. 47-56 Иисусым кучен наҥгайымаш. 57-68 Синедрион ончылно. 69-75 Петрын кораҥмыже.

¹ Чыла тидым ойлен пытарымеке, Иисус тунемшыж-влаклан каласен:

² «Те паледа: кок кече гыч Кугече лиеш, да Айдеме Эрге ыресеш пудален сакаш пуалтеш».

³ Тунам Каиафа лӱман архиерейын кудывечышкыже архиерей, закон туныктышо, калык кугурак-влак погыненыт

⁴ да Иисусым чояланен кучаш да пушташ пырля пунчалыныт.

⁵ Но ойленыт: «Калык коклаште пудыранымаш ынже лий манын, тидым пайрем годым ыштыман огыл».

⁶ Иисусын Вифанийыште проказе черан манме Симонын пӧртыштыжӧ улмыж годым

⁷ ик ӱдырамаш лишемын, алебастр кӱ атеш шергакан миром ӱстелтӧрысӧ Иисус деке намиен да Тудын вуйышкыжо опталын.

⁸ Тидым ужын, тунемшыж-влак шыдешкеныт да ойленыт: «Молан тыгай арам кучылт пытарымаш?

⁹ Тиде миром шергын ужалаш да оксажым йорло-влаклан пуэдаш лиеш ыле».

¹⁰ Но Иисус вуеш налмыштым паленат, нунылан каласен: «Молан ӱдырамашым тургыжландареда? Тудо Мылам поро пашам ыштен.

¹¹ Йорло-влак эре тендан дене лийыт, а Мый тендан дене эре ом лий.

¹² Тиде миром ӱмбакем опталмыж дене тудо Мыйым тояш ямдылен.

¹³ Тыланда чынак ойлем: уло тӱня мучко, кушто гына Поро Уверым каласкалаш огыт тӱҥал, тыгак тиде ӱдырамашын мом ыштымыж нерген ойлаш да шкенжым шарнаш тӱҥалыт».

¹⁴ Тунам латкокыт гыч иктыже, Искариот Иуда манын лӱмдымыжӧ, архиерей-влак деке каен

¹⁵ да каласен: «Мый Тудым тыланда ужалем гын, мыланем мом пуэда?» Нуно тудлан кумло ший оксам темленыт.

¹⁶ Тылеч вара Иуда Иисусым ужалаш йӧнан жапым кычалаш тӱҥалын.

¹⁷ Шергинде пайремын икымше кечынжак тунемшыж-влак Иисус деке лишемыныт да каласеныт: «Кугече кочкышым кушто кочнет? Кушан тудым ямдылена?»

¹⁸ Тудо ойлен: «Олашке ик еҥ деке кайыза да тудлан каласыза: ”Туныктышына ойла: Мыйын жапем лишнак, тунемшем-влак дене пырля тыйын пӧртыштет кугече кочкышым эртарынем”».

¹⁹ Иисус кузе кӱштен, тунемшыж-влак тугак ыштеныт да кугече кочкышым ямдыленыт.

²⁰ Кас шумеке, Иисус латкок тунемшыж дене пырля кочкаш верланен,

²¹ а кочмышт годым каласен: «Тыланда чынак ойлем: тендан кокла гыч иктыже Мыйым ужала».

²² Нуно пешак ойганеныт, кажныже Тудын деч йодышташ тӱҥалын: «Господь, мыяк огыл дыр?»

²³ Иисус вашештен: «Мый денем пырля кидым кӱмыжыш шуялтыше Мыйым ужала.

²⁴ Чын, Айдеме Эрге нерген кузе возымо, тиде илыш гыч Тудо туге кая, но Айдеме Эргым ужалышылан ойго лиеш: ок шоч гын, тиде еҥлан сайрак ыле».

²⁵ Тунам Тудым ужалыше Иуда каласен: «Равви, тиде мый омыл дыр?» Иисус тудлан ойлен: «Шке тидым каласышыч».

²⁶ Кочмышт годым Иисус киндым налын, благословитлен, тодылын, тунемшыж-влаклан пуэн да каласен: «Налза, кочса: тиде Мыйын Капем».

²⁷ Вара чашым налын, тауштен пелештен, нунылан пуэн да каласен: «Тышечын чыланат йӱза.

²⁸ Тиде – языкыштым кудалташ манын, шуко еҥ верч йоктарыме Мыйын у сугынь Вӱрем.

²⁹ А тыланда каласем: Ачамын Кугыжаныштыже тендан дене пырля у йошкар аракам йӱмӧ кече шумешке, Мый виноград саска гыч ыштымым ом йӱ».

³⁰ Нуно псаломым муреныт, вара Елеон курыкыш каеныт.

³¹ Тунам Иисус нунылан ойлен: «Тиде йӱдым те чылан Мый дечем кораҥыда, вет возымо: ”Кӱтӱчыжым перен шуэм, да шорык кӱтӱ шалана”.

³² Но, ылыж кынелмекем, Мый тендам Галилейыште вашлиям».

³³ Петр Тудлан каласен: «Тый дечет чылан кораҥыт гынат, мый нигунам ом кораҥ!»

³⁴ Иисус вашештен: «Тылат чынак каласем: тиде йӱдымак, агытан муралтымешке, тый кум гана Мыйын нерген ”Тудым ом пале” манат».

³⁵ Петр ойлен: «Мылам Тый денет пырля колаш логалеш гынат, Тыйын нерген ”ом пале” ом ман!» Моло тунемшыж-влакат тыгак ойленыт.

³⁶ Вара Иисус тунемшыж-влак дене пырля Гефсиманий манме верыш толын да нунылан каласен: «Мый тушко кумалаш каем, тыште шинчыза».

³⁷ Пеленже Петрым да Зеведейын кок эргыжым налын. Иисус ойгыраш да йӧсланаш тӱҥалын.

³⁸ Тудо ойлен: «Мыйын чонем колышаш гай ойганен, тыште лийза да Мыйын семынак теат ида мале».

³⁹ Изиш ӧрдыжкырак кораҥмеке, кумык возын сӧрвален: «Ачай! Лиеш гын, тиде чаше Мыйым эртен кайыже, туге гынат Мыйын шонымо семын огыл, а Тыйын шонымет семын лийже».

⁴⁰ Иисус тунемшыж-влак деке толын, нуным мален кийышым ужын да Петрлан ойлен: «Але вара Мый денем пырля ик шагатымат малыде эртарен кертын огыдал?

⁴¹ Алгаштаралташ огыл манын, шекланыза, кумалза. Чон чулым, но кап вийдыме».

⁴² Адак кокымшо гана Иисус кораҥын да сӧрвален: «Мыйын Ачам! Мыйын йӱде, тиде чаше эртен каен ок керт гын, тек Тыйын шонымет семын лиеш».

⁴³ Пӧртылмекыже, тунемшыж-влакым адакат малышым ужын, нунын шинчаштым омо пызырен улмаш.

⁴⁴ Нуным коден, Иисус уэш кораҥын да, тудымак ойлен, кумшо гана кумалын.

⁴⁵ Вара тунемшыж-влак деке пӧртылын да нунылан каласен: «Те алят маледа да канеда? Жап лишемын, Айдеме Эрге языкан-влакын кидыш пуалтеш.

⁴⁶ Кынелза, каена: теве Мыйым ужалыше лишемеш».

⁴⁷ Иисусын ойлымыж годымак латкок тунемшыж гыч иктыже, Иуда, толын, тудын дене пырля архиерей ден калык кугурак-влакын колтымо кугу тӱшка улмаш. Нуно кердан, шугынян лийыныт.

⁴⁸ Ужалыше нунылан Иисусым тыге палдараш сӧрен улмаш: «Кӧм мый шупшалам, Иисус лиеш. Тудым кучыза».

⁴⁹ Иуда тунамак Иисус деке миен да ойлен: «Куане, Равви!» Вара Тудым шупшалын.

⁵⁰ Иисус тудлан каласен: «Йолташ, тый тидлан верч толынат мо?» Тунам толшо-влак воктекыже миеныт, Иисус ӱмбаке кидыштым нӧлталыныт да руалтен кученыт.

⁵¹ Тыгодым Иисус дене пырля улшо кокла гыч иктыже кердыжым шупшын луктын, архиерейын тарзыжым руалын, пылышыжым ойырен шуэн.

⁵² Иисус тудлан ойлен: «Кердетым верышкыже пыште, кердым налше-влак керде дечак пытат.

⁵³ Але Мый Ачам деч кызытак полышым йодын ом керт шонет? Тудо Мыланем латкок легион дечат шуко Суксыж-влакым колта ыле.

⁵⁴ Но мо лийшаш, тидыже кузе вара Возымаште каласыме семын шукталтын кертеш?»

⁵⁵ Вара Иисус толшо-влаклан ойлен: «Аген коштшо ӱмбаке лекмыла, кердым, шугыньым налын, те Мыйым кучаш толында. Кече еда тендан ончылно храмыште туныктен шинченам, а те Мыйым руалтен кучен огыдал.

⁵⁶ Но пророк-влакын возымышт шукталтышт манын, чыла тиде лийын». Тунам чыла тунемшыж-влак Иисусым коден куржыныт.

⁵⁷ Иисусым кучышо-влак Тудым Каиафа архиерей деке конденыт, тушкыжо закон туныктышо да калык кугурак-влак погыненыт.

⁵⁸ А Петр ӧрдыжтырак лийын, Иисус почеш архиерейын кудывечыже марте миен. Тушко пурымеке, умбакыже мо лийшашым ужаш шонен, тарзе-влак дене пырля шинчын.

⁵⁹ Архиерей-влак, калык кугурак-влак да уло Синедрион, Иисусым пушташ амалым муаш манын, Тудын ваштареш шояк таныклымашым кычалыныт,

⁶⁰ но шукын шояклен таныкленыт гынат, муын огытыл. Пытартышлан, шояк таныклыше кок еҥ толын

⁶¹ да каласен: «Тудо ойлен: ”Мый Юмын храмжым шалатен да кум кечыште угыч ыштен кертам”».

⁶² Архиерей кынел шогалын да Иисуслан каласен: «Тый нимом от вашеште? Ваштарешет титаклен ойлымылан мом каласет?»

⁶³ А Иисус шып шоген. Архиерей Тудлан ойлен: «Илыше Юмо ончылно сӧрвалем, мыланна каласе: Тый Христос, Юмын Эрге улат мо?»

⁶⁴ Иисус тудлан ойлен: «Шке тидым каласышыч. Адакшым тыланда ойлем: тиддеч вара те Айдеме Эргын Виян Юмын пурла могырыштыжо шинчымыжым да кавасе пыл ӱмбалне толмыжым ужыда».

⁶⁵ Тунам архиерей шке вургемжым кушкедын да каласен: «Тудо Юмым мыскыла! Адак могай таныклыше-влак мыланна кӱлыт! Теве ынде те Юмым мыскылымыжым колда!

⁶⁶ Те кузе шонеда?» Синедрионын моло еҥже-влак вашештеныт: «Титакан, колышаш!»

⁶⁷ Тунам нуно Иисусын шӱргышкыжӧ шӱведеныт, Тудым кыреныт, южышт шӱргыж гыч совкаленыт

⁶⁸ да ойленыт: «Эй, Христос, пророк улат гын, кӧ Тыйым перыш – каласе!»

⁶⁹ Петр тӱжвалне, кудывечыште, шинчен. Тудын деке ик тарзе ӱдыр миен да каласен: «Тыят Галилей гыч толшо Иисус дене пырля лийынат».

⁷⁰ «Мом тый ойлет, ом пале», – чылан ончылно Петр шӧрен ойлен.

⁷¹ Капка деке лекмыж годым тудым весе ужын да тушто улшо-влаклан каласен: «Тиде еҥат Назорей Иисус дене пырля лийын».

⁷² Петр «Тиде Айдемым ом пале» манын адакат товатлен каласен.

⁷³ Изиш лиймеке, тушто шогышо-влак тудын деке миеныт да ойленыт: «Чынак, тыят нунын кокла гыч улат, кузе кутырымет тыйым палдара».

⁷⁴ Тунам Петр «тиде Айдемым ом пале» манын, Юмо ончылно товатлен ойлаш тӱҥалын. Тунамак агытан муралтен.

⁷⁵ Петр Иисусын каласыме мутшым шарналтен: «Агытан муралтымешке, кум гана Мыйын нерген ”ом пале” манын каласет». Вара тушечын лектынат, чон йӧсын шортын.