Мф 25 - У Сугынь

25 ГЛАВА 1-13 Лу ӱдыр нерген туштен каласымаш. 14-30 Кум тарзе нерген туштен каласымаш. 31-46 Калык-влакым судитлымаш.

¹ Тунам Пылпомыш Кугыжаныш лу ӱдыр гай лиеш. Ӱдыр-влак, лампыштым налын, качым вашлияш лектыныт.

² Нунын кокла гыч визытше ушан, визытше шонен моштыдымо лийыныт.

³ Шонен моштыдымо-влак лампыштым налыныт, но йӱлалташ ӱйым пеленышт налын огытыл,

⁴ а ушан-влакышт лампе дене пырля атешышт ӱйжымат налыныт.

⁵ Каче кучалтынат, чылан нералтеныт да мален колтеныт.

⁶ Но пелйӱдым кычкырыме шергылтын: ”Теве каче толеш, тудым вашлияш лекса!”

⁷ Тунам ӱдыр-влак чылан кынелыныт да лампыштым тӧрлатеныт.

⁸ Шонен моштыдымо-шамыч ушан-влаклан каласеныт: ”Мыланна ӱйдам пуыза, мемнан лампына-влак йӧрат”.

⁹ А ушанышт вашештеныт: ”Уке, тудо мыланна чылалан ок сите. Лучо ужалыше-влак деке кайыза да шкаланда налза”.

¹⁰ Налаш кайымекышт, каче толын, ямде лийше-влак тудын дене пырля сӱан пайремыш пуреныт, почешышт омсам петыреныт.

¹¹ Вара моло ӱдыр-влак толыныт да ойленыт: ”Оза, оза! Мыланна поч”.

¹² А тудыжо нунылан вашештен: ”Тыланда чынак ойлем: тендам ом пале”.

¹³ Тыгеже, шекланен шогыза, вет Айдеме Эрге толмо кечымат, шагатымат огыда пале.

¹⁴ Мо лийшашым тыгеат ончыкташ лиеш: Вес элыш кайымыж деч ончыч айдеме шкеж деке тарзыж-влакым ӱжын да погыжым нунылан ӱшанен коден.

¹⁵ Иктылан вич талант оксам, весылан коктым, кумшылан иктым – кажныштлан вийышт шутымо семын пуэн да тунамак каен.

¹⁶ Вич талантым налшыже тунамак миен да, окса гыч оксам ыштен кучылтын, ешартыш вич талантым ыштен налын.

¹⁷ Тыгак кок талантым налшыжат ешартыш кок талантым ыштен налын.

¹⁸ А ик талантым налшыже каен, лакым кӱнчен да озажын оксажым мландыш тоен.

¹⁹ Ятыр жап эртымеке, тарзе-влакын озашт пӧртылын да оксам кузе кучылтмыштым терген.

²⁰ Вич талантым налше тарзе ешартыш вич талантымат конден да ойлен: ”Оза, тый мылам вич талантым пуэнат, а теве ешартыш вич талантым мый нунын дене ыштен налынам”.

²¹ Озаже тудлан каласен: ”Сай! Тый поро да ӱшанле тарзе улат. Изиште ӱшанле лийынат, тыйым шукым ончаш шогалтем. Озатын куан пайремышкыже тол”.

²² Кок талантым налше тарзат толын да ойлен: ”Оза, тый мылам кок талантым пуэнат, а теве вес кок талантым нунын дене ыштен налынам”.

²³ Оза тудланат каласен: ”Сай! Тый поро да ӱшанле тарзе улат. Изиште ӱшанле лийынат, тыйым шукым ончаш шогалтем. Озатын куан пайремышкыже тол”.

²⁴ Ик талантым налшат толын да каласен: ”Оза, мый тыйын пеҥгыдын йодшо айдеме улметым паленам: кушто ӱден отыл, тушто тӱредат, кушто урлыкашым шавен отыл, тушто погет.

²⁵ Мый лӱдынам, сандене каенам да тыйын талант оксатым мландыш тоенам, теве тыйын оксат”.

²⁶ Оза тудлан вашештен: ”Йӧрдымӧ да йолагай тарзе! Кушто мый ӱден омыл, тушто тӱредмем, кушто урлыкашым шавен омыл, тушто погымем тый паленат,

²⁷ сандене оксамым торгайыше-влаклан пуаш кӱлеш ыле, пӧртылмекем, шкемыным парыш дене налам ыле.

²⁸ Тыгеракын, налза тудын деч талантым да лу талантан еҥлан пуыза.

²⁹ Кӧн уло, тудлан пуалтеш да тудын лыҥ лиеш, а кӧн уке – улыжат налалтеш.

³⁰ А йӧрдымӧ тарзым пычкемышышке луктын кудалтыза. Тушто шортмаш да пӱйым пурмаш лиеш”». [Тидым каласымеке, Иисус йӱкшым кугемден ойлен: «Кӧн колышташ пылышыже уло, тек колеш».]

³¹ «Чыла святой Суксо-влак дене пырля чапланен толмеке, Айдеме Эрге шке чапшын престолышкыжо шинчеш.

³² Тудын ончыко калык-влак чылан погынат, да кузе каза деч шорыкым кӱтӱчӧ ойыра, Тудат тугак еҥ-влакым икте-весе деч ойыра.

³³ Шорык-влакым Шкеж деч пурла могырыш шогалта, а каза-влакым – шола могырыш.

³⁴ Вара Кугыжа Шкеж деч пурлаште улшыштлан каласа: ”Ачамын суапландарымыже-влак, толза. Тӱням ыштыме годымак тыланда ямдылыме Кугыжанышым те кызыт наследник семын налза.

³⁵ Вет Мый шужышо лийынам, те Мылам кочкышым пуэнда; йӱмем шуын, те Мыйым йӱктенда; ӧрдыж еҥ лийынам, те Мыйым суртышкыда пуртенда.

³⁶ Чара лийынам, те Мыйым чиктенда; черле лийынам, те Мый декем коштында; казаматыште лийынам, Мый декем ужаш миенда”.

³⁷ Тунам чын ыштыше-влак Тудлан вашештат: ”Господь, кунам ме Тыйым шужышым ужынна да пукшен улына? Але кунам ме йӱмет шумым ужынна да Тылат йӱаш пуэнна?

³⁸ Кунам йот еҥ улметым ужынна да суртышкына пуртенна? Кунам Тыйым чарам ужынна да чиктенна?

³⁹ Кунам ме Тыйым черлым але казаматыште ужынна да Тый декет миенна?”

⁴⁰ А Кугыжа нунылан каласа: ”Тыланда чынак ойлем: мом те нине изирак иза-шольым-влак кокла гыч иктыжлан ыштенда, чылажымат Мыланем ыштенда”.

⁴¹ Вара шола могырышто улшо-влаклан каласа: ”Каргыме-влак, Мый дечем кораҥза, диавол ден тудын суксыж-влаклан ямдылыме курымашлык тулыш кайыза.

⁴² Вет Мый шужышо лийынам, те Мылам кочкаш пуэн огыдал; йӱмем шуын, те Мыйым йӱктен огыдал;

⁴³ ӧрдыж еҥ лийынам, Мыйым пуртен огыдал; чара лийынам, Мыйым чиктен огыдал; черлат лийынам, казаматыштат лийынам, а те Мый декем коштын огыдал”.

⁴⁴ Тунам нунат Тудлан вашештат: ”Господь! Кунам ме Тыйым шужышым але йӱмӧ шушым, але ӧрдыж улшым, але чарам, але черлым, але казаматыште ужынна да Тылат полшен огынал?”

⁴⁵ Тудо нунылан вашешта: ”Тыланда чынак ойлем: мом те нине изирак-влак кокла гыч иктыжлан ыштен огыдал, Мылам ыштен огыдал”.

⁴⁶ Нинышт, мутым кучен, курымеш орланат, а чын ыштыше-влак курымашлык илышыш каят.»