Мф 24 - У Сугынь

24 ГЛАВА 1-2 Храмым шалатыме нерген ончылгоч каласымаш. 3-14 Орлыкын тӱҥалмыже. 15-28 Кугу йӧсланымаш. 29-31 Айдеме Эрге толмо нерген. 32-35 Смокван туныктымыжо. 36-44 Кече ден шагатше пале огыл. 45-51 Ӱшанле тарзе ден йӧрдымӧ тарзе.

¹ Храм гыч Иисус лектын каен. Храм оралте-влакым ончыкташ манын, тунемшыж-влак Тудын деке лишемыныт.

² Иисус нунылан каласен: «Чыла тидым ужыда? Тыланда чынак ойлем: тыште кӱ ӱмбалан кӱ огеш код, чыла шалатыме лиеш».

³ А Иисус Елеон курык ӱмбалне шинчыме годым Тудын деке тунемшыж-влак посна миеныт да йодыныт: «Мыланна каласе, кунам тиде лиеш? Тыйын толметым да кызытсе курымын пытымыжым могай палдарыше пале ончыкта?»

⁴ Иисус нунылан вашештен: «Шекланыза, нигӧат тендам ынже ондале.

⁵ Шукын Мыйын лӱмем дене толыт да ойлаш тӱҥалыт: ”Мый Христос улам”. Шукыштым ондалат.

⁶ Тыгак сар йӱкым да сар нерген увер-влакым колыда. Шекланыза, ида лӱд, чыла тиде лийшаш, но тиде але мучаш огыл.

⁷ Калык ӱмбаке калык кынелеш, кугыжаныш ӱмбаке – кугыжаныш, верын-верын шужымаш, мор да мланде чытырналтмаш лиеш.

⁸ Тиде чылажат – орлыкын тӱҥалтышыже.

⁹ Тунам тендам орландараш кучат да пуштедаш тӱҥалыт, Мыйын лӱмемлан кӧра тендам чыла калык ужмышудымо лиеш.

¹⁰ Тунам шукышт кораҥыт, икте-весым кучыктен пуаш тӱҥалыт, икте-весым ужмышудымо лийыт.

¹¹ Шояк пророк-влак ятыр лектыт да шукым ондалат.

¹² Закондымылык чыла вере шукемеш, садлан шукыштын йӧратымашышт йӱкша.

¹³ Но мучаш марте чытыше утаралтеш.

¹⁴ Кугыжанышын тиде Поро Увержым тӱня мучко каласкалат, тудыжо чыла калыклан таныклымаш лиеш, вара мучаш толеш.

¹⁵ Тыгеракын, Даниил пророкын каласыме гае йырнык пустаҥмашым святой верыште ужмекыда – лудшо тек умыла –

¹⁶ Иудейыште улшо-влак тек курыкышко куржыт.

¹⁷ А кӧ леведыш ӱмбалне, тек шке пӧртшӧ гыч иктаж-мом налаш ок воло.

¹⁸ Кӧ пасушто, тек шкенжын вургемжым налаш мӧҥгеш ок пӧртыл.

¹⁹ Ойго лиеш тудо кечылаште мӱшкыран ӱдырамаш ден чызым пукшышо ава-влаклан!

²⁰ Тыланда телым але шуматкечын куржаш ынже логал манын, Юмым сӧрвалыза.

²¹ Тунам тугай кугу азап лиеш, могайже тӱня тӱҥалтыш гыч кызыт марте лийынжат огыл да огешат лий.

²² Тиде кече-влак огыт кӱчыкемдалт ыле гын, иктат утлен ок код ыле, но ойырен налме еҥ-влаклан кӧра тиде кече-влак кӱчыкемдыме лийыт.

²³ Тунам иктаж-кӧ тыланда ”Теве тыште Христос” але ”Тушто” манеш гын, ида ӱшане.

²⁴ Вет шояк христос ден шояк пророк-влак лектыт да, лиеш гын, ойырен налме-влакымат ондалаш манын, палдарыше кугу пале ден чудо-влакым ыштат.

²⁵ Теве Мый тыланда ончылгоч ойлышым.

²⁶ Тыгеже, тыланда ”Тудо ир мландыште” маныт гын, ида лек, ”Теве Тудо кӧргӧ пӧлемыште” маныт – ида ӱшане.

²⁷ Кузе волгенче эрвелне волгалтеш да касвелнат коеш, Айдеме Эргын толмыжат тугаяк лиеш.

²⁸ Кушто колышо кап лиеш, тушко курныж-влак погынат.

²⁹ Тиде пагытыште лийше азап деч вара тунамак кече пычкемышалтеш, тылзе волгалтарымыжым чарна, шӱдыр-влак кава гыч камвозыт да пылпомыш куат-влак вер гыч тарванат.

³⁰ Тунам каваште Айдеме Эргын палдарыше палыже коеш да, кавасе пыл ӱмбалне кугу куат да чап дене толшо Айдеме Эргым ужын, мландӱмбалсе чыла калык шорташ тӱҥалеш.

³¹ Тудо Суксыж-влакым кугу йӱкан пуч шергылтме годым колта, нунышт тӱнян ныл могыржо гыч, каван ик тӱржӧ гыч тӱҥалын вес тӱрышкыжӧ шумеш, Тудын ойырен налме еҥже-влакым погат.

³² Смоква пушеҥге деч тунемза. Кунам тудын укшлаже ылыжыт да лышташым колтат, тунам паледа: кеҥеж лишемеш.

³³ Тыштат тыгак. Кунам ойлымемын шукталтмыжым ужыда, палыза: тудо лишнак, омса воктенак.

³⁴ Тыланда чынак ойлем: чыла тиде лиймешке тиде тукым ок пыте.

³⁵ Кава ден мланде пытат, но Мыйын шомакем огеш пыте.

³⁶ Тиде кече да шагат кунам толын шуэш, нигӧ ок пале: пылпомышсо Суксо-влакат огыт пале, тидым ик Ачам гына пала.

³⁷ Кузе Нойын илыме кечылаштыже лийын, Айдеме Эрге толмо годымат тугак лиеш.

³⁸ Вӱд ташлыме деч ончыч Нойын ковчегыш шичме кечыже марте еҥ-влак кочкыныт, йӱыныт, ӱдырым налыныт, марлан лектыныт.

³⁹ Вӱд ташлымаш тӱҥалмешке да чылаштым пытарымешке, мо лийшашым умылен огытыл. Айдеме Эрге толмо годымат тыгак лиеш.

⁴⁰ Тунам пасушто кок еҥ лиеш, иктыже налалтеш, весыже кодеш.

⁴¹ Кок ӱдырамаш кидвакш дене йоҥышта, иктыже налалтеш, весыже кодеш.

⁴² Тыгеракын, шекланен шогыза, Господьдан толмо жапшым те огыда пале вет.

⁴³ Но тидым те паледа: могай йӱд орол годым вор толшашым пӧрт оза пала гын, ок мале да пӧртышкыжӧ кӱнчен пураш ок пу ыле.

⁴⁴ Тугеже теат ямде лийза, вет кунам огыда вучо, Айдеме Эрге тунам толеш.

⁴⁵ Моло тарзым вуйлаташ да нунылан шке жапыштыже кочкышым пуаш озан шогалтыме ӱшанле да ушан тарзыже кӧ лиеш?

⁴⁶ Толмекыже, тиде тарзын кӱлеш семын ыштымыжым оза ужеш гын, тарзыже пиалан.

⁴⁷ Тыланда чынак ойлем: уло погыжым ончаш тудым шогалта.

⁴⁸ А осал тарзе шӱмыштыжӧ ”Мыйын озам эше ок тол” шона

⁴⁹ да моло тарзым кыраш да йӱшӧ-влак дене пырля кочкаш-йӱаш тӱҥалеш гын,

⁵⁰ озаже вучыдымо кечын да палыдыме шагатыште толын лектеш.

⁵¹ Оза тудым покшеч руалын шелеш да сайын кояш тӧчышӧ-влакын ужшаш орлыкыштым ужыкта. Тушто шортмаш да пӱйым пурмаш лиеш.