Мф 23 - У Сугынь

23 ГЛАВА 1-36 Фарисей ден закон туныктышо-влаклан шижтарымаш. 37-39 Иерусалим верч ойгырымаш.

¹ Тунам Иисус калыклан да тунемшыж-влаклан ойлаш тӱҥалын:

² «Закон туныктышо ден фарисей-влак Моисейын лӱмжӧ дене ойлат.

³ Тыгеракын, мом нуно тыланда шукташ кӱштат, чыла шуктыза, но нунын семын ида ыште, вет нуно ойлат, а огыт ыште.

⁴ Закон туныктышо ден фарисей-влак неле, нумалаш йӧсӧ нумалтышым пидыт да еҥ-влакын вачӱмбакышт пыштат, а шкешт тудым парняшт денат ынешт тарвате.

⁵ Чыла ыштымыштым еҥ-влак ужышт манын веле ыштат. Шкаланышт Возымаш ойым пыштыме поснак кугу калтам, вургемысе пешак кужу йолвам налыт.

⁶ Пайрем годым эн пагалыме верым налаш да синагоглаште ончылно шинчаш йӧратат,

⁷ еҥ-влакын калык погынымо верлаште саламлымышт, ”Равви, равви” манын ойлымышт нунылан келша.

⁸ А тендам еҥ-влак равви манын ынышт лӱмдӧ, вет тендан Туныктышыда икте, тиде – Христос, теже чыланат изак-шоляк гае улыда.

⁹ Мландӱмбалне нигӧмат Ача манын ида лӱмдӧ. Тендан Ачада икте, Тудо пылпомышто.

¹⁰ Тендам еҥ-влак ”илыш корным ончыктышо” манын ынышт лӱмдӧ. Тендан илыш корным Ончыктышыда икте веле – Христос.

¹¹ Тек тендан кокла гыч эн кугужо тарзыда лиеш,

¹² вет кӧ шкенжым кӱшкӧ шында, волтымо лиеш, а кӧ шкенжым ӱлыкӧ шында, нӧлталтеш.

¹³ Ойго тыланда, закон туныктышо ден фарисей-влак, сайла кояш тӧчышӧ-влак! Пылпомыш Кугыжанышым айдемылан петыреда; шкежат тушко огыда пуро, пураш шонышыжымат огыда пурто.

¹⁴ Ойго тыланда, закон туныктышо ден фарисей-влак, сайла кояш тӧчышӧ-влак! Те тулык ӱдырамаш-влакын суртыштым йорлештареда да лӱмжылан гына кужу жап кумалыда. Тидлан тендам поснак пеҥгыде суд вуча.

¹⁵ Ойго тыланда, закон туныктышо ден фарисей-влак, сайла кояш тӧчышӧ-влак! Кеч иктым шкендан ӱшанымашкыда савыраш манын, теҥызымат, мландымат эртеда, а савырымекыда, тудым тамыкын эргыжым, шкендан деч кок пачаш ударакым, ыштеда.

¹⁶ Ойго тыланда, вӱден коштыктышо сокыр-влак! Те ойледа: ”Кӧ храм дене товатла, товатлымыже нимом ок шого, а кӧ храмысе шӧртньӧ дене товатла, тудо товатлымыжым шуктышаш”.

¹⁷ Ушдымо да сокыр-влак! Можо кугурак: шӧртньӧ але шӧртньым святитлыше храм?

¹⁸ Тыгак те ойледа: ”Кӧ жертвенник дене товатла, товатлымыже нимом ок шого, а кӧ жертвенникыште кийыше надыр дене товатла, тудо товатлымыжым шуктышаш”.

¹⁹ Ушдымо да сокыр-влак! Можо кугурак: надырже але тудым святитлыше жертвенникше?

²⁰ Тыгеже, жертвенник дене товатлыше тудын дене да жертвенникыште мо уло, чылаж денат товатла.

²¹ Храм дене товатлыше тудын дене да тушто Илыше дене товатла.

²² Пылпомыш дене товатлыше Юмын престолжо да тушто Шинчыше дене товатла.

²³ Ойго тыланда, закон туныктышо ден фарисей-влак, сайла кояш тӧчышӧ-влак! Те пӱртньыкын, укропын да каламбырын лектыш гыч луымшо ужашыжым Юмылан пуэда, а законысо эн кӱлешанжым: порын судитлымым, чаманымым, ӱшанле улмым ӧрдыжеш кодеда. Тидыжымат ышташ кӱлеш ыле, весыжымат ӧрдыжеш кодыман огыл.

²⁴ Вӱден коштыктышо сокыр-влак, те шыҥам шӱрен кодеда, а верблюдым нелыда!

²⁵ Ойго тыланда, закон туныктышо ден фарисей-влак, сайла кояш тӧчышӧ-влак! Те корка ден кӱмыжын тӱжвал могыржым эрыктеда, туге гынат кӧргышт агымаш да чын огыл денак темын.

²⁶ Сокыр фарисей! Корка ден кӱмыжын тӱжвал могырышт ару лийже манын, ондак кӧргӧ могырыштым эрыкте.

²⁷ Ойго тыланда, закон туныктышо ден фарисей-влак, сайла кояш тӧчышӧ-влак! Те ошемдыме тойымо вер гай улыда: тӱжвач ончымаште моторын койыт, а кӧргышт колышо-влакын лулегышт да тӱрлӧ йырнык дене темыныт.

²⁸ Тӱжвал могырым теат еҥ ончылно чын ыштышыла койыда, а чонда сайын кояш тӧчымӧ да закондымылык дене темын.

²⁹ Ойго тыланда, закон туныктышо ден фарисей-влак, сайла кояш тӧчышӧ-влак! Пророк-влаклан чапле шӱгарым ямдыледа, чын ыштыше-влакын шарныктыш кӱыштым сӧрастареда

³⁰ да ойледа: ”Ме ачана-влакын илымышт годым илена ыле гын, пророк-влакын вӱрыштым йоктарымаште нунын дене пырля огына лий ыле”.

³¹ Тыгеракын, шкендан ваштареш шке таныкледа: те пророкым пуштедыше-влакын эргышт улыда.

³² Ынде ачада-влакын ыштымыштым мучашыш шуктыза.

³³ Кишке-влак, шем кишкын шочшыж-влак! Титаканыш лукмо да тамыкыш колтымо деч кузе куржын утледа ыле?

³⁴ Мый тендан деке теве пророк-шамычым, ушан еҥ да туныктышо-влакым колтем, а те иктыштым пуштыда, пудален сакеда, весыштым синагоглаштыда сола дене кыраш да ола гыч олашке поктылаш тӱҥалыда.

³⁵ Тыгеракын, мландӱмбалне йоктарыме чыла титакдыме вӱр тендан ӱмбакыда возеш. Чын ыштыше Авельын вӱржӧ гыч тӱҥалын, храм ден жертвенник коклаш тендан пуштмо Захарийын, Варахийын эргыжын, вӱржӧ марте те чыла вӱр верч мутым кучеда.

³⁶ Тыланда чынак ойлем: тиде тукымлан чыла тидын верч мутым кучаш логалеш.

³⁷ Иерусалим, Иерусалим! Тый пророк-влакым пуштедет, тый декет колтымо-влакым кӱм кышкен пытарет. Кайык шке шулдыржо йымаке игыж-влакым погымо семын мыняр гана Мый тыйын шочшет-влакым погынем ыле, но те тореш лийында!

³⁸ А ынде тендан пӧртда яра кодеш.

³⁹ Тыланда ойлем: ”Господьын лӱмжӧ дене Толшо тек моктымо лиеш” манмешкыда, те Мыйым огыда уж».