Мф 22 - У Сугынь

22 ГЛАВА 1-14 Сӱан нерген туштен каласымаш. 15-22 Кесарьлан йозак. 23-33 Ылыжме нерген йодыш. 34-40 Эн кугу кӱштымаш. 41-46 Христос кӧн Эргыже?

¹ Иисус умбакыже туштен каласкален:

² «Пылпомыш Кугыжанышым шкенжын эргыжлан сӱан пайремым ыштыше кугыжа дене таҥастараш лиеш.

³ Сӱаныш ӱжмӧ-влакым погаш тудо шке тарзыж-влакым колтен, а уна-влакын толмышт шуын огыл.

⁴ Тудо адак вес тарзыж-влакым колтен, колтымыж годым кӱштен: ”Ӱжмӧ-влаклан каласыза: теве пайрем кочкышым ямдылен шуктымо, ӱшкыжымат, ӧрдыктарыме презымат шӱшкылмӧ, чыла ямде, сӱан пайремышке толза”.

⁵ Но ӱжмӧ-влак тидым шотыш налын огытыл. Иктышт шке пасушкыжо, а весышт торгаяш каеныт,

⁶ молышт кугыжан тарзыж-влакым кученыт, торжан койыныт да пуштыныт.

⁷ Тидын нерген колмеке, кугыжа моткоч шыдешкен, шке сарзыж-влакым колтен да пуштшо-влакым пытарен, нунын олаштым йӱлалтен.

⁸ Вара тарзыж-влаклан каласен: ”Сӱан пайрем ямде, но ӱжмӧ-влак йӧрдымӧ лийыныт.

⁹ Ынде корнывожлаш кайыза да кӧм муыда, чылаштымат сӱанышке ӱжса”.

¹⁰ Тарзе-влак уремышке лектыныт, кӧм гына муыныт, чылаштымат конденыт: осалжымат, порыжымат. Тыгеракын пайрем ӱстелтӧрыш калык тич темын.

¹¹ Уна-влакым ончаш пурымеке, кугыжа сӱан вургемым чийыдыме еҥым ужын

¹² да тудлан манын: ”Йолташ, кузе тый тышке сӱан вургем деч посна пуренат?” Тудыжо нимом пелештен огыл.

¹³ Тунам кугыжа тарзе-влаклан каласен: ”Кидшым-йолжым пидын, тудым налза да пычкемышыш луктын кудалтыза. Тушто шортмаш да пӱйым пурмаш лиеш.

¹⁴ Вет ӱжмӧ – шуко, ойырен налме – шагал”».

¹⁵ Тунам фарисей-влак каеныт да Иисусым кузе-гынат мутешыже кучаш манын каҥашеныт.

¹⁶ Нуно Тудын деке шкеныштын тунемшыштым да Ирод велке шогышо-влакым колтеныт. «Туныктышо! – ойленыт нуно. – Ме Тыйын чын улметым да Юмын корныжлан чын почеш туныктыметым палена. Тый еҥлан йӧраш тӧчымӧ нерген от шоно, Тыланет чылан иктӧр улыт.

¹⁷ Тыгеже мыланна каласе: Тый кузе шонет, кесарьлан йозакым тӱлаш лиеш але уке?»

¹⁸ Но, нунын чояланымыштым пален, Иисус каласен: «Сайла кояш тӧчышӧ-влак, молан те Мыйым тергеда?

¹⁹ Йозак тӱлымӧ оксадам Мыланем ончыктыза». Нуно Тудлан динарийым конденыт.

²⁰ Иисус йодын: «Кӧм тышан сӱретлыме? Кӧн тыште лӱмжӧ сералтын?»

²¹ Тудлан каласеныт: «Кесарьын». Тунам нунылан ойлен: «Тыгеже кесарьлан кесарьыным, а Юмылан Юмыным пуыза».

²² Тидым колын, нуно ӧрыныт да Иисусым коден каеныт.

²³ Колышо ылыж огеш кынел манын шотлышо саддукей-влак тудо кечын миеныт да Иисус деч йодыныт:

²⁴ «Туныктышо, Моисей каласен: ”Кӧ йочаж лийде кола гын, тудын ватыжым изаже але шольыжо марлан налшаш да тудын тукымжым шуйышаш”.

²⁵ Мемнан дене шым изак-шоляк лийын: икымшыже ӱдырым налын да колен, йочаже лийын огылат, ватыже шольыжлан кодын.

²⁶ Кокымшо денат, кумшо денат, чыла шымытышт денат тыгак лийын.

²⁷ Чылашт деч вара ӱдырамашат колен.

²⁸ Тыгеже, ылыжмеке, ӱдырамаш шымыт гыч кудыжын ватыже лиеш? Вет тудо чылаштынат ватышт лийын».

²⁹ Иисус нунылан вашештен: «Те Возымашымат, Юмын куатшымат огыда пале, сандене йомын коштыда.

³⁰ Ылыж кынелмеке, ӱдырымат огыт нал, марланат огыт лек, пылпомышто Юмын Суксыж-влак гай лийыт.

^31-32 Колымаш гыч ылыж кынелмаш нерген Юмын тыланда каласымыжым, ”Мый Авраамын Юмыжо, Исаакын Юмыжо, Иаковын Юмыжо улам” манмым, лудын огыдал мо? Юмо колышо-влакын Юмышт огыл, а илыше-влакын Юмышт!»

³³ Калык, тидым колмеке, Иисусын туныктымыжлан ӧрын шоген.

³⁴ Саддукей-влакын ойлымыштлан Иисус мучашым пыштен манмым колын, фарисей-влак пырля погыненыт.

³⁵ Нунын кокла гыч иктыже, закон туныктышо, Иисусым тергаш манын йодын:

³⁶ «Туныктышо, законышто могай кӱштымаш эн кугу?»

³⁷ Иисус тудлан каласен: «”Господь Юметым уло шӱмет, уло чонет, уло умылымашет дене йӧрате”.

³⁸ Тиде икымше да эн кугу кӱштымаш.

³⁹ Кокымшыжат тыгаяк кугу: ”Лишылетымат шкендым йӧратыме семынак йӧрате”.

⁴⁰ Мемнан пӱтынь законна ден пророк-влакын туныктымышт нине кок кӱштымашеш негызлалтыт».

⁴¹ Фарисей-влакын пырля лиймышт годым Иисус нунын деч йодын:

⁴² «Христос нерген те мом шонеда? Тудо кӧн Эргыже?» Тудлан ойленыт: «Давидын».

⁴³ Нунылан Иисус каласен: «А Шӱлыш кумылаҥдыме годым Давид Тудым молан вара Господь манеш? Давидше ойлен:

⁴⁴ ”Господь мыйын Господемлан каласен: Тыйын тушманет-влакым йол йымакет пыштымешкем, пурла велыштем шинче”.

⁴⁵ Тугеже, Давид Тудым Господь манеш гын, кузе Тудо Эргыже лийын кертеш?»

⁴⁶ Иисуслан нигӧат ик мутымат вашештен кертын огыл, тиде кече деч вара Тудын деч нигӧ нимом йодаш тоштын огыл.