Мф 20 - У Сугынь

20 ГЛАВА 1-16 Виноград аҥаште ыштыше-влак нерген туштен ойлымаш. 17-19 Иисус шке колымыж да ылыжмыж нерген кумшо гана каласкала. 20-28 Иаков ден Иоаннын йодмышт. 29-34 Кок сокырым паремдымаш.

¹ Пылпомыш Кугыжанышым сурт оза дене таҥастараш лиеш. Эрдене эрак тудо пашазе-влакым шке виноград аҥашкыже тарлаш лектын.

² Кечылан ик динарий дене тӱлаш мутланен келшымеке, пашазе-влакым виноград аҥаш колтен.

³ Кумшо шагат годым тудо адак уремыш лектын да пазарыште паша деч посна шогылтшо еҥ-влакым ужын.

⁴ Нунылан ойлен: ”Теат мыйын виноград аҥашкем кайыза, вочшаш пашадарым тыландат тӱлем”. Нунат каеныт.

⁵ Кудымшо шагат, индешымше шагат жапыштат оза угыч лектын да тыгак ыштен.

⁶ Латикымше шагат жапыште адак уремыш лектын да яра шогышо вес еҥ-влакым ужын. ”Те молан тыге кечыгут паша деч посна шогеда?” – нунын деч йодын.

⁷ ”Мемнам нигӧ тарлен огыл”, – нунышт каласеныт. ”Теат мыйын виноград аҥашкем кайыза, да вочшаш пашадарым налыда,” – нунылан манын.

⁸ Кас шумеке, виноград аҥан озаже паша виктарышылан каласен: ”Пашаеҥ-влакым ӱж, пытартышлан тарлыме-влак деч тӱҥалын, эн ондак тарлыме марте пашадарым тӱлӧ”.

⁹ Латикымше шагат жапыште тарлыме-влак толыныт да ик динарий гыч налыныт.

¹⁰ Эн ондак тарлыме-влакше миеныт да оксам шукырак пуат шоненыт, но нунат динарий гычак налыныт.

¹¹ Оксам налмекышт, сурт озалан ӧпкелен ойлаш тӱҥалыныт:

¹² ”Пытартышлан толшо-влак ик шагат веле пашам ыштеныт, а ме кечыгут пелтыше кече йымалне пашам ыштенна, но тый нунылан мемнан висак тӱленат!”

¹³ Нунын кокла гыч иктыжлан оза каласен: ”Йолташ, мый тыйым ондален омыл. Але тый ик динарийлан пашам ышташ келшен отыл?

¹⁴ Шкендыным нал да кай. Кунар тылат пуэнам, мучаште тарлыме саде еҥланат тунарак тӱлынем.

¹⁵ Мыланем шке оксам дене шонымем семын ышташ ок лий мо? Але поро улмемлан кӧра кӧранет?”

¹⁶ Тыге шеҥгелнысе-влак ончылно лийыт, а ончылнысо-влак – шеҥгелне. Ӱжмӧ – шуко, ойырен налме – шагал».

¹⁷ Иерусалим деке тайыл ваштареш кӱзымӧ годым корнышто Иисус латкок тунемшыжым ӧрдыжкӧ ӱжын да нунылан ойлен:

¹⁸ «Теве ме Иерусалимыш миен шуына. Айдеме Эрге архиерей ден закон туныктышо-влаклан кучен пуалтеш. Нуно Тудым пушташ пунчалыт

¹⁹ да чын Юмым палыдыме калыкын кидыш мыскылаш, сола дене кыраш да ыресеш пудален сакаш пуат, но кумшо кечын Тудо ылыж кынелеш».

²⁰ Тунам Иисус деке Зеведейын эргыж-влакын аваже эргыж-влак дене пырля толын да, кумык возын, Тудын деч ала-мом йодын.

²¹ Иисус тудлан каласен: «Мом йоднет?» Ӱдырамаш ойлен: «Кугыжаныштет нине кок эргым гыч иктыжым пурла могырышкет, весыжым шола могырышкет шындаш мутым пу».

²² Иисус вашештен: «Те мом йодмыдам огыда пале. Мыйын йӱшаш чаше гыч йӱын але Мыйын тынеш пурымем семын тынеш пурен кертыда мо?» «Кертына», – вашештеныт.

²³ Иисус нунылан ойлен: «Мыйын йӱшаш чаше гыч теат йӱаш тӱҥалыда, Мыйын тынеш пурымем семын теат тынеш пуреда, но воктекем пурла але шола велыш шындаш Мый дечем огыл, а Ачам нине верым кӧлан ямдылен, нунын лийыт».

²⁴ Моло лу тунемшыже, тиде мутланыме нерген колмеке, кок изак-шоляклан чот сыреныт.

²⁵ Иисус нуным Шкеж деке ӱжын да каласен: «Калык-влакын вуйлатышышт нунын дене озаланат, да виянышт калык-влакым кид йымалнышт кучат. Те тидым паледа.

²⁶ Но тендан коклаштыда тек тыге ок лий. Тендан коклаште кӧ кугу лийнеже, тудо тек тарзыда лиеш;

²⁷ тендан кокла гыч кӧ ончылно лийнеже, тек тыланда кул лиеш.

²⁸ Айдеме Эргат Шкаланже тарзыланыкташ огыл, а тарзе лияш да, шуко айдемым тӱлен налаш манын, шке чонжым пуаш толын».

²⁹ Иерихон гыч лекмышт годым Иисус почеш шуко калык ошкылын.

³⁰ Теве корно воктене шинчыше кок сокыр еҥ, воктечше Иисус эртыме нерген колмеке, кычкыраш тӱҥалын: «Господь, Давидын Эргыже, мемнам серлаге!»

³¹ Калык нунылан шып лияш кӱштен, но нуно чотрак веле кычкыраш тӱҥалыныт: «Господь, Давидын Эргыже, мемнам серлаге!»

³² Иисус шогалын, нуным Шкеж деке ӱжын да каласен: «Те Мый дечем мом ыштымым вучеда?»

³³ «Господь, мемнан шинчана почылтшо ыле», – нуно ойленыт.

³⁴ Иисус нуным чаманен, шинчаштым тӱкалтен, шинчашт тунамак ужаш тӱҥалын, да нине еҥ-влак Иисус почеш каеныт.