Мф 19 - У Сугынь

19 ГЛАВА 1-12 Вате-марий ойырлымо нерген. 13-15 Иисус йоча-влакым благословитла. 16-30 Поян ден Иисус.

¹ Нине шомакым ойлен пытарымеке, Иисус Галилей гыч лектын да Иудей кундемын Иордан эҥер вес могырысо ужашышкыже толын.

² Тудын почеш шуко калык миен, да Иисус нуным тушто паремден.

³ Тудын деке фарисей-влак лишемыныт да терген ойленыт: «Айдемылан кеч-могай амал денат шке ватыжым ойырен колташ лиеш мо?»

⁴ Тудо нунылан вашештен: «Пӱрышӧ тӱҥалтыштак нуным пӧръеҥ ден ӱдырамашым ыштен. Тыге возымым лудын огыдал мо?»

⁵ Вара каласен: «Сандене пӧръеҥ ачаж ден аважым кода, шке ватыж дене ушна, да нуно коктын ик кап да чон лийыт.

⁶ Тыгеракын, нуно ынде кокыт огыл, а икте улыт. Мом Юмо ушен, айдеме ынже ойыро».

⁷ Нуно Тудлан ойленыт: «Кузе вара ойырымо нерген кагазым пуаш да вате деч ойырлаш лийме нерген Моисей законым коден?»

⁸ Иисус нунылан ойлен: «Тендан пешкыде шӱмланда кӧра Моисей тыланда ватым ойырен колташ эрыкым пуэн, а тӱҥалтыште тыге лийын огыл.

⁹ Мый тыланда ойлем: кӧ яжарланыме титак деч посна шке ватыжым ойырен колта да весым марлан налеш, тудо яжарлана. Ойырен колтымым марлан налшат яжарлана».

¹⁰ Тунемшыж-влак Иисуслан ойленыт: «Айдеме ватыж дене шкенжым тыге кучышаш гын, ӱдырым налманат огыл».

¹¹ Тудыжо нунылан каласен: «Тыгай ойым чылан огыл илышыш пуртен кертыт. Кӧлан тыге пӱралтын, тудо веле кертеш.

¹² Южышт кап шот дене ӱдырым налын кертдымак шочыныт, весыштым ӱдыр налаш йӧрдымым еҥ-влак ыштеныт, а кумшышт Юмын Кугыжанышлан кӧра шкеныштым мужыраҥ кертдымым ыштеныт. Кӧ тыгай ойым илышыш пуртен кертеш гын, пуртыжо».

¹³ Йоча-влак ӱмбаке кидым пыштыже да нунын верч кумалже манын, Иисус деке икшыве-влакым конденыт. Тунемшыж-влак нуным чареныт.

¹⁴ Но Иисус каласен: «Йоча-влакым пуртыза, Мый декем толаш нунылан ида чаре, вет Пылпомыш Кугыжаныш – нунын гай еҥ-влакын».

¹⁵ Вара йоча-влак ӱмбаке кидым пыштенат, тушечын каен.

¹⁶ Теве икте толын да Иисуслан каласен: «Поро Туныктышо! Курымашлык илышым налаш манын, мый могай поро пашам ыштышаш улам?»

¹⁷ Иисус тудлан ойлен: «Молан тый Мыйым поро манат? Юмо деч моло нигӧ поро огыл. Тый илышыш пурынет гын, кӱштымым шукто».

¹⁸ «Могайым?» – йодын. Иисус каласен: «”Ит пушт”, ”Ит яжарлане”, ”Ит шолышт”, ”Шойыштын, еҥ ӱмбаке таныклен ит ойло”,

¹⁹ ”Ача-аватым пагале”, ”Лишылетымат шкендым йӧратыме семынак йӧрате”».

²⁰ Самырык еҥ вашештен: «Чыла тидым мый самырык годсекак шуктен шогем. Эше мо мыланем огеш сите?»

²¹ Иисус каласен: «Тичмашлыкыш шунет гын, мий, мо тыйын уло, чыла ужале да оксажым йорло-влаклан пуэде. Тунам пылпомышто тыйын поянлыкет лиеш. Вара Мый декем тол да почешем кае».

²² Тыгай шомакым колмеке, еҥ ойганен кораҥын. Тудо моткоч поян улмаш.

²³ А Иисус тунемшыж-влаклан каласен: «Тыланда чынак ойлем: поян еҥлан Пылпомыш Кугыжанышке пураш неле.

²⁴ Адак тыланда ойлем: верблюдлан имышу вошт лекташ куштылго огыл, а поянлан Юмын Кугыжанышыш пураш эшеат нелырак».

²⁵ Тунемшыж-влак, тидым колмеке, чот ӧрын каласеныт: «Тугеже кӧ утаралт кертеш?»

²⁶ А Иисус нунын ӱмбаке ончалын да ойлен: «Айдеме тидым ыштен ок керт, но Юмо чылажымат кертеш».

²⁷ Тунам Петр вашештен: «Теве ме чыла коденна да Тыйын почешет каенна. Тидлан мыланна мо лиеш?»

²⁸ А Иисус нунылан каласен: «Тыланда чынак ойлем: кунам у саман тӱҥалеш да Айдеме Эрге чапланыше престолышкыжо шинчеш, тунам теат, почешем кайыше-влак, Израильын латкок тукымжым судитлаш латкок престолыш шинчыда.

²⁹ Кӧ пӧртым, иза-шольым, ака-шӱжарым, ача-авам але ватым, але икшыве-влакым, але мландым Мыйын лӱмем верч кода, шӱдӧ пачаш шуко налеш, да тудлан курымашлык илыш пуалтеш.

³⁰ А ончылсо-влак шукынжо шеҥгелне да шеҥгелсе-влак шукынжо ончылно лийыт.