Мф 18 - У Сугынь

18 ГЛАВА 1-11 Пылпомыш Кугыжаныште эн кугу. 12-14 Йомшо шорык нерген туштен ойлымаш. 15-20 Языкым ыштыше йолташ. 21-35 Титакым кудалташ тореш лийше тарзе нерген туштен ойлымаш.

¹ Изиш варарак Иисус деке тунемшыж-влак лишемыныт да каласеныт: «Пылпомыш Кугыжаныште кӧ эн кугу?»

² Иисус йочам ӱжын, тудым нунын коклашке шогалтен

³ да каласен: «Тыланда чынак ойлем: те огыда вашталт да йоча гай огыда лий гын, Пылпомыш Кугыжанышыш пурен огыда керт.

⁴ Тыгеже, кӧ шкенжым тиде йоча гай изилан шотла, тудо Пылпомыш Кугыжаныште эн кугу,

⁵ а кӧ Мыйын лӱмемлан кӧра ик тыгай икшывым йӧратен налеш, тудо Мыйымат йӧратен налеш.

⁶ Но Мыланем ӱшаныше тыгай изирак-влак кокла гыч иктыжым чын корно гыч кӧ кораҥда, тудын шӱйышкыжӧ вакшкӱм сакен, теҥыз пундашке пуртен колтат гын, тудлан сайрак лиеш ыле.

⁷ Алгаштарымаш шукылан кӧра тӱнялан ойго! Алгаштарымаш толде огеш керт, но кӧн гоч толеш, тудо еҥлан ойго.

⁸ Тыйым кидет але йолет алгаштарынеже гын, тудым руал ойыро да шке дечет ӧрдыжкӧ кудалте: курымаш тулыш кок кидан але кок йолан кудалтыме лиймешке, илышыш чолак але окшак лийын пураш тыланет сайрак.

⁹ Шинчат тыйым алгаштарынеже гын, тудым луктын шу: тулан тамыкыш кок шинча ончен кудалтыме лиймешке, илышыш пел шинчан пураш тыланет сайрак.

¹⁰ Шекланыза, нине изирак-влак кокла гыч чыланыштымат пагалыза. Тыланда ойлем: пылпомышто нунын Суксышт Пылпомышсо Ачамын чурийжым эреак ужын шогат.

¹¹ Айдеме Эрге йомшо-влакым кычал муаш да утараш толын.

¹² Те кузе шонеда? Иктаж-кӧн шӱдӧ шорыкшо уло да иктыже йомеш гын, индешле индешыжым курыкеш коден, йомшыжым кычалаш ок кай мо?

¹³ Тыланда чынак ойлем: кычал муэш гын, йомдымо индешле индеш шорыкшылан куаныме деч утларак тудлан куана.

¹⁴ Тыгак тендан Пылпомышсо Ачаданат нине изирак-влак кокла гыч иктыжымат йомдарымыже ок шу.

¹⁵ Лишылет тыйын ваштареш языкым ыштен гын, титакше нерген тудын дене посна мутлане. Тыйым колыштеш гын, лишылетым пӧртылтенат.

¹⁶ А огеш колышт гын, пырля эше ик еҥым але кокытым нал. ”Тек кок але кум таныклышын ойлымышт дене чыла титаклыме мут пеҥгыдемдыме лиеш”.

¹⁷ Нунымат огеш колышт гын, черке погынымаш ончылно каласе. Черке погынымаште ойлымымат шотыш ок нал гын, тек тудо тыланет чын Юмым палыдыме але йозак погышо гай лиеш.

¹⁸ Тыланда чынак ойлем: мом те мландӱмбалне пидыда, тудак пылпомыштат пидме лиеш; мом мландӱмбалне рудеда, пылпомыштат рудымо лиеш.

¹⁹ Тыгак тыланда чынак ойлем: тендан кокла гыч кокытшо мланде ӱмбалне иктаж-мо нерген сӧрвалаш мутланен келша гын, Пылпомышсо Ачам мом йодмыштым чылажымат шукта,

²⁰ вет кушто Мыйын лӱмемлан кӧра коктын але кумытын погынат, тушто Мый нунын коклаште лиям».

²¹ Тунам Иисус деке Петр миен да каласен: «Господь! Мыйын ваштареш языкым ыштылше лишылемын титакшым мыняр гана кудалтышаш улам? Шым гана марте мо?»

²² Иисус тудлан ойлен: «Шым гана марте манын, тылат ом ойло, а шым гана шымле пачаш марте.

²³ Пылпомыш Кугыжанышым шке тарзыж-влакын оксам кучылтмыштым тергаш шонышо кугыжа дене таҥастараш лиеш.

²⁴ Тергаш тӱҥалмекыже, тудын деке лу тӱжем талант парыман ик еҥым конденыт.

²⁵ Парымжым пӧртылтен кертын огылат, кугыжа тудым шкенжымат, ватыжымат, йочаж-влакымат, уло погыжымат ужалаш да парымжым пӧртылташ шӱден.

²⁶ Тунам тарзе тудын ончылан кумык возын сӧрвален: ”Оза, мыйым чамане, чыталте, чыла тӱлем”.

²⁷ Кугыжа тиде тарзым чаманен, тудым эрыкыш колтен да уло парымжым кудалтен.

²⁸ Тиде тарзе, уремыш лекмекыже, вес тарзым вашлийын. Тудыжо тудлан шӱдӧ динарийым пуышаш улмаш. Тиде еҥым кучен да пикташ тӱҥалын. ”Мыланем парыметым пӧртылтӧ!” – ойлен.

²⁹ Тунам йолташыже, тудын ончылан кумык возын, сӧрвалаш тӱҥалын: ”Мыйым чамане, чыталте, мый чыла тӱлем”.

³⁰ Но тудо келшен огыл, каен да, парымым тӱлымешкыже, казаматыш петырыктен шынден.

³¹ Мо лиймым вес тарзе-влак ужыныт да пешак ойганеныт, нуно кугыжа деке каеныт да чыла каласкаленыт.

³² Тунам кугыжа тудым ӱжыктен да ойлен: ”Осал тарзе! Мыйым сӧрвалышыч да чыла пуышашетым кудалтышым.

³³ Тугеже, тыйым чаманымем семынак шке йолташетым чаманышаш отыл ыле мо?”

³⁴ Чот шыдешкыше кугыжа, парымжым тӱлен пытарымешке, тудым орландарыше-влак кидыш пуэн.

³⁵ Тендан кокла гыч кажныже лишылже-влакын титакыштым уло кумылын ок кудалте гын, Пылпомышсо Ачамат тендан дене тыгак ышта».