Мф 16 - У Сугынь

16 ГЛАВА 1-4 Кава гыч палдарыше палым ончыкташ йодмаш. 5-12 Фарисей ден саддукей-влакын руышт. 13-20 Петр Иисусым Христос манеш. 21-28 Иисус Шкенжын колымыж да ылыжмыж нерген каласкала.

¹ Иисус деке саддукей ден фарисей-влак толыныт. Тудым тергаш манын, палдарыше палым ончыкташ йодыныт.

² Иисус нунылан вашештен: «Кастене те ойледа: ”Кава йошкарге – сай игече лиеш”.

³ А эрдене эрак те каласеда: ”Кава шемалге-йошкарге – таче начар игече лиеш”. Сайла кояш тӧчышӧ-влак! Кава тӱсым ончен, могай игече лийшашым паледа, а жапын палыж-влакым умылтарен огыда мошто.

⁴ Юмо деч кораҥше да осал тукым палдарыше палым кычалеш, но Иона пророкын палыж деч моло тудлан ок пуалт». Иисус нуным коден каен.

⁵ Вес могырыш вончымеке, тунемшыж-влак пеленышт киндым налаш мондымыштым пален налыныт.

⁶ Иисус нунылан каласен: «Эскерыза, фарисей ден саддукей-влакын руышт деч шекланыза».

⁷ А нуно шке коклаштышт ойленыт: «Ме киндым налын огынал».

⁸ Тидым Иисус пален да нунылан каласен: «Те, шагал ӱшаныше-влак! Киндым пеленна налын огынал манын, молан ойледа?

⁹ Алят огыда умыло? Вич тӱжем еҥлан вич сукыр кинде ситыме нерген ала огыда шарне? Утен кодшо киндым мыняр комдым погенда?

¹⁰ Але ныл тӱжем еҥлан шым сукыр кинде ситымым огыда шарне? Утен кодшо киндым мыняр комдым погенда?

¹¹ Мый тыланда кинде нерген огыл ойлышым. Кузе те тидым огыда умыло? Фарисей ден саддукей-влакын руышт деч шекланыза».

¹² Тунам нуно умыленыт: Иисус киндыш пыштыме ру деч огыл, а фарисей ден саддукей-влакын туныктымышт деч шекланаш кӱштен.

¹³ Филипп-Кесарий кундемышке толмеке, Иисус тунемшыж-влак деч йодын: «Мыйым, Айдеме Эргым, еҥ-влак кӧлан шотлат?»

¹⁴ Нуно каласеныт: «Иктышт – Тынеш Пуртышо Иоаннлан, весышт – Илиялан, а южышт – Иеремий пророклан але моло пророк-влак кокла гыч иктыжлан».

¹⁵ «А те кузе шотледа, Мый кӧ улам?» – йодын Иисус.

¹⁶ Симон-Петр вашештен: «Тый Христос, илыше Юмын Эргыже улат».

¹⁷ Иисус тудлан вашештен: «Ионан Симон эргыже, тый пиалан улат: тыланет тидым айдеме огыл, а Пылпомышсо Ачам почын.

¹⁸ Мый тылат ойлем: тый Петр, Кӱ, улат. Тиде Кӱ ӱмбалан Мый Шкемын Черкем шындем, тамыкын капкаже тудым ок сеҥе.

¹⁹ Мый тыланет Пылпомыш Кугыжанышын сравочшо-влакым пуэм. Мом тый мланде ӱмбалне пидат, пылпомыштат пидме лиеш, мом мланде ӱмбалне рудет, пылпомыштат рудымо лиеш».

²⁰ Тунам Иисус, Шкенжын Иисус Христос улмыж нерген нигӧлан каласкалаш огыл манын, тунемшыж-влаклан чарен.

²¹ Тудо жап гыч Иисус Шкеж дене мо лийшаш нерген тунемшыж-влаклан ойлаш тӱҥалын: тудо Иерусалимыш кая да тушто калык кугуракмыт, архиерей ден закон туныктышо-влаклан кӧра шуко орлыкым ужеш, Тудым пуштыт да кумшо кечын ылыжеш.

²² Петр Тудым ӧрдыжкӧ ӱжын наҥгаен да ваштареш ойлаш тӱҥалын: «Юмо аралыже! Господь, Тый денет тиде ынже лий».

²³ Тудыжо, Петр деке савырнен, каласен: «Кораҥ Мый дечем, сатана! Тый Мыйым алгаштарынет, тыйын шонымет айдемын, а Юмын огыл».

²⁴ Вара Иисус тунемшыж-влаклан ойлен: «Кӧ почешем кайынеже гын, шке эрыкшым кудалтыже, шке ыресшым налже да почешем ошкылжо.

²⁵ Вет кӧ шке чонжым утарынеже, тудо йомдара, а кӧ чонжым Мыйын верч йомдара, тудо чонжым муэш.

²⁶ Айдеме уло тӱням кидышкыже налеш, а чонжылан зияным конда гын, тудлан могай пайда? Айдеме, мом пуэн, шке чонжым сулен налеш?

²⁷ Вет Айдеме Эрге Ачажын чапше дене Суксыж-влак дене пырля толеш да кажнылан пашаж семын пуа.

²⁸ Тыланда чынак каласем: тыште шогышо кокла гыч южышт шке Кугыжанышыж дене толшо Айдеме Эргым ужмешке огыт коло».