Мф 14 - У Сугынь

14 ГЛАВА 1-12 Тынеш Пуртышо Иоаннын колымыжо. 13-21 Вич тӱжем еҥым пукшымаш. 22-33 Иисус вӱд ӱмбач кая. 34-36 Геннисаретыште черле-влакым паремдымаш.

¹ Тудо жапыште Иисус нерген Ирод тетрарх колын.

² Тудо тарзыж-влаклан каласен: «Тиде Тынеш Пуртышо Иоанн. Тудо колымаш гыч ылыж кынелын, сандене чудым ыштыше вийже уло».

³ Вет Ирод шкенжын Филипп изажын Иродиада ватыж верч Иоанным кучыктен да, шинчырлен, казаматыш шындыктен улмаш.

⁴ Иоанн тудлан ойлен: «Тыланет Иродиада дене илаш ок лий».

⁵ Ирод Иоанным пуштнеже улмаш, но калык деч лӱдын, вет Иоанным пророклан шотленыт.

⁶ Иродын шочмо кечыжым палемдыме годым Иродиадан ӱдыржӧ уна-влак ончылно куштен да Иродлан пешак келшен,

⁷ сандене ӱдыр шкаланже мом йодеш, тудым пуаш Ирод товатлен сӧрен.

⁸ Аважын кӱштымыж почеш ӱдыр ойлен: «Тынеш Пуртышо Иоаннын вуйжым мыланем кызытак кӱмыжыш пыштен пу».

⁹ Кугыжа ойганен, но уна-влак ончылно товатленат, ӱдырын йодымыжым шукташ кӱштен

¹⁰ да казаматышке Иоаннын вуйжым руал ойыраш колтен.

¹¹ Тудын вуйжым кӱмыжыш пыштен конденыт да ӱдырлан пуэныт, а тудыжо аважлан наҥгаен.

¹² Иоаннын тунемшыж-влак толыныт, капшым налыныт да тоеныт, вара каеныт да Иисуслан увертареныт.

¹³ Тидын нерген колмеке, Иисус пушыш шинчын да тымык верыш шкетын каен. Калык тидын нерген пален налын, олала гыч йолын почешыже миен.

¹⁴ Серыш лекмеке, пеш шуко калыкым ужынат, Иисус еҥ-влакым чаманен да нунын кокласе черле-влакым паремден.

¹⁵ Кас шумеке, тунемшыж-влак Тудын деке миеныт да ойленыт: «Тиде – калык илыдыме вер, жап шуко эртен. Еҥ-влак, яллаш каен, шкаланышт кочкышым налын кертышт манын, нуным колто».

¹⁶ Но Иисус каласен: «Кайымышт ок кӱл, те нунылан кочкаш пуыза».

¹⁷ Тунемшыж-влак Тудлан ойленыт: «Мемнан тыште вич сукыр кинде да кок кол веле».

¹⁸ Иисус каласен: «Тидым Мый декем кондыза».

¹⁹ Калыклан шудо ӱмбаке шинчаш кӱштен, вич сукыр кинде ден кок колым налын да, пылпомышко ончалын, благословитлен. Вара, киндым тодылын, тунемшыж-влаклан пуэн, а тунемшыж-влак – калыклан.

²⁰ Чылан теммешке кочкыныт, да кодшо катыш дене латкок комдым теменыт.

²¹ Йоча ден ӱдырамашым шотлаш огыл гын, чылаже вич тӱжем наре еҥ кочкын.

²² Тунамак Иисус тунемшыж-влаклан пушыш шинчаш, Тудын деч ондак вес серыш вончаш кӱштен, а Шкеже калыкым ужаташ кодын.

²³ Калыкым ужатен колтымеке, Иисус шкет кумалаш курыкыш кӱзен. Кастене тушто шкет лийын.

²⁴ А пуш ынде теҥыз покшелне улмаш, ваштареш мардеж лийынат, тудым виян толкын кырен.

²⁵ Йӱдым, нылымше орол годым, Иисус тунемшыж-влак деке теҥыз ӱмбач ошкеден миен.

²⁶ Тудын теҥыз ӱмбач ошкеден толмыжым ужын, нуно ӧрткеныт да ойленыт: «Тиде шинчаш койшо!» Лӱдмышт дене кычкыреныт.

²⁷ Но Иисус тунамак нунылан каласен: «Чулым лийза, ида лӱд. Тиде Мый улам».

²⁸ Петр Тудлан вашештен: «Господь, тиде Тый улат гын, мылам Тый декет вӱд ӱмбач ошкеден мияш шӱдӧ».

²⁹ «Тол», – каласен Иисус. Иисус деке каяш манын, Петр пуш гыч лектын да вӱд ӱмбач ошкеден каяш тӱҥалын,

³⁰ но виян мардеж пуымым шижын да лӱдынат, пурен каяш тӱҥалын да кычкырен: «Господь, мыйым утаре!»

³¹ Иисус тунамак кидшым шуялтен, Петрым руалтен кучен да ойлен: «Шагал ӱшаныше! Молан тый кокыте шонаш тӱҥальыч?»

³² Пушыш шичмекышт, мардеж чарнен.

³³ Пушышто шинчыше-влак лишемыныт, Иисус ончылно вуйым савеныт да Тудлан каласеныт: «Тый чынжымак Юмын Эрге улат».

³⁴ Теҥызым вончымеке, Геннисарет кундемыш толыныт.

³⁵ Тудо верыште илыше-влак, Иисусым палымеке, чыла лишыл верлашке уверым колтеныт, да Тудын деке чыла черле-влакым конденыт.

³⁶ Нуно Иисусын вургем урвалтыжым гына тӱкалташ йодыныт, да кӧ тӱкнен, паремын.