Мф 13 - У Сугынь

13 ГЛАВА 1-23 Ӱдышӧ нерген туштен каласымаш. 24-30 Шӱкшудо нерген туштен каласымаш. 31-35 Горчице нӧшмӧ да ру нерген туштен каласымаш. 36-43 Шӱкшудо нерген туштен каласымым умылтарымаш. 44-50 Тойымо поянлык, ракывотшер пырче да вапш нерген туштен каласымаш. 51-52 У да тошто поянлык. 53-58 Иисус Назаретыште.

¹ Тиде кечынак Иисус пӧрт гыч лектын да теҥыз воктеке миен шинчын.

² Тудын деке шуко калык погыненат, Иисус пушыш шинчын, а уло калык серыште шоген.

³ Туштен каласыме гоч Тудо нунылан шукым ойлен. «Теве ӱдышӧ ӱдаш лектын, – ойлен.

⁴ – Ӱдымыж годым южо пырчыже корно воктеке возын. Кайык-влак чоҥештен толыныт да нуным чӱҥген пытареныт.

⁵ Весышт кӱан да шагал рокан верыш возыныт, да рок келге огыл улмылан кӧра нуно пеш вашке шытен лектыныт.

⁶ Кече лекмеке, озым лывыжген, вожшо укелан кӧра кошкен.

⁷ Южо пырчыже шӱкшудо коклаш возын. Шӱкшудо кушкын, озымым тӱрыс пызырен.

⁸ А южо пырче сай мландыш возын да лектышым пуэн: иктыже шӱдӧ пачаш, весыже кудло, южышт кумло пачаш.

⁹ Кӧн колышташ пылышыже уло, тек колеш».

¹⁰ Тунемшыж-влак Иисус деке миеныт да йодыныт: «Молан нунылан туштен ойлет?»

¹¹ Иисус вашештен: «Пылпомыш Кугыжанышын тайне-влакшым умылаш тыланда ӱшанен пуымо, а нунылан тиде пуалтын огыл.

¹² Вет кӧн уло, тудлан пуалтеш да тудын лыҥ лиеш, а кӧн уке, тудын мо улыжат налалтеш.

¹³ Нуно ончат гынат, огыт уж, колыштыт гынат, огыт кол, огыт умыло, садлан нунылан туштен каласкалем.

¹⁴ Исаиян пророкла ойлымыжо нунылан шукталтеш, тудо ойлен: ”Пылыш дене колыштыда, но огыда умыло, шинча дене ончеда, но огыда уж.

¹⁵ Тиде калыкын шӱмжӧ пешкыдемын, пылышышт дене пыкше колыт, шинчаштым куменыт. Сандене нуно шинчашт дене огыт уж, пылышышт дене огыт кол, шӱмышт дене огыт умыло, Мыланем нуным паремдаш манын, Мый декем огыт савырне”.

¹⁶ А тендан шинчада ужын кертмыж дене, пылышда колын кертмыж дене пиалан улыт.

¹⁷ Тыланда чынак ойлем: шуко пророк ден чын ыштыше тендан ужмыдам ужнешт ыле, но ужын огытыл, тендан колмыдам колнешт ыле, но колын огытыл.

¹⁸ Тыгеракын, ӱдышӧ нерген туштен каласымем мом ончыкта – колыштса:

¹⁹ Пылпомыш Кугыжаныш нерген шомакым колмеке, айдеме тудым ок умыло гын, осал толешат, шӱмешыже ӱдымым налын кая. Корно воктен ӱдымӧ пырче теве кӧм ончыкта.

²⁰ Кӱан рокеш ӱдымӧ пырчыже шомакым колшо да куанымыж дене вигак шӱмышкыжӧ пыштыше айдемым ончыкта.

²¹ Вожшо укеат, тыгай айдеме шуко жап огеш чыте. Шомаклан кӧра нелылык але поктылмаш толмеке, тудо вигак ӧрдыжкӧ кораҥеш.

²² Шӱкшудо коклаш ӱдымӧ пырчыже – тиде Юмын шомакым колшо айдеме, но тиде илыш верч тургыжланымаш да поянлыкым йӧратымаш саде шомакым пызыралыт, да тудо саскадыме лиеш.

²³ Сай мландыш ӱдымӧ пырче шомакым колыштшо да умылышо еҥ лиеш. Тыгай-влак саскам пуат: иктыже шӱдӧ пачаш, весыже кудло, южышт кумло пачаш».

²⁴ Вес гана калыклан Иисус тыге туштен каласен: «Пылпомыш Кугыжанышым шке пасуэшыже сай урлыкашым ӱдышӧ еҥ дене таҥастараш лиеш.

²⁵ Еҥ-влак малыме годым тудын тушманже толын да шыдаҥ коклашке шӱкшудым ӱден коден.

²⁶ Кунам озым лектын, парчам колтен, тунам шӱкшудат кояш тӱҥалын.

²⁷ Тарзе-влак оза деке толыныт да каласеныт: ”Оза, тый пасуэшет сай урлыкашым ӱден отыл мо? Шӱкшудо тушто кушеч лектын?”

²⁸ ”Тидым тушман ыштен”, – вашештен оза. А тарзыж-влак тудлан ойленыт: ”Ала ме, тушко миен, сомылен кышкена?”

²⁹ Но тудо каласен: ”Уке, шӱкшудым сомылымыда годым пырля шыдаҥымат кӱрын кертыда.

³⁰ Тӱредаш тӱҥалмешке тидыжымат, тудыжымат пырля кушкаш кодыза. Тунам тӱредше-влаклан кӱштем: ’Эн ондак шӱкшудым поген налза да, йӱлалташ манын, кылташ пидса, а шыдаҥым клатышкем оптыза’”.»

³¹ Адак нунылан туштен каласкален: «Пылпомыш Кугыжаныш – айдемын шке пасуэшыже ӱдымӧ горчицын нӧшмыж гай.

³² Тудо чыла моло нӧшмӧ деч изи гынат, кушкын шумекыже, пакчасе кушкыл коклаште эн кугу лиеш, пушеҥге гайыш савырна, сандене кавасе кайык-влак чоҥештен толыт да укш коклаштыже илаш тӱҥалыт».

³³ Адак нунылан туштен каласкален: «Пылпомыш Кугыжаныш – ру гай. Ӱдырамаш тудым кум виса ложаш дене варен, тыгеракын, уло руаш шуын».

³⁴ Иисус чыла тидым калыклан туштен ойлен, туштен каласыде, нунылан нимом ойлен огыл.

³⁵ Тыге пророк гоч ойлымо шомак шукталтын: «Туштен ойлаш йылмем рудем, тӱням ыштыме годсек шылтымым почын каласем».

³⁶ Вара Иисус калыкым колтен да пӧртыш пурен. Тунемшыж-влак Тудын кӱдыкӧ миеныт да каласеныт: «Пасусо шӱкшудо нерген туштен каласыметым мыланна умылтаре».

³⁷ Иисус нунылан вашештен: «Сай урлыкаш пырчым ӱдышыжӧ – тиде Айдеме Эрге,

³⁸ пасу – тӱня лиеш, а сай урлыкаш пырчыже – тиде Кугыжанышын эргыже-влак, шӱкшудо – осалын тарзыж-влак.

³⁹ Шӱкшудым ӱдышӧ тушманже диавол лиеш, тӱредмаш – тиде кызытсе курымын мучашыже, тӱредше-влак – Суксо улыт.

⁴⁰ Кузе шӱкшудым погат да тулеш йӱлалтат, кызытсе курым мучаш годымат тугак лиеш:

⁴¹ Айдеме Эрге шке Суксыж-влакым колта, а нунышт Тудын Кугыжанышыж гыч закондымылыкым ыштыше да алгаштарыше-влакым чыланыштым погат,

⁴² нуным тулан коҥгаш кудалтат. Тушто шортмаш да пӱйым пурмаш лиеш.

⁴³ Тунам чын ыштыше-влак Ачаштын Кугыжаныште кече семын волгалтыт. Кӧн колышташ пылышыже уло, тек колеш.

⁴⁴ Пылпомыш Кугыжанышым пасуэш тойымо поянлык денат таҥастараш лиеш. Айдеме тойымо поянлыкым муэш да уэш шылта, вара куанымыж дене кая да, чыла погыжым ужален, тиде пасум налеш.

⁴⁵ Пылпомыш Кугыжаныш адакше йытыра ракывотшер пырче-влакым кычалше сатучо гай.

⁴⁶ Пешак шергакан ик ракывотшер пырчым кычал мумеке, каен да, уло погыжым ужален, тудым налын.

⁴⁷ Адакшым Пылпомыш Кугыжаныш – теҥызыш кышкыме вапш гай. Тудо чыла тӱрлӧ колым поген.

⁴⁸ Вапш тичак кол логалмеке, тудым серышке шӱдырен луктыныт. Колызо-влак шинчыныт: сай колжым атыш ойырен оптеныт, а йӧрдымыжым луктын кудалтеныт.

⁴⁹ Кызытсе курым пытыме годымат тыгак лиеш: Суксо-влак толыт, осал-влакым чын ыштыше кокла гыч ойырат

⁵⁰ да тулан коҥгаш кудалтат. Тушто шортмаш да пӱйым пурмаш лиеш».

⁵¹ Иисус нунын деч йодын: «Те чыла тидым умылышда?» Тунемшыж-влак Иисуслан ойленыт: «Туге, Господь».

⁵² Иисус нунылан каласен: «Тыгеракын, Пылпомыш Кугыжанышын тунемшыже улшо закон туныктышо кажныжат клатше гыч у да тошто поянлыкым лукшо сурт оза гай лиеш».

⁵³ Нине туштен каласкалымым ойлен пытарымеке, Иисус тушечын каен.

⁵⁴ Тудо кушмо кундемышкыже миен, тысе синагогышто туныктен. Еҥ-влак ӧрын-лӱдын ойленыт: «Кушечын тиде Айдемын тыгай уш-акылже да чудым ыштыше вийже?

⁵⁵ Але Тудо плотникын эргыже огыл? Аваже Мария лӱман огыл мо? Але Иаков, Иосий, Симон да Иуда Тудын изашт огытыл?

⁵⁶ Тудын акаже-влак мемнан коклаште чылан огытыл мо? Кушечын Тудын чыла тыгайже?»

⁵⁷ Нуно Тудлан ӱшанен огытыл. Иисус нунылан каласен: «Шке олаштыже да мӧҥгысыжӧ-влак коклаште веле пророк чапдыме лиеш».

⁵⁸ Ӱшанышт укелан кӧра тушто чудым шуко ончыктен огыл.