Мф 12 - У Сугынь

12 ГЛАВА 1-8 Христос да шуматкече. 9-14 Кошкышо кидан айдеме. 15-21 Ойырен налме тарзе. 22-32 Иисус ден веельзевул. 33-37 Пушеҥге да тудын саскаже. 38-42 Палым ончыкташ йодмаш. 43-45 Осал шӱлышын пӧртылмыжӧ. 46-50 Иисусын аваже да иза-шольыжо-влак.

¹ Тиде жапыште Иисус икана шурно пасу гоч шуматкечын каен. Тунемшыж-влак шуженыт, сандене шурно парчам кӱраш да кочкаш тӱҥалыныт.

² Фарисей-влак тидым ужыныт да Иисуслан каласеныт: «Теве, шуматкечын мом ышташ чарыме, тунемшет-влак тудым ыштат».

³ Иисус нунылан вашештен: «Пеленже лийше-влак дене пырля шужымеке, Давид мом ыштыме нерген те лудын огыдал мо?

⁴ Давид Юмын пӧртыш пурен да нунын дене пырля надыр киндым кочкын. Тиде киндым Давидланат, еҥже-влакланат кочкаш ок лий улмаш, тидыжым иерей-влак веле ыштен кертыныт.

⁵ Але законышто лудын огыдал: иерей-влак шуматкече еда храмыште шуматкече законым пудыртат гынат, тиде титаклан ок шотлалт.

⁶ Но тыланда каласем: тыште храм деч Кугурак шога.

⁷ ”Надырым огыл, а чаманымым ужмем шуэш” манын возымым те умыледа ыле гын, титакдыме-влакым титаканыш огыда лук ыле.

⁸ Вет Айдеме Эрге шуматкечыланат Оза».

⁹ Тушечын кораҥмеке, Иисус нунын синагогышкышт пурен.

¹⁰ Тушто ик еҥын пел кидше кошкышо улмаш. Титаклаш амалым кычалын, Иисус деч йодыныт: «Шуматкечын черлым паремдаш лиеш мо?»

¹¹ Иисус нунылан каласен: «Тендан кокла гыч иктаж-кӧн ик шорыкшо уло да шуматкечын шорыкшо вынемыш пурен кая гын, але ок лук?

¹² Айдеме шорык деч мыняр пачаш шерге! Тыгеже, шуматкечын порым ышташ лиеш».

¹³ Вара черле еҥлан ойлен: «Кидетым шуялте». Тудыжо шуялтен, кидше тӧрланен да весыж гаяк таза лийын.

¹⁴ Фарисей-влак лектыныт да Иисусым кузе пушташ манын каҥашаш тӱҥалыныт. Но Иисус тидын нерген пален налын да тушечын каен.

¹⁵ Почешыже шуко калык миен, Тудо чылам паремден,

¹⁶ но Шкенжын нерген еҥ ончылно каласкалаш чарен.

¹⁷ Тыге Исаия пророк гоч каласыме шомак шукталтын. Тудо ойлен:

¹⁸ «Теве Мыйын ойырен налме Шочшем, Мыйын Йӧратымем, Тудын дене Мыйын поро кумылем. Мый Тудын ӱмбаке Шӱлышем пыштем, да Тудо порын судитлымем калык-влаклан увертара.

¹⁹ Тудо ок ӱчаше, ок кычкыре, йӱкшым уремлаште нигӧ ок кол.

²⁰ Порын судитлымым сеҥымашке лукмешке, тодылалтше омыжым ок пудырто, эҥын кийыше йытын рӱдым ок йӧртӧ.

²¹ Калык-влак Тудын лӱмжылан ӱшаным пыштат».

²² Тунам ия кучыман сокыр да йылмыдыме еҥым Иисус деке вӱден конденыт. Иисус тудым паремден, тиде еҥ ынде мутланенат, ужынат кертын.

²³ Уло калык чот ӧрын да ойлен: «Паремдышыже Давидын Эргыже огыл дыр?»

²⁴ Фарисей-влак тидым колынытат, каласеныт: «Тудо ия-влакым вес семын огыл, а веельзевулын, ия тӧран, вийже дене поктен луктеш».

²⁵ Но Иисус нунын шонымыштым пален да ойлен: «Кеч-могай кугыжаныш кӧргыштӧ шке коклаштышт сар тӱҥалеш гын, тудо пустаҥеш, да кеч-могай олаште але суртышто шелалтмаш лиеш гын, шоген ок сеҥе.

²⁶ А сатана сатанам поктен луктеш гын, тудо шке ваштарешыже шогалын, тыгеже кузе тудын кугыжанышыже шоген кертеш?

²⁷ Мый иям веельзевулын вийже дене поктен луктам гын, тендан эргыда-влак кӧн вийже дене поктен луктыт? Сандене нуно тендам судитлыше лийыт.

²⁸ А Мый Юмын Шӱлыш дене ия-влакым поктен луктам гын, тыгеже Юмын Кугыжаныш тендан деке ынде шуын.

²⁹ Виян еҥым ондак пидын пыштыде, иктаж-кӧ кузе тудын суртышкыжо пурен да погыжым аген кертеш? Пидын пыштымеке веле суртшым агаш лиеш.

³⁰ Кӧ Мый денем пырля огыл, тудо – Мыйын ваштареш, да кӧ Мый денем пырля ок пого, тудо шалатылеш.

³¹ Сандене тыланда ойлем: айдемын кеч-могай языкше да мыскылымыже касаралтеш, но Святой Шӱлышым мыскылымаш ок касаралт.

³² Кӧ Айдеме Эрге ваштареш мутым ойла, тудлан тиде касаралтеш, но кӧ Святой Шӱлыш ваштареш ойла гын, кызытсе курымыштат, шушаш курымыштат титакше ок касаралт.

³³ Але пушеҥгыжымат, саскажымат сайлан шотлыза, але пушеҥгымат, саскажымат йӧрдымылан шотлыза, вет пушеҥгым саскаж дене палат.

³⁴ Шем кишкын шочшыж-влак! Тендан мутда кузе поро лийын кертеш, кунам те шкеже осал улыда? Вет айдемын шӱмжӧ мо дене темын, тудак йылмыж гыч лектеш.

³⁵ Поро еҥ шӱм поянлыкше гыч порым луктеш, а осал еҥ шӱм осалже гыч осалым луктеш.

³⁶ Тыланда ойлем: арам каласыме кажне мутыштлан еҥ-влак суд кечын мутым кучаш тӱҥалыт.

³⁷ Мутетлан кӧра тый чыныш лектат, да мутетлан кӧрак титаканыш лектат».

³⁸ Тунам закон туныктышо ден фарисей-влак кокла гыч икмынярышт каласеныт: «Туныктышо! Ме палдарыше палым ончыктыметым ужнена».

³⁹ Но Тудо вашештен: «Юмо деч кораҥше да осал тукым палдарыше палым кычалеш, но Иона пророкын палыж деч моло тудлан ок пуалт.

⁴⁰ Кузе Иона китын кӧргыштыжӧ кум кече да кум йӱд лийын, тугак Айдеме Эргат кум кече да кум йӱд мланде кӧргыштӧ лиеш.

⁴¹ Ниневий олаште илыше-влак суд кечын тиде тукым дене пырля кынелыт да тудым титаканыш луктыт. Вет Ионан шижтарен ойлымыжым колмеке, нуно, языкыштым касарыктен, Юмо деке савырненыт. А тыште Иона деч Кугурак шога.

⁴² Кечывалвел ӱдырамаш кугыжа суд кечын тиде тукым дене пырля кынелеш да тудым титаканыш луктеш, вет тудо Соломонын ушан мутшым колышташ мландын вес мучашыж гыч толын, а тыште Соломон деч Кугурак шога.

⁴³ Айдеме кӧргӧ гыч лекмеке, каналташ верым кычалын, осал шӱлыш вӱддымӧ ир мландыште коштеш, но ок му.

⁴⁴ Тунам ойла: ”Кудалтен кодымо верышке мӧҥгеш пӧртылам”. Пӧртылмекыже ужеш: илыме верже яра, арун ӱштын да эрыктен шындыме.

⁴⁵ Вара кая, пеленже шкеж деч осал шым шӱлышым налеш, да чыланат айдемын кӧргыш илаш пурат. Тудлан мучаште тӱҥалтыш годсо деч ударак лиеш. Тиде осал тукым денат тыгак лиеш».

⁴⁶ Иисус калыклан але ойлен пытарен огыл, тиде жапыште Аваже да изаж-влак тӱжвалне шогеныт да Тудын дене кутырынешт улмаш.

⁴⁷ Иктыже Иисуслан каласен: «Ават ден изат-влак тӱнӧ шогат, нуно Тый денет мутланынешт».

⁴⁸ Ойлышылан Иисус вашештен: «Кӧ Мыйын авам да кӧ Мыйын иза-шольым улыт?»

⁴⁹ Вара кидше дене тунемшыж-влакым ончыктен да ойлен: «Теве Мыйын авам ден иза-шольым-влак.

⁵⁰ Кӧ Пылпомышсо Ачамын эрыкшым шукта, тудо Мыйын иза-шольым, ака-шӱжарем да авам».