Мф 11 - У Сугынь

11 ГЛАВА 2-19 Тынеш Пуртышо Иоаннын колтымо еҥже-влак. 20-24 Титакыштым шиждыме ола-влаклан ойго. 25-30 Мый декем толза да каныза.

¹ Латкок тунемшыжлан тыгай каҥашым пуымеке, Иисус тушечын каен да тиде кундемысе олалаште туныктен каласкалаш тӱҥалын.

² Христос мом ыштыме нерген колмеке, казаматыште шинчыше Иоанн Тудын деке кок тунемшыжым йодаш колтен:

³ «Толшашлыкше Тый улат, але мыланна весым вучыман?»

⁴ Иисус нунылан вашештен: «Кайыза, ужмыдам-колмыдам Иоаннлан каласкалыза:

⁵ сокыр-влак ужыт, окшак-влак коштыт, проказе черан-влак эрнат, чокрак-влак колыт, колышо-влак ылыж кынелыт, йорло-влак Поро Уверым каласкалат.

⁶ Ондалалтын, кӧ Мый дечем ок кораҥ, тудо поро пиалан».

⁷ Иоаннын тунемшыж-влак кайымеке, тудын нерген Иисус калыклан каласкалаш тӱҥалын: «Те ир мландыш мом ончаш лектында? Мардеж дене лӱҥгышӧ омыжым мо?

⁸ Мом те ужаш миенда? Шергакан вургемым чийыше айдемым мо? Шергакан вургеман-влак кугыжа-влакын кӱполатыштышт улыт.

⁹ Те мом ончаш лектында? Пророкым? Туге, тыланда ойлем, тудо пророк, но пророк деч кугурак.

¹⁰ Возымо: ”Теве Тый дечет ончыч Мый Шкемын Суксем колтем. Тудо Тыйын ончылно корным ямдыла”. Тидым Иоанн нергенак каласыме.

¹¹ Тыланда чынак ойлем: ӱдырамаш-влак деч шочшо коклаште Тынеш Пуртышо Иоанн деч кугурак еҥ уке, но Пылпомыш Кугыжаныште эн изижат тудын деч кугу.

¹² Тынеш Пуртышо Иоаннын калыклан каласкалаш тӱҥалме жап гыч тачысе кече мартеат Пылпомыш Кугыжаныш вий дене налалтеш, да вийым пыштыше-влак тудым налыт.

¹³ Вет чыла пророк ден закон Иоанн марте ончык ужын ойленыт.

¹⁴ Палынеда гын, тудо – толшаш Илия.

¹⁵ Кӧн колышташ пылышыже уло, тек колеш.

¹⁶ Но тиде тукымым кӧ дене таҥастарем? Тудо пазарыште шинчыше йоча-влак гай. Нуно йолташышт-влаклан кычкырат:

¹⁷ ”Ме тыланда шиялтыш дене шоктышна, а те ыжда кушто, ме тыланда ойган мурым мурышна, а те ыжда шорт”.

¹⁸ Иоанн толын, ок коч, ок йӱ, а ойлат: ”Тудын кӧргыштыжӧ ия!”

¹⁹ Айдеме Эрге толын, кочкеш, йӱэш, а ойлат: ”Ончалза, теве кочкаш да йӱаш йӧратыше Айдеме, йозак погышо ден языкан-влакын йолташышт”. Икшывыж-влакым ужын, Юмын уш-акылжым чынлан шотлат».

²⁰ Вара Иисус южо оласе калыкым языкым касарыктыде да Юмо деке савырныде илымыштлан шылталаш тӱҥалын, вет Тудын куатле пашаж-влак кокла гыч эн шукышт нине олалаште ончыктымо лийыныт.

²¹ «Ойго тылат, Хоразин! Ойго тылат, Вифсаида! Могай куатле паша-влак тендан дене лийыныт, тугаяк паша-влак Тир ден Сидонышто лийыт ыле гын, нуно шукертак, чоштыра вургемым чиен, ӱмбакышт ломыжым шавен, языкыштым касарыктен, Юмо деке савырнат ыле.

²² Тыланда ойлем: суд кечын Тир ден Сидонлан тендан деч куштылгырак лиеш.

²³ Тый, кавашке шумеш нӧлтымӧ Капернаум, тамыкыш сӱмыралме лият! Тыйын уремлаштет ончыктымо куатле паша-влак гай Содомышто лийыт ыле гын, тудо таче мартеат шога ыле.

²⁴ Тыланда ойлем: суд кечын Содом мландылан тый дечет куштылгырак лиеш».

²⁵ Тиде жапыште Иисус ойлен: «Ачай, пылпомышын да мландын Господьшо! Тый уш-акылан дечат, кугу ушан дечат шылтымым изи-влаклан почынат, сандене Тыйым чапландарем.

²⁶ Туге, Ачай, тыгай лийын Тыйын поро эрыкет.

²⁷ Ачам чыла Мыйын кидышкем пуэн. Эргым Ача деч моло нигӧ ок пале, Ачамат Эрге да кӧлан Эрге палдарынеже, нунын деч моло нигӧ ок пале.

²⁸ Орлыкышто илыше да нелым ужшо-шамыч, чылан Мый декем толза, Мый тендам тынысландарем.

²⁹ Мыйын нумалтышем шке ӱмбакыда налза да Мый дечем тунемза, вет Мый ӱҥышӧ да пушкыдо кумылан улам. Тунам чонланда тынысым муыда.

³⁰ Вет Мыйын нумалтышем нумалаш поро, Мыйын туныктымем куштылго».