Мф 10 - У Сугынь

10 ГЛАВА 1-15 Иисус латкок Апостолжым калык коклаш колта. 16-25 Ончыкылык поктылмаш. 26-31 Кӧ деч лӱдаш? 32-33 Христосым палыме нерген почын ойлымаш. 34-39 Керде, а тыныслык огыл. 40 – 11:1 Суапым налмаш.

¹ Шкенжын латкок тунемшыжым ӱжынат, Иисус нунылан осал шӱлышым поктен лукташ, чыла тӱрлӧ черым да туешкымым паремдаш властьым пуэн.

² Латкок Апостолын лӱмышт тыгай: нунын кокла гыч икымшыже Петр манын лӱмдымӧ Симон, тудын Андрей шольыжо, Зеведейын Иаков эргыже, тудын Иоанн шольыжо,

³ тыгак Филипп да Варфоломей, Фома да йозак погышо Матфей, Алфейын Иаков эргыже да Фаддей манме Леввей,

⁴ Кананит Симон да Иисусым ужалыше Искариот манме Иуда.

⁵ Иисус нине латкокытым калык коклаш колтен, нунылан тыгай каҥашым пуэн: «Чын Юмым палыдыме-влак деке ида кай, самарий калыкын олашкыже ида пуро.

⁶ Лучо Израиль калыкысе йомшо шорык-влак деке кайыза.

⁷ Коштмыда годым увертарыза: ”Пылпомыш Кугыжаныш ынде лишемын!”

⁸ Черлым паремдыза, колышым ылыжтыза, проказе чераным эрныктыза, иям поктен лукса. Яра налында, ярак пуыза.

⁹ Корнышко шӧртньӧ, ший, вӱргене оксамат калташ ида пыште,

¹⁰ пеленда сумкамат, вес вургемымат, йолчиемымат, пондымат ида нал. Вет пашаеҥ кочкышыжым сулен налеш.

¹¹ Кеч-могай олаш але ялыш пурымеке, тушто келшен толшо еҥым кычал муза, вес вере кайымешкыда тудын денак кодса.

¹² Пӧртыш пурымыда годым ”суртыштыда тыныслык лийже” манын саламлыза.

¹³ Нуно келшен толшо улыт гын, тендан тыланыме тыныслыкда тушан кодеш. Келшен толшо огытыл гын, тыланымыда тек тендан декак пӧртылеш.

¹⁴ А кушто тендам огыт пурто да шомакдам огыт колышт гын, тудо пӧрт але тудо ола гыч лекса, йол гычда пуракым почкалтыза.

¹⁵ Тыланда чынак каласем: суд кечын Содом ден Гоморра мландылан тиде ола деч куштылгырак лиеш.

¹⁶ Мый шорык-влакым пире коклашке колтымо семын тендам колтем, сандене кишке гай ушан, кӧгӧрчен гай титакдыме лийза.

¹⁷ Еҥ деч шекланыза, вет нуно тендам судитлаш пуат, синагоглаштышт кыраш тӱҥалыт.

¹⁸ Мыланем кӧра тендам вуйлатыше ден кугыжа-влак ончыко кучен намият, тидыже нунылан да чын Юмым палыдыме-влаклан Мыйын нерген таныклымаш лиеш.

¹⁹ Кунам тендам кучыктат, кузе але мом ойлымо нерген ида тургыжлане: мом ойлышаш, тыланда тудо жапыште пуалтеш,

²⁰ вет те огыл ойлаш тӱҥалыда, а кӧргыштыда улшо Ачадан Шӱлышыжӧ.

²¹ Изаже шольыжым, ачаже эргыжым пушташ пуа, а йоча-влак ача-авашт ваштареш кынелыт да нуным пуштыт.

²² Мыйын лӱмемлан кӧра чылан тендам ужмышудымо лийыт. А кӧ мучаш марте чытен лектеш, тудо утаралтеш.

²³ Тендам ик олаште поктылаш тӱҥалмеке, весышке куржса. Тыланда чынак ойлем: Айдеме Эрге толмешке, Израильысе ола-влакым эртен огыда шукто.

²⁴ Тунемшыже туныктышыж деч кугу огыл, тарзат озаж деч кугу огыл:

²⁵ тунемше шке туныктышыж гай, а тарзе шке озаж гай лиеш гын, сита. Сурт озам веельзевул манын лӱмдат гын, мӧҥгысыжӧ-влакым тыгак лӱмдаш огыт тӱҥал мо?

²⁶ Тыгеракын, еҥ-влак деч ида лӱд: нимо шылтен аралыме почылтде ок код, нимогай шолып чараш лекде ок код.

²⁷ Мом Мый тыланда пычкемыште ойлем, волгыдышто каласкалыза. Мо нерген пылышыш шыпак ойлымым колыда, леведыш ӱмбач увертарыза.

²⁸ Капым пуштшо, но чоным пуштын кертдыме-влак деч ида лӱд. Чонымат, капымат тамыкыште пытарен Кертше деч лӱдса.

²⁹ Тыгыде ик оксалан огыл мо кок пӧрткайыкым ужалат? Тендан Ачадан эрыкше деч посна нунын кокла гыч иктыжат мланде ӱмбаке садак ок камвоч.

³⁰ А тендан вуйысо ӱп пырчыдамат чыла шотлымо.

³¹ Тугеже, ида лӱд, те шуко пӧрткайык дечат шерге улыда.

³² Кӧ еҥ ончылно Мыйым палымыж нерген почын ойла, тудым палымем нерген Мыят Пылпомышсо Ачам ончылно почын ойлем.

³³ А кӧ еҥ ончылно Мый дечем кораҥеш, Мыят Пылпомышсо Ачам ончылно тудын деч кораҥам.

³⁴ Мый мланде ӱмбаке тыныслыкым кондаш толынам манын ида шоно. Тыныслыкым огыл, кердым кондаш толынам:

³⁵ эрге ден ачам, ӱдыр ден авам, шешке ден авалийшым икте-весе ваштареш шогалташ толынам.

³⁶ Айдемылан мӧҥгысыжӧ-влак тушманыш савырнат.

³⁷ Кӧ шке ачажым але аважым Мыйым йӧратыме деч чот йӧрата, Мыланем йӧрышӧ огыл, але кӧ эргыжым але ӱдыржым Мыйым йӧратыме деч чот йӧрата, Мыланем йӧрышӧ огыл.

³⁸ Тыгак кӧ шке ыресшым ок нал да почешем ок кай, тудо Мыланем йӧрышӧ огыл.

³⁹ Шке чонжым аралаш тӧчышӧ чонжым йомдара, а Мыйын верч чонжым йомдарыше – муэш.

⁴⁰ Тендам порын вашлийше Мыйымат порын вашлиеш, а Мыйым порын вашлийше Мыйым Колтышымат порын вашлиеш.

⁴¹ Иктаж-кӧ пророк гын, да тидлан кӧра тудым ала-кӧ порын вашлиеш гын, пророкын гаяк суапым налеш. Иктаж-кӧ чын ыштыше гын, да тидлан кӧра тудым ала-кӧ порын вашлиеш гын, чын ыштышын гаяк суапым налеш.

⁴² Тыланда чынак ойлем: кӧ нине изирак-влак кокла гыч иктыжлан, тудо Мыйын тунемшем улмылан веле, корка йӱштӧ вӱдым йӱаш пуа гынат, суапым налде ок код».