Лк 8 - У Сугынь

8 ГЛАВА 1-3 Иисус дене пырля коштшо ӱдырамаш-влак. 4-15 Ӱдышӧ нерген туштен ойлымаш. 16-18 Волгыдо нерген. 19-21 Иисусын Аваж ден изаж-влак. 22-25 Иисус тӱтан мардежым чара. 26-39 Осал шӱлышаным паремдымаш. 40-56 Иаирын ӱдыржым ылыжтымаш да вӱр йогымо черан ӱдырамашым паремдымаш.

¹ Тылеч вара Иисус ола гыч олашке, ял гыч ялыш Юмын Кугыжанышын Поро Увержым каласкален коштын. Тудын дене пырля латкок тунемшыже,

² тыгак чер да осал шӱлыш деч паремдыме икмыняр ӱдырамаш лийын: Магдалина манын лӱмдымӧ Мария – тудын кӧргыж гыч шым ия лектын –

³ Иродын полатыште вуйлатыше Хузан Иоанна ватыже, Сусанна да шуко молат. Нунышт мо улышт дене Иисуслан служитленыт.

⁴ Икана, кунам калык пешак шуко погынен да Тудын деке еҥ-влак чыла олала гыч толыныт, Иисус нунылан туштен каласкален:

⁵ «Ӱдышӧ шурным ӱдаш лектын. А ӱдымыж годым южо пырчыже корно воктеке возын, тушто нуным тошкен пытареныт, кавасе кайык-влак чӱҥгеныт.

⁶ Весышт кӱан верыш возыныт, шытен лекмекышт, кошкеныт, вет нунылан вӱдыжгӧ ситен огыл.

⁷ А южышт шӱкшудан верыш логалыныт, нунын дене пырля шӱкшудо кушкын да озымым пызыралын.

⁸ А южышт сай мландыш возыныт, шытен лектыныт да шӱдӧ пачаш шуко пырчым пуэныт». Тидым каласымеке, Иисус кычкыралын: «Кӧн колышташ пылышыже уло, тек колеш!»

⁹ Тиде туштен ойлымыжо мом ончыкта манын, тунемшыж-влак Иисус деч йодыныт.

¹⁰ Тудо вашештен: «Юмын Кугыжанышын тайныж-влакым умылаш тыланда пуалтын, а молылан чылажат туштен каласыме гоч пуалтеш. Тидлан кӧра ”ончат да огыт уж, колыштыт да огыт умыло”.

¹¹ Тиде туштен каласыме теве мом ончыкта: шурно урлыкаш – тиде Юмын шомакше.

¹² Корно воктеке вочшо пырче – тиде нуно улыт, кӧмыт шомакым колыт, но вара диавол толеш да ынышт ӱшане, ынышт утаралт манын, шӱмышт гыч шомакым наҥгая.

¹³ А кӱан верыш вочшо пырче – тиде нуно улыт, кӧмыт шомакым колыт да, куанен, шӱмыш пыштат, ик жап ӱшанат, но вожышт укеат, алгаштарен тергыме годым кораҥыт.

¹⁴ Шӱкшудан верыш логалшыже – тиде нуно улыт, кӧмыт шомакым колыт, но тысе илышыште тургыжланыме, поянлыкым погымо да ракатланыме дене пызырналтыт, сандене саскашт кушкын ок шу.

¹⁵ А сай мландыш вочшыжо – тиде нуно улыт, кӧмыт шомакым колмеке, тудым поро да яндар шӱмыштӧ аралат, чытымашышт дене саскам пуат». [Тидым каласымеке, Иисус кычкыралын: «Кӧн колышташ пылышыже уло, тек колеш!»]

¹⁶ «Лампым чӱктымеке, нигӧ тудым ате дене ок петыре але олымбал йымаке ок шынде. А пурышо-влак волгыдым ужышт манын, тудым лампыпӱкеныш шындат.

¹⁷ Вет чыла шылтыме чараш лектеш, чыла шолыпат палыме лиеш да чараш лектеш.

¹⁸ Тыгеже, кузе колыштмыдам эскерыза. Кӧн уло, тудлан пуалтеш, а кӧн уке, тудын мо уло манын шона, тудыжат налалтеш.»

¹⁹ Иисус деке Аваж ден изаж-влак толыныт, но калык шукылан кӧра воктекыже миен кертын огытыл.

²⁰ Иисуслан увертареныт: «Тыйын Ават ден изат-влак тӱнӧ шогат, Тыйым ужнешт».

²¹ Но Тудо нунылан каласен: «Юмын шомакшым колыштшо да шуктышо-влак Мыйын авам ден иза-шольым-влак улыт».

²² Ик кечын Иисус тунемшыж-влак дене пырля пушыш шинчын да нунылан каласен: «Ерын вес серышкыже вончена». Нуно пуш дене каеныт.

²³ Кайымышт годым Иисус мален колтен. Ер ӱмбалне тӱтан мардеж лектын, пушыш вӱд темаш тӱҥалын, нуно лӱдыкшыш логалыныт.

²⁴ Тунемшыж-влак Иисус деке лишемыныт, Тудым помыжалтеныт да каласеныт: «Туныктышо! Туныктышо! Пытена!» Иисус помыжалтын да мардеж ден вӱд толкынлан чарнаш кӱштен. Нуно лыпланеныт, тымык лийын.

²⁵ «Кушто тендан ӱшанымашда?» – тунемшыж-влаклан Иисус каласен. Нуно икте-весыштлан лӱдын-ӧрын ойленыт: «Кӧ Тиде? Мардежланат, вӱдланат кӱшта, а нунышт Тудым колыштыт!»

²⁶ Нуно Галилей ваштареш верланыше Гадара кундемыш пуш дене миеныт.

²⁷ Кунам Иисус серыш лектын, Тудым ондакше олаште илыше, шукертсек ия-влак кучыман еҥ вашлийын. Тудыжо вургем деч посна коштын, пӧртыштӧ огыл, а шӱгар-влакыште илен.

²⁸ Иисусым ужмеке, тудо кычкыралын, ончыланже шуҥгалтын да кугу йӱкын ойлен: «Иисус, Кӱшнысӧ Юмын Эргыже, Тыйын мый денем мо пашат? Тый дечет сӧрвален йодам, мыйым ит орландаре!»

²⁹ Иисус тиде еҥын кӧргыж гыч осал шӱлышлан лекташ кӱштен, сандене тудо тыге ойлен. Тиде еҥым ия кужу жап орландарен улмаш. Тудын кидшым-йолжым шинчырленыт, пидыныт, тудым ороленыт, но пӧръеҥ шинчырым кӱрыштын, ия тудым ир мландыш поктен наҥгаен.

³⁰ Иисус тудын деч йодын: «Тыйын лӱмет кузе?» «Легион», – каласен тудо. Тудын кӧргыштыжӧ шуко ия улмаш.

³¹ Пундашдыме келгытыш каяш ынже кӱштӧ манын, нуно Иисусым сӧрваленыт.

³² Туштак, курыкышто, кугу сӧсна кӱтӱ коштын. Ия-влак сӧсна кӧргыш пураш эрыкым Иисус деч йодыныт. Иисус тидлан эрыкым пуэн.

³³ Ия-влак, тиде еҥын кӧргыж гыч лекмеке, сӧсна-влак кӧргыш пуреныт. Кӱтӱ тура сер гыч ерыш шуҥгалтын да пурен каен.

³⁴ Мо лиймым ужмеке, кӱтӱчӧ-влак куржыныт, олаште да яллаште тидын нерген каласкаленыт.

³⁵ Мо лиймым ончаш еҥ-влак толыныт. Иисус деке лишеммеке, ия-влак деч утарыме айдемым ужыныт. Тудо Иисусын йол воктенже шинчен, вургеман да яндар уш-акылан лийын. Нуно чот лӱдыныт.

³⁶ Ужшо-влак ия кучыман еҥ кузе утаралтме нерген нунылан каласкаленыт.

³⁷ А Гадара кундемысе калыкым лӱдмаш авалтенат, Иисусым шкешт деч каяш йодыныт. Иисус пушыш шинчын да мӧҥгеш каяш тарванен.

³⁸ Кӧн кӧргӧ гыч ия-влак лектыныт, тудо айдеме Иисус дене пырля каяш сӧрвален йодын. Но Иисус тудым Шкеж деч колтен да ойлен:

³⁹ «Мӧҥгышкет пӧртыл да Юмо тыланет могай кугу пашам ыштыме нерген каласкале». Тудо каен да Иисус тудлан мом ыштыме нерген уло ола мучко каласкален.

⁴⁰ Кунам Иисус мӧҥгеш пӧртылын, Тудын толмыжлан калык тӱшка куанен, чылан Тудым вученыт.

⁴¹ Теве Иаир лӱман еҥ толын, тудо синагог вуйлатыше лийын. Иисусын йол воктекыже кумык возын да мӧҥгыжӧ пураш сӧрвален йодын.

⁴² Тудын латкок ияш ик шкет ӱдыржӧ колаш киен. Иисус кайыме годым чыла могырым калык Тудым шыгыремден.

⁴³ Ик ӱдырамаш вӱр йогымо дене латкок ий орланен. Эмлызе-влаклан тудо уло погыжым кучылт пытарен, но иктат тудым паремден кертын огыл.

⁴⁴ Тудо шеҥгечын миен да Иисусын вургем тӱржым тӱкалтен, да вӱр йогымыжо тунамак чарнен.

⁴⁵ «Кӧ Мый декем тӱкныш?» – йодын Иисус, но тӱкен огынал манын, чылан ойленыт. Тунам Петр да тудын дене пырля лийше-влак каласеныт: «Туныктышо! Калык Тыйым йыр авырен да шыгыремда, а Тый Мый декем кӧ тӱкныш манын ойлет!»

⁴⁶ «Ала-кӧ Мый декем тӱкныш, Мый кӧргем гыч вий лекмым шижым», – Иисус ойлен.

⁴⁷ Тунам ӱдырамаш, шолыпеш кодын кертдымыжым ужын, Иисус деке чытырен миен да ончыланже кумык возын. Молан Тудын деке тӱкнымыжӧ да кузе иканаште тӧрланымыж нерген уло калык ончылно ойлен.

⁴⁸ Тудлан Иисус каласен: «Ӱдырем, чот шого, тыйым ӱшанымашет утарен. Тыныслык дене кае».

⁴⁹ Иисус але ойленат пытарен огыл, синагог вуйлатышын пӧртшӧ гыч ик еҥ толын да каласен: «Тыйын ӱдырет колен. Туныктышым ит тургыжландаре».

⁵⁰ Но Иисус тидым колын да Иаирлан ойлен: «Ит лӱд, ӱшане веле, тунам ӱдырет утаралтеш».

⁵¹ Пӧрт деке шумо годым Петр, Иоанн, Иаков, ӱдырын ачаж ден аваж деч молым Иисус пураш чарен.

⁵² Ӱдыр верч чылан йӱкын шортыныт да чот ойгыреныт. Но Иисус каласен: «Ида шорт, тудо колен огыл, мала веле».

⁵³ Ӱдыр колымым паленытат, еҥ-влак Иисусым воштылыныт.

⁵⁴ Но Иисус, чылам поктен колтымеке, ӱдырым кид гыч налын да виян каласен: «Ӱдыр, кынел!»

⁵⁵ Ӱдырын чонжо пӧртылын, тудо тунамак кынелын. Иисус тудлан кочкаш пуаш кӱштен.

⁵⁶ Ӱдырын ачаж ден аваже чот ӧрыныт. Мо лийме нерген нигӧлан каласаш огыл манын, Иисус нунылан кӱштен.