Лк 6 - У Сугынь

6 ГЛАВА 1-5 Тунемше-влак шуматкечын шурно парчам кӱрыт. 6-11 Кошкышо кидан еҥ. 12-16 Латкок Апостол. 17-19 Иисус черле-влакым паремда. 20-26 Чын пиал да ойго нерген. 27-36 Тушмандам йӧратыза. 37-42 Ида судитле. 43-45 Пушеҥге ден саска. 46-49 Кок негыз.

¹ Кугечын кокымшо кечыж деч вара икымше шуматкечын Иисус шурно пасу гоч эртен. Тунемшыж-влак шурно парчам кӱрыныт да, кидеш туржын, кочкыныт.

² Южо фарисейже каласен: «Шуматкечын мом ышташ ок лий, тугайым те молан ыштеда?»

³ Иисус нунылан каласен: «Шкежат, пеленже лийше-влакат шужымеке, Давид мом ыштыме нерген те лудын огыдал мо?

⁴ Надыр киндым иерей деч молылан нигӧлан кочкаш ок лий гынат, тудо Юмын пӧртыш пурен, тиде киндым налын да кочкын, пырля лийше-влакланат пуэн».

⁵ Вара нунылан каласен: «Айдеме Эрге шуматкечыланат оза».

⁶ Вес шуматкечынат Иисус синагогыш пурен да туныктен. Тушто ик еҥ лийын, тудын пурла кидше кошкышо улмаш.

⁷ Закон туныктышо ден фарисей-влак Иисусым титаклаш амалым кычалыныт, шуматкечынат паремда мо манын эскереныт.

⁸ Но Иисус, нунын шонымыштым пален, кошкышо кидан еҥлан каласен: «Кынел да ончык лек». Тудо кынелын да ончыко лектын.

⁹ Тунам Иисус нунылан каласен: «Мый тендан деч йодам: шуматкечын мом ышташ лиеш? Порым але осалым? Чоным утараш але пытараш?» Нуно шып шогеныт.

¹⁰ Иисус йырым-йыр чыланышт ӱмбаке ончалын да тудо еҥлан каласен: «Кидетым шуялте». Тудо тыгак ыштен, кидше весыж гаяк таза лийын.

¹¹ Нуно чот ажгыненыт да Иисус дене мом ышташ манын, шке коклаштышт мутланеныт.

¹² Тиде кечылаште Иисус курыкыш кумалаш кӱзен да тиде йӱдым Юмылан кумалын эртарен.

¹³ А кунам волгыжын, шке тунемшыж-влакым ӱжын да нунын кокла гыч латкокытым ойырен налын. Нуныштым Апостол манын лӱмден:

¹⁴ Симоным – тудымак Петр манын лӱмден – тудын Андрей шольыжым, Иаковым, Иоанным, Филиппым, Варфоломейым,

¹⁵ Матфейым, Фомам, Алфейын Иаков эргыжым, Зилот манме Симоным,

¹⁶ Иаковын Иуда эргыжым да Искариот манме Иудам. Тудыжо вара Иисусым ужалыше лийын.

¹⁷ Нунын дене пырля волымеке, Иисус тӧр верыш шогалын. Шуко тунемшыже да уло Иудей гыч, Иерусалим гыч, теҥыз воктенысе Сидон ден Тир верла гыч шуко калык Тудын дене пырля лийын.

¹⁸ Нуно Иисусым колышташ да черыштым паремдыкташ толыныт. Осал шӱлыш орландарыме-влакат паремдыме лийыныт.

¹⁹ Иисус деч вий лектын шоген да чылам паремден, сандене уло калык Тудын деке тӱкнаш тӧчен.

²⁰ Тунемшыж-влак ӱмбаке ончен, Иисус ойлаш тӱҥалын: «Те, шкендам Юмын ончылно изилан ужшо-влак, поро пиалан улыда: Юмын Кугыжаныш – тендан.

²¹ Те, кызыт шужышо-влак, поро пиалан улыда: темше лийыда. Те, кызыт шортшо-влак, поро пиалан улыда: те куанен воштылаш тӱҥалыда.

²² Кунам Айдеме Эрге верч еҥ-влак тендам ужмышудымо лийыт, шкешт деч кораҥдат, вурсат да лӱмдамат осаллан шотлат – те поро пиалан улыда.

²³ Тудо кечын куаныза, йывыртыза: пылпомышто тыланда кугу суап лиеш. Нунын ачашт-влак пророк-влак денат тыгак ыштеныт.

²⁴ Поян-влак, а тыланда ойго: те шке йывыртымашдам налында.

²⁵ Кӧ кызыт темше, ойго тыланда: те шужымашым ужаш тӱҥалыда. Кӧ кызыт воштылеш, ойго тыланда: те ойгыраш да шорташ тӱҥалыда!

²⁶ Кунам тендам чыла еҥ мокта – ойго тыланда: нунын ачашт-влак шояк пророк-влакым тыгак моктеныт.

²⁷ Но тыланда, кӧ Мыйым колыштеш, ойлем: тушмандам йӧратыза. Тендам ужмышудымо-влаклан порым ыштыза,

²⁸ тендам каргышылан порым тыланыза, тендам вурсышо верч кумалза.

²⁹ Кӧ тыйым ик могыр шӱргет гыч сова, вес могыржымат тудлан савырал, да кӧ ӱмбал вургеметым шупшын налеш, тудлан тувыретымат налашыже ит торешлане.

³⁰ Кӧ тый дечет йодеш, чылалан пу, а кӧ тыйыным налеш, мӧҥгеш ит йод.

³¹ Еҥ-влакым шкаланда мом ыштыктынеда, шкеат нунылан тидымак ыштыза.

³² Те шкендам йӧратыше-влакым йӧратеда гын, тидланже тыланда могай суап? Вет языкан-влакат, кӧ нуным йӧрата, тудымак йӧратат.

³³ Кӧ тыланда порым ышта, теат нунылан порым ыштеда гын, тидланже тыланда могай суап? Языкан-влакат тыгак ыштат.

³⁴ Кӧ деч мӧҥгеш налын кертмылан ӱшанеда, тудлан веле кӱсын пуэда гын, тидланже тыланда могай суап? Тунарак мӧҥгеш налаш манын, языкан-влакат языканлан кӱсын пуат.

³⁵ А те шке тушмандам йӧратыза, порым ыштыза, мӧҥгеш налаш шоныде, кӱсын пуыза. Тунам тыланда кугу суап лиеш, да те Кӱшнысӧ Юмын шочшыжо лийыда. Тудо таум ыштыдыме ден осал-влак деке поро.

³⁶ Тугеже, шке Ачада гаяк чаманыше лийза.

³⁷ Еҥым ида судитле, тунам теат огыда судитлалт. Нигӧм титаканыш ида лук, тунам теат титаканыш огыда лукталт. Еҥын титакшым кудалтыза, да тенданат титакда кудалтыме лиеш.

³⁸ Пуыза, да тыландат пуалтеш. Тичмаш виса дене висен, темден да кӧвален тыланда пыштен пуалтеш. Могай виса дене те виседа, тыландат тугай денак висалтеш».

³⁹ Иисус нунылан тыге туштен ойлен: «Сокыр еҥ сокырым вӱдышӧ лийын кертеш мо? Нуно коктынат вынемыш огыт камвоч?

⁴⁰ Тунемшыже туныктышыж деч кугу огеш лий, а тунем пытарымекыже, кажныже туныктышыж гай лиеш.

⁴¹ Молан тый лишылетын шинчаштыже шӱкым ужат, а шкендыныште пырням от шиж?

⁴² Але кузе лишылетлан ”Йолташ, пу-ян, мый тыйын шинчат гыч шӱкым луктам” каласен кертат, кунам шке шинчаштет пырням от уж? Сайла кояш тӧчышӧ! Ондак шке шинчат гыч пырням лук, вара веле лишылетын шинчаж гычын шӱкым кузе лукташ – ужат.

⁴³ Уда саскам пуышо сай пушеҥге уке, сай саскам пуышо уда пушеҥгат уке.

⁴⁴ Кеч-могай пушеҥгым саскаж дене палат. Иман вондер гыч смоква саскам огыт пого, а шуркалыше вондер гыч виноградым пӱчкын огыт нал.

⁴⁵ Поро айдеме шӱмжын поро поянлыкше гыч порылыкым луктеш, осал еҥ шӱмжын осалже гыч осалым луктеш. Вет айдемын шӱмжӧ мо дене темын, тудымак йылмыже ойла.

⁴⁶ Мыйым молан ”Господь, Господь!” манын ӱжыда? А мом кӱштем, тудым огыда ыште.

⁴⁷ Мый декем толшо, шомакем колыштшо да шуктышо айдеме кӧ гай? Мый тидым тыланда каласем.

⁴⁸ Тудо – пӧртым чоҥышыла келге вынемым кӱнчышӧ да кӱ ӱмбалан негызым пыштыше еҥ гай. Вӱд ташлыме годым тиде пӧрт ӱмбаке эҥер шуҥгалтын, но тудым тарватен кертын огыл, вет пӧртын негызше кӱ ӱмбалан пыштыме.

⁴⁹ А Мыйын шомакем колыштшо, но тудым шуктыдымо еҥ – мланде ӱмбалан негыз деч посна пӧртым чоҥышо айдеме гай. Пӧрт ӱмбаке эҥер шуҥгалтын, да тудо тунамак сӱмырлен. Шаланымыже шучко лийын».