Лк 5 - У Сугынь

5 ГЛАВА 1-11 Иисус икымше тунемшыж-влакым ӱжеш. 12-16 Проказе чераным паремдымаш. 17-26 Йыжыҥдыме еҥым паремдымаш. 27-32 Левийым ӱжмаш. 33-39 Пӱтым кучымо нерген йодыш.

¹ Икана Иисус Геннисарет ер воктене шоген, а калык, Юмын шомакым колаш манын, Тудым йырваш шыгыремден.

² Серыште Иисус кок пушым ужын. А пуш гыч волышо колызо-влак вапшыштым мушкыныт.

³ Ик пушыжо Симонын лийын. Иисус тушко шинчын да сер деч кораҥаш тудын деч йодын, пуш гыч еҥ-влакым туныктен.

⁴ А вара, ойлен чарнымеке, Симонлан каласен: «Келге верыш кае. Колым кучаш тушан вапш-влакдам шуыза».

⁵ «Туныктышо, – вашештен Симон, – ме йӱдвошт тыршенна да нимом кучен огынал. Но Тый каласет гын, мый вапшым шуэм.»

⁶ Нуно тыгак ыштеныт да тунар шуко колым кученыт, вапшыштат кӱрышталташ тӱҥалын.

⁷ Полшаш толышт манын, кидым рӱзен вес пушысо йолташышт-влакым ӱжыныт. Нунышт толыныт. Кок пушге кол дене туге теменыт, пушыштат вӱдыш волаш тӱҥалын.

⁸ Тидым ужмеке, Иисус ончылан Симон-Петр сукен шинчын да каласен: «Господь, мый дечем кораҥ, мый языкан айдеме улам!»

^9-10 Симон да чылан, кӧ тудын дене пырля лийын, – тыгак йолташыже-влак, Зеведейын Иаков ден Иоаннже – тынар шуко кучымылан ӧрын-лӱдын шогеныт. Но Иисус Симонлан каласен: «Ит лӱд. Тылеч вара тый айдемым кучышо лият».

¹¹ Вара, кок пушге серыш лукмеке, нуно чыла коденыт да Тудын почеш каеныт.

¹² Икана Иисусын ик олаште лиймыж годым уло капге проказе черан еҥ толын. Иисусым ужмеке, кумык возын да сӧрвален ойлаш тӱҥалын: «Господь, паремдынет гын, мыйым эрныктен кертат».

¹³ Иисус кидым шуялтен, тудым тӱкалтен да каласен: «Паремдынем, эрне». Проказе черже тунамак пытен.

¹⁴ Тидын нерген нигӧлан ойлаш огыл манын, Иисус тудлан чарен, да кӱштен каласен: «Кай да шкендым иерейлан ончыкто. Эрналтмет лӱмеш Моисей кӱштымӧ семын надырым пу. Тидын дене тый паремметым ончыктет».

¹⁵ А Иисус нерген мут утларак веле шарлен, пеш шуко калык Тудым колышташ да черыштым паремдыкташ толын.

¹⁶ Но Тудо тымык верыш кумалаш коштын.

¹⁷ Ик кечын, кунам Иисус туныктен, Тудым колыштшо-влак коклаште Галилей ден Иудейысе чыла ял гыч да Иерусалим гыч толшо фарисей ден закон туныктышо-влак шинченыт. Господьын куатше черле-влакым паремдымаште палдырнен.

¹⁸ Теве пӧръеҥ-влак, вакшышеш нумалын, йыжыҥдыме еҥым конденыт да, Иисус ончык пышташ манын, пӧртыш пурташ тӧченыт.

¹⁹ Калык шукылан кӧра кузе пурташ йӧным муын огытылат, нуно пӧрт леведыш ӱмбаке кӱзеныт, леведышым рончен, тудым вакшышыжге еҥ коклашке Иисус ончыко волтеныт.

²⁰ Нунын ӱшанымыштым ужын, Тудо каласен: «Айдеме, тыйын языкет касаралтеш».

²¹ Закон туныктышо ден фарисей-влак шонкалаш тӱҥалыныт: «Юмым мыскылышыже кӧ тиде тыгай? Юмо деч моло кӧ айдемын языкшым касарен кертеш?»

²² Иисус, нунын тыге шонкалымыштым паленат, вашештен каласен: «Те мом шӱмыштыда шонкаледа?

²³ Мом куштылгырак каласаш: ”Тыйын языкет касаралтеш” але ”Кынел да ошкыл” манаш?

²⁴ Но те пален лийза: Айдеме Эргын мланде ӱмбалне языкым касараш властьше уло». Йыжыҥдыме еҥлан Иисус каласен: «Тылат ойлем: кынел, вакшышетым нал да мӧҥгышкет кае».

²⁵ Черле тунамак, нунын ончылнак, кынелын, вакшышыжым погалтен да, Юмым чапландарен, мӧҥгыжӧ ошкылын.

²⁶ Чылам кугу лӱдмаш авалтен, чылан Юмым чапландареныт да лӱдын ойленыт: «Таче ме кугу ӧрыктарымашым ужна».

²⁷ Тылеч вара Иисус лектын да йозак погымо верыште шинчыше Левий лӱман йозак погышым ужын. Тудлан ойлен: «Почешем кае».

²⁸ Тудо кынелын, чыла коден да Иисус почеш каен.

²⁹ Левий шке пӧртыштыжӧ Тудлан кугу сийым ямдылен. Тушто нунын дене пырля йозак погышо-влак да молат шукын кочкыныт.

³⁰ Фарисей да нунын кокла гычак закон туныктышо-влак Иисусын тунемшыж-влаклан ӧпкелен ойленыт: «Молан те йозакым погышо да языкан-влак дене пырля кочкыда да йӱыда?»

³¹ Иисус нунылан вашештен: «Таза еҥлан огыл эмлызе кӱлеш, а черлылан.

³² Мый чын ыштыше-влакым огыл, а языкан-влакым языкым касарыкташ да Юмо деке савырнаш ӱжаш толынам».

³³ Иисуслан каласеныт: «Молан Иоаннын тунемшыж-влак, тыгак фарисей-влакын тунемшыштат чӱчкыдын пӱтым кучат да кумалыт, а Тыйын – кочкыт да йӱыт?»

³⁴ Иисус нунылан вашештен: «Ӱдырым налше качын сӱан калык дене пырля лиймыж годым нунылан пӱтым кучыктен кертыда мо?

³⁵ Но жап шуэш, нунын деч качым налыт, тунам нуно тиде кечылаште пӱтым кучаш тӱҥалыт».

³⁶ Тыгак нунылан туштен каласен: «У вургем гыч кушкед налын, тошто вургемыш нигӧ тумышым ок шынде – ужымат кушкедеш, тоштыжланат у куэм дене ыштыме тумыш келшен ок тол.

³⁷ Шуын шудымо йошкар аракам нигӧат тошто шувышыш ок опто – шуын шудымо арака шувышым кушкедеш, шкежат йога, шувышыжат йӧрдымӧ лиеш.

³⁸ Шуын шудымо аракам у шувышыш опталман, тунам коктынат аралалтыт.

³⁹ А тошто аракам йӱмеке, нигӧнат у аракам тунамак йӱмыжӧ ок шу, вет ойла: ”Тоштыжо сайрак”».