Лк 3 - У Сугынь

3 ГЛАВА 1-20 Тынеш Пуртышо Иоаннын увертарымыже. 21-22 Иисусым тынеш пуртымаш. 23-38 Иисусын тукымвожшо.

¹ Тиверий кесарь латвизымше ий кугыжаланыме годым, кунам Иудейым Понтий Пилат вуйлатен, Галилейын тетрархше Ирод лийын, тудын Филипп изаже – Итурейын да Трахонит кундемын тетрархышт, Лисаний – Авилинейын тетрархше

² да Анна ден Каиафа архиерей лийыныт, ир мландыште Захарийын Иоанн эргыжлан Юмо деч шомак лийын.

³ Тудыжо Иордан эҥер кундемысе чыла вер мучко каен да языкыштым касарыкташлан, язык верч ӧкынен, тынеш пураш туныктен.

⁴ Исаия пророкын шомакшым возыман книгаште кузе каласыме, туге лийын: «Ир мландыште кычкырышын йӱкшӧ шокта: Господьлан корным ямдылыза, Тудлан йолгорным вияшым ыштыза!

⁵ Чыла корем темалтше, а чоҥга ден курык иземышт, корно савыртыш-влак вийнышт, лакылан корно-влак тӧр лийышт –

⁶ Юмын утарымашыжым чыла илыше ужеш».

⁷ Тынеш пураш толшо еҥ-влаклан Иоанн ойлен: «Шем кишкын шочшыж-влак! Ончыкылык шыде логалме деч утлен куржаш кӧ тыланда каҥашым пуэн?

⁸ Языкым касарыктен, Юмо деке савырнымыланда келшен толшо саскам шочыктыза да ”Мемнан ачана – Авраам” манын, кӧргыштыда шонаш ида тӱҥал. Тыланда ойлем: Юмо теве нине кӱ-влак гычат Авраамлан икшыве-влакым ыштен кертеш.

⁹ Ынде пушеҥге вож воктене товарат ямде кия: сай саскам пуыдымо чыла пушеҥгым руат да тулыш шуат».

¹⁰ «Мом ме ыштышаш улына?» – тудын деч калык йодыштын.

¹¹ Иоанн вашештен: «Кӧн кок вургемже уло, тек иктыжым вургем укеанлан пуа. Кӧн кочкышыжо уло, тек тыгак ышта».

¹² Йозак погышо-влакат тынеш пураш толыныт. Нуно тудын деч йодыныт: «Туныктышо, ме мом ыштышаш улына?»

¹³ Тудо вашештен: «Погаш палемдыме деч шуко ида йод».

¹⁴ Сарзе-влак тудын деч йодыныт: «А ме мом ыштышаш улына?» Тудо каласен: «Нигӧм ида шыгыремде, еҥ ӱмбаке вуйым ида ший, пашадарда дене серлагыза».

¹⁵ Калык моткоч вучен, Иоанн нерген Христос огыл гын манын, чылан шӱмыштышт шонкаленыт.

¹⁶ Но Иоанн чылан ончылно каласен: «Мый тендам вӱд дене тынеш пуртем, но Весе толеш, Тудо мый дечем Виянрак. Мый Тудын йолчием кылжымат рудаш ом йӧрӧ. Тудо тендам Святой Шӱлыш да тул дене тынеш пурта.

¹⁷ Тудын кидыштыже кольмо, идымжым эрыкта да шыдаҥым клатышкыже пога, а арважым йӧрташ лийдыме тулеш йӱлалта».

¹⁸ Калыкым тӱрлын туныктен, Иоанн Поро Уверым каласкален.

¹⁹ А Ирод тетрархлан тудын шке изажын Иродиада ватыж дене илыме шотышто да моло осал пашаже шотышто Иоанн шылтален ойленат,

²⁰ Ирод тудым казаматыш петырен, осал пашашкыже тидымат ешарен.

²¹ Уло калык тынеш пурымо годым Иисусат тынеш пурен, а кунам Тудо кумалын, пылпомыш почылтын.

²² Кӧгӧрченла койшо кап дене Тудын ӱмбаке Святой Шӱлыш волен. Пылпомыш гыч йӱк шоктен: «Тый Мыйын йӧратыме Эргым улат, Мыйын поро кумылем Тый денет!»

²³ Шке служитлымыжым тӱҥалмыж годым Иисуслан кумло ий наре лийын. Тудо Иосифын Эргыже манын шоненыт. Иосифын ачаже Илий лийын,

²⁴ тудыжын – Матфат, Левий, Мелхий, Ианнай, Иосиф,

²⁵ Маттафий, Амос, Наум, Еслим, Наггей,

²⁶ Мааф, Маттафий, Семей, Иосиф, Иуда,

²⁷ Иоаннан, Рисай, Зоровавель, Салафиил, Нирий,

²⁸ Мелхий, Аддий, Косам, Елмодам, Ир,

²⁹ Иосий, Елиезер, Иорим, Матфат, Левий,

³⁰ Симеон, Иуда, Иосиф, Ионан, Елиаким,

³¹ Мелеай, Маинан, Маттафай, Нафан, Давид,

³² Иессей, Овид, Вооз, Салмон, Наассон,

³³ Аминадав, Арам, Есром, Фарес, Иуда,

³⁴ Иаков, Исаак, Авраам, Фарра, Нахор,

³⁵ Серух, Рагав, Фалек, Евер, Сала,

³⁶ Каинан, Арфаксад, Сим, Ной, Ламех,

³⁷ Мафусал, Енох, Иаред, Малелеил, Каинан,

³⁸ Енос, Сиф, Адам, Юмо.