Лк 23 - У Сугынь

23 ГЛАВА 1-5 Иисус Пилат ончылно. 6-12 Иисус Ирод ончылно. 13-25 Пушташ пунчалмаш. 26-43 Ыресеш пудален сакымаш. 44-49 Иисусын колымыжо. 50-56 Иисусым тойымаш.

¹ Тунам нуно чылан кынелыныт да Иисусым Пилат деке наҥгаеныт.

² Иисусым титаклаш тӱҥалыныт: «Ме ужынна: тиде Еҥ мемнан калыкым пудырата, кесарьлан йозакым тӱлаш чара, Шкенжым Христос-Кугыжа улам манеш».

³ Иисус деч Пилат йодын: «Тый иудей-влакын Кугыжашт улат?» Иисус вашештен: «Тый тидым каласышыч».

⁴ Архиерей-влаклан да калыклан Пилат ойлен: «Тиде Айдемым нимо шотыштат титаканым ом уж».

⁵ Но нуно ӱшандарен ойленыт: «Тудо калыкым пудыратылеш, уло Иудей мучко туныкта. Тӱҥалынже Галилей гыч, а ынде тышке толын».

⁶ Галилей нерген колмеке, Пилат йодын: «Тудо Галилей гыч мо?»

⁷ Иисус Иродын кучымо кундем гыч улмым пален налмеке, Тудым Ирод деке колтен. Тиде жапыште Ирод шкежат Иерусалимыште лийын.

⁸ Ирод шукертак Иисусым ужнеже улмаш, сандене, Тудым ужмеке, чот куанен. Иисус нерген ончычак шуко колын улмаш, да ынде иктаж-могай палдарыше палым ончыктыжо, шонен.

⁹ Иисуслан шуко йодышым пуэден, но Иисус нимом вашештен огыл.

¹⁰ Архиерей ден закон туныктышо-влак туштак шогеныт да Тудым чот титакленыт.

¹¹ Иродат шке сарзыж-влак дене пырля Тудым намыслен да воштылын, а вара чапле вургемым чиктен да Пилат деке мӧҥгеш колтен.

¹² Тиде кечын Ирод ден Пилат йолташыш савырненыт, ондакше икте-весе дене тушман лийыныт.

¹³ Архиерей да вуйлатыше-влакым, тыгак калыкым поген,

¹⁴ Пилат нунылан ойлен: «Калыкым пудыратылше семын те тиде Айдемым мый декем конденда. Теве мый тендан ончылно Тудым шымлен лектым, но тендан титаклыме дене келшыше ик титакшымат шым му.

¹⁵ Иродат муын огыл, Тиде Еҥым тудын деке колтенам. Пушташ йӧрышым Тудо нимом ыштен огыл.

¹⁶ Мый Тудым сола дене кыраш кӱштем, а вара колтем».

¹⁷ А Пилатлан кучен петырыме-влак кокла гыч иктыжым нунылан пайрем годым эрыкыш колташ кӱлын.

¹⁸ Но уло калык кычкыраш тӱҥалын: «Тудлан колымаш! А мыланна Вараввам луктын колто!»

¹⁹ Олаште ала-могай пуламырым нӧлтымылан да еҥым пуштмылан Вараввам петырен шындыме улмаш.

²⁰ Иисусым эрыкыш лукташ шонен, Пилат угыч нунылан ойлен.

²¹ А нуно кычкыреныт: «Пудален саке! Ыресеш пудален саке!»

²² Кумшо гана Пилат каласен: «Могай осалым Тудо ыштен? Тудым пушташ мый нимогай амалым ом уж. Тудым сола дене кыраш кӱштем, вара колтем».

²³ Иисусым ыресеш пудален сакаш манын нуно, чот кычкырен, пеҥгыдын шогеныт. Мучашлан, архиерей-влак дене пырля кычкырен сеҥеныт.

²⁴ Пилат нунын йодмыштым шукташ шонен пыштен.

²⁵ Пуламырым нӧлтымылан да еҥым пуштмылан казаматыш шындымым нунын йодмышт почеш эрыкыш луктын, а Иисусым шонымышт семын пушташ пуэн.

²⁶ Кунам Иисусым наҥгаеныт, Кириней гыч Симоным руалтен кученыт. Тудо пасу гыч пӧртылеш улмаш. Ӱмбакыже ыресым пыштеныт да Иисус почеш нумал наҥгайыктеныт.

²⁷ Иисус почеш моткоч шуко еҥ каен, Тудын верч ойгырен шортшо ӱдырамаш-влакат лийыныт.

²⁸ Иисус нунын велке савырнен да каласен: «Иерусалимын ӱдыржӧ-влак, Мыйын верч ида шорт. Шкендан верч да йочада верч шортса.

²⁹ Тугай жап толеш, кунам ойлаш тӱҥалыт: ”Йочам ыштен кертдыме, азам ыштыдыме да чызым пукшыдымо-влак пиалан улыт”.

³⁰ Тунам курык-влаклан ”Мемнан ӱмбаке камвочса!”, чоҥга-влаклан ”Мемнам леведса!” манын ойлаш тӱҥалыт.

³¹ Ужар пушеҥге дене тыге ыштат гын, кукшыж дене мо лиеш?»

³² Иисус дене пырля пушташ осалым ыштыше кок еҥымат наҥгаеныт.

³³ А кунам Саҥга манме верыш толыныт, тушто Иисусым да осалым ыштыше-влакым ыресеш пудаленыт – иктыжым пурла могыреш, весыжым шола могыреш.

³⁴ Иисус ойлен: «Ачай, титакыштым кудалте, нуно мом ыштат, огыт умыло». Шывагам кучен, Тудын вургемжым шеледеныт.

³⁵ Калык ончен шоген. Вуйлатыше-влакат нунын дене пырля игылт воштылыныт да ойленыт: «Тиде Айдеме молым утарен. Тудо Христос, Юмын Ойырен налмыже гын, тек ынде Шкенжым утара!»

³⁶ Сарзе-влакат Тудым игылтыныт. Лишемыныт, уксусым темленыт

³⁷ да ойленыт: «Тый иудей-влакын Кугыжашт улат гын, Шкендым утаре!»

³⁸ Тудын вуйжо ӱмбалне грек, рим да еврей буква дене возымо лийын: «Тиде – иудей-влакын Кугыжашт».

³⁹ Пудален сакыме осал еҥ кокла гыч иктыже Тудым мыскылен ойлен: «Тый Христос улат гын, Шкендым Шке да мемнамат утаре!»

⁴⁰ А весыже тудым шылтален ойлен: «Тый Юмо деч от лӱд мо? Шкендымат тыгак мутым кучыктат!

⁴¹ Мемнам чын судитленыт, ме пашаланна келшышын налынна, а Тудо нимом удам ыштен огыл».

⁴² Вара Иисуслан каласен: «Господь, шке Кугыжанышкет мийымекет, мыйым шарналте!»

⁴³ Иисус тудлан вашештен: «Тыланет чынак ойлем: тачак Мый денем пырля райыште лият».

^44-45 Кудымшо шагат наре лийын. Кече пычкемышалтын, пӱтынь мланде ӱмбалне индешымше шагат марте пычкемыш лийын. Храмысе пӱрдыш тунам покшеч кушкедлен.

⁴⁶ Иисус уло йӱкын кычкыралын: «Ачай, Тыйын кидышкет чонем пуэм!» Тидым ойлымеке, чонжо лектын.

⁴⁷ Шӱдывуй, мо лиймым ужмеке, Юмым чапландарен да ойлен: «Тиде Айдеме чынжымак чын ыштыше улмаш».

⁴⁸ Пудален сакымым ончаш погынышо-влак, мо лиймым ужмеке, шкеныштым оҥ гыч кырен, мӧҥгышкышт шаланен каеныт.

⁴⁹ Иисусын чыла палымыже, тыгак Галилей гыч Тудын почеш толшо ӱдырамаш-влак, ӧрдыжтӧ шогеныт да тидым онченыт.

⁵⁰ Теве Иосиф лӱман еҥ толын. Тудо Синедрионын еҥже лийын, поро, чын ыштыше айдеме.

⁵¹ Тудо Синедрионын пунчалже да пашаже дене келшен огыл. Иосиф иудей-влакын Аримафей олашт гыч лийын да Юмын Кугыжанышым вучен.

⁵² Тудо Пилат деке толын да Иисусын капшым йодын.

⁵³ Иосиф капшым волтен, йытын вынереш вӱдылын да кӱ курык саҥгаш кӱнчымӧ шӱгар рожыш пыштен. Тиде шӱгареш иктымат эше пыштен огытыл.

⁵⁴ Тунам кугарня лийын, шуматкече тӱҥалшаш улмаш.

⁵⁵ Иисус дене пырля Галилей гыч толшо ӱдырамаш-влакат Иосиф почеш коштыныт да шӱгарым, Иисусын капшым тушко кузе пыштымым онченыт.

⁵⁶ Олашке пӧртылмеке, тӱрлӧ тамлын ӱпшышым да миром ямдыленыт. Законын кӱштымым шуктен, нуно шуматкечын каненыт.