Лк 22 - У Сугынь

22 ГЛАВА 1-6 Иисус ваштареш шолып мутланен келшымаш. 7-13 Кугечылан ямдылалтмаш. 14-23 Святой кас кочкыш. 24-30 Кӧжӧ кугурак. 31-34 Петрын кораҥмыжым ончык ужын ойлымаш. 35-38 Окса калта, сумка да керде. 39-46 Елеон курыкышто Иисусын кумалмыже. 47-53 Иисусым кучен наҥгайымаш. 54-62 Петрын кораҥмыже. 63-65 Сарзе-влакын игылт воштылмышт да орландарымышт. 66-71 Синедрион ончылно.

¹ Кугече манын лӱмдымӧ Шергинде пайрем лишемын.

² Архиерей ден закон туныктышо-влак Иисусым пытараш йӧным кычалыныт, но калык деч лӱдыныт.

³ А латкок тунемшыж гыч иктын, Искариот манме Иудан кӧргыш, сатана пурен.

⁴ Иудаже архиерей да оролышо-влакын вуйлатышышт деке каен, Иисусым нунылан кузе ужален кучыктымо нерген мутланен.

⁵ Нуныжо куаненыт да тудлан оксам пуаш сӧреныт.

⁶ Иуда келшен да Иисусым калык уке годым ужалаш йӧнан жапым кычалаш тӱҥалын.

⁷ Шергинде кече толын шуын, тунам кугече пачам шӱшкылман улмаш.

⁸ Петр ден Иоаннлан Иисус каласен колтен: «Кайыза да мыланна кугече кочкышым ямдылыза».

⁹ Нунышт йодыныт: «Кушан Тый ямдылыктынет?»

¹⁰ Иисус вашештен: «Кунам олаш пуреда, кувшин дене вӱдым нумал кайыше еҥым вашлийыда. Почешыже кайыза. Кудо пӧртыш пура, тушко пурыза.

¹¹ Сурт озалан каласыза: ”Туныктышына тый дечет йодеш: ’Мылам тунемшем-влак дене кугече кочкышым кочкаш пӧлемет кушто?’”

¹² Тудо тыланда йоҥгыдо да ӱштын шындыме кӱшыл пӧлемым ончыкта, тушан ямдылыза».

¹³ Нуно каеныт. Кузе Иисус ойлен, чылажат тугак лийын, да кугече кочкышым ямдыленыт.

¹⁴ Жап шумеке, Иисус ӱстелтӧреш верланен, а Тудын дене пырля – латкок Апостол.

¹⁵ Нунылан Иисус каласен: «Орлыкым чытымем деч ончыч Мый тендан дене тиде кугече кочкышым моткоч кочнем ыле!

¹⁶ Тыланда ойлем: Юмын Кугыжаныште тудо шукталтмешке, тылеч вара Мый тудым ом коч».

¹⁷ Иисус чашым налын, тауштен да ойлен: «Тидым налза да шке коклаштыда пайлыза.

¹⁸ Тыланда ойлем: Юмын Кугыжаныш толмешке, виноград саска гыч ыштымым ом йӱ».

¹⁹ Вара киндым налын, тауштен да тодылын, тунемшыж-влаклан пуэн да каласен: «Тиде тендан верч пуымо Капем. Мыйым шарнен, тыге ыштыза».

²⁰ Кас кочкыш деч вара Иисус чашым тыгак налын да ойлен: «Тиде чаше – тендан верч йоктарыме Мыйын Вӱрем гоч пуымо у сугынь.

²¹ А теве Мыйым ужалышын кидше Мыйын кидем дене пырля ӱстембалне.

²² Чын, Айдеме Эрге ончылгоч палемдыме корным эртышаш. Но кӧ Тудым ужала, тудо айдемылан – ойго!»

²³ Тидым кӧ ышта манын, нуно икте-весе деч йодышташ тӱҥалыныт.

²⁴ Тунемшыж-влак, шке коклаштышт кӧжӧ кугураклан шотлалтшаш манын, ӱчашаш тӱҥалыныт.

²⁵ Но Иисус нунылан каласен: «Калык-влакын кугыжашт нунын дене озаланат, да власть улшан-влакым ”порым ыштыше” маныт.

²⁶ А тендан тыге ынже лий. Тек тендан коклаште кугуракше изирак гай лиеш, а вуйлатышыже – тарзе гай.

²⁷ Кӧжӧ кугурак: ӱстелтӧрыштӧ улшо але тудым ончышо? Ӱстелтӧрысӧ огыл мо? Но теве Мый тендан коклаште тарзе гай улам.

²⁸ А тергымаш-влакым чытымем годым те Мый денем пырля кодында.

²⁹ Сандене Ачам Мылам пуымо семынак Мыят тыланда Кугыжанышым пуэм,

³⁰ да те Мыйын Кугыжаныште ӱстелтӧрыштем кочкыда-йӱыда, престолышто шинчаш да Израильын латкок йыжыҥ тукымжым судитлаш тӱҥалыда».

³¹ А Господь ойлен: «Симон, Симон, сатана тендам шыдаҥ семын шоктын ойыраш йодын.

³² Но ӱшанымашет ынже пыте манын, Мый тыйын верч кумалынам. Пӧртылмекет, иза-шольо-влакетын ӱшанымашыштым пеҥгыдемде».

³³ Петр каласен: «Господь, мый Тый денет казаматышкат, колашат каяш ямде улам!»

³⁴ Иисус вашештен: «Петр, тылат ойлем, таче агытан муралтымешке, Мыйын нерген тый кум гана ”Тудым ом пале” манат».

³⁵ Иисус нунын деч йодын: «Кунам Мый тендам окса калта, сумка да йолчием деч посна колтенам, тыланда иктаж-мо ситен огыл мо?» Нуно вашештеныт: «Чыла ситен».

³⁶ Иисус каласен: «Но ынде, кӧн окса калтаже уло, тудым налже, сумкамат налже, а кӧн кердыже уке, тек шке вургемжым ужала да налеш.

³⁷ Возымо: ”Законым пудыртышылан шотленыт”. Тыланда ойлем: тиде шомак Мыйын илышыштем шукталтшаш. Мыйын шотышто чылажат мучашыш шуэш».

³⁸ Нуно каласеныт: «Господь, теве тыште кок керде!» Иисус вашештен: «Сита!»

³⁹ Иисус лектын да молгунамсе семынак Елеон курыкыш каен. Почешыже тунемшыж-влак миеныт.

⁴⁰ Верышке миен шумеке, Тудо нунылан каласен: «Алгаштаралташ огыл манын, сӧрвален кумалза».

⁴¹ А Шкеже нунын деч кӱм шуымо наре торлен да, сукен шинчын, кумалын:

⁴² «Ачай! Тиде чашым Мый дечем кораҥден наҥгаяш шонет ыле гын! Но тек Мыйын шонымо семын огыл, а Тыйын эрыкет семын лиеш».

⁴³ Пылпомыш гыч Суксо кончен да Тудлан вийым пуэн.

⁴⁴ Йӧсланымыж дене Иисус эшеат чот кумалын, Тудын пӱжвӱдшӧ мландышке йогышо вӱр чӱчалтыш гай лийын.

⁴⁵ Кумалмеке, Тудо кынелын, тунемшыж-влак деке пӧртылын да ужын: нуно ойгырымышт дене мален колтеныт.

⁴⁶ Тудо нунылан каласен: «Те молан маледа? Кынелза да, алгаштаралташ огыл манын, сӧрвален кумалза».

⁴⁷ Тудо але ойленат пытарен огыл, калык тӱшка толын лектын, а ончылно латкокыт гыч иктыже, Иуда лӱманже, ошкылын. Тудо, шупшалаш манын, Иисус деке лишемын. Иисусым тыге палдараш лийын улмаш: «Кӧм мый шупшалам, Тудо – Иисус».

⁴⁸ Иисус тудлан каласен: «Иуда, Айдеме Эргым шупшалмет дене ужалет мо?»

⁴⁹ Иисус йыр шогышо тунемшыж-влак, мо лийшашым ужмеке, каласеныт: «Господь, керде дене руалаш гын веле?»

⁵⁰ Нунын кокла гыч иктыже архиерейын тарзыжын пурла пылышыжым руал ойырен.

⁵¹ «Сита, чарныза!» – Иисус каласен, тарзын пылышыжым тӱкалтен да паремден.

⁵² А Шкенжын ӱмбаке погынен толшо архиерей, храм орол вуйлатыше да калык кугурак-влаклан каласен: «Аген коштшо ӱмбаке лекмыла, кердым, шугыньым налын толында.

⁵³ Мый кече еда храмыште тендан коклаште лийынам, но те Мыйын ӱмбакем кидым нӧлталын огыдал. А кызыт тендан жапда да пычкемышын властьше».

⁵⁴ Нуно Иисусым кученыт да архиерейын пӧртышкыжӧ наҥгаеныт. Петр ӧрдыжтырак почешышт ошкылын.

⁵⁵ Кудывече покшелне тулым олтеныт, еҥ-влак тул йыр шинчыныт, Петрат коклашкышт шинчын.

⁵⁶ Тудым тул воктене шинчышым ужмеке да тӱткын ончалмеке, ик тарзе ӱдыр каласен: «Тиде еҥат Тудын дене пырля лийын».

⁵⁷ Но Петр шӧрен ойлен: «Ӱдырамаш, мый Тудым ом пале!»

⁵⁸ Изиш варарак вес еҥ тудым ужын да каласен: «Тыят нунын кокла гыч улат». Петр вашештен: «Айдеме, мый нунын кокла гыч омыл!»

⁵⁹ Шагат наре эртен, эше икте ӱшандарен ойлен: «Чынжымак, тиде еҥат Тудын дене лийын, вет тудо Галилей гычак».

⁶⁰ Петр вашештен: «Мо нерген тый ойлет, ом пале». Тунамак, тидым ойлымыж годым, агытан муралтен.

⁶¹ Господь, савырналын, Петр ӱмбаке ончалын. Петр Господьын кузе ойлымыжым шарналтен: «Агытан муралтымешке, Мыйым ом пале манын, тый кум гана каласет».

⁶² Петр тушечын лектын да чон йӧсын шортын.

⁶³ Иисусым оролен кучышо-влак Тудым игылт воштылыныт да кыреныт.

⁶⁴ Тудын шинчажым петыреныт, шӱргӧ гыч совкаленыт да йодыныт: «Пророк улат гын, кӧ Тыйым совыш – каласе!»

⁶⁵ Тудым шуко тӱрлӧ вес шомак денат мыскыленыт.

⁶⁶ Кече лекмеке, калыкын кугуракше, архиерей да закон туныктышо-влак погыненыт, Иисусым Синедрионышт ончыко наҥгаеныт.

⁶⁷ Нуно йодыныт: «Тый Христос улат гын, мыланна каласе». Иисус вашештен: «Тыланда каласем гын, те огыда ӱшане.

⁶⁸ А Шке тендан деч йодам гын, огыда вашеште да Мыйым огыда колто.

⁶⁹ Но тылеч вара Айдеме Эрге куатан Юмын пурла могырыштыжо шинчаш тӱҥалеш».

⁷⁰ Чылан йодыныт: «Тугеже тый Юмын Эрге улат?» Иисус вашештен: «Тиде Мый улам манын, те ойледа».

⁷¹ Тунам нуно каласеныт: «Молан мыланна эше таныклыме кӱлеш? Ме тидым Шкеж дечак колна!»