Лк 21 - У Сугынь

21 ГЛАВА 1-4 Тулык ӱдырамашын надырже. 5-6 Храмым шалатыме нерген ончык ужын каласымаш. 7-19 Эҥгекын тӱҥалмыже. 20-24 Иерусалимым шалатыме нерген ончык ужын каласымаш. 25-28 Айдеме Эргын толмыжо. 29-38 Смоква пушеҥгын туныктымыжо. Ида мале.

¹ Ончалынат, Иисус надыр оксам оптымо верыш поян-влакын надырым пыштымыштым ужын.

² Кок лепта оксам пыштыше йорло тулык ӱдырамашымат ужын

³ да каласен: «Тыланда чынак ойлем: тиде йорло тулык ӱдырамаш чыла деч шуко пыштен.

⁴ Чылан нуно утен кодшышт деч Юмылан надырым ойыреныт, а тудо шкенжын йорлылыкшо деч илышлан кӱлешыжым чыла пыштен».

⁵ Могай мотор кӱ да шергакан пӧлек дене сӧрастарыме манын, южышт храм нерген ойленыт. Тунам Иисус каласен:

⁶ «Мом те кызыт ужыда, тудо шалатыме лиеш. Жап шуэш, тыште кӱ ӱмбалан кӱ ок код».

⁷ Иисус деч йодыныт: «Туныктышо, а тидыже кунам лиеш? Тиде вашке лийшашым могай палдарыше пале шижтара?»

⁸ Иисус вашештен: «Тендам ынышт ондале манын шекланыза. Мыйын лӱмем дене шукын толыт да ойлаш тӱҥалыт: ”Тиде Мый улам”, ”Жап лишемын!” Нунын почеш ида кай.

⁹ Кунам сар ден пуламыр нерген колыда, ида лӱд. Ондак тыге лийшаш, но иканаште мучаш ок лий».

¹⁰ Вара нунылан Иисус каласен: «Калык ваштареш калык кынелеш, кугыжаныш ваштареш – кугыжаныш.

¹¹ Тӱрлӧ вере моткоч кугу мланде чытырналтмаш лиеда, шужымаш да мор шарла, лӱдыктышӧ да ӧрыктарыше кугу палдарыше пале-влак пылпомыш гыч лийыт.

¹² Но чыла тиде лиймешке, тендан ӱмбаке кидым нӧлталаш да поктылаш тӱҥалыт. Мыйын лӱмемлан кӧра тендам синагоглаште судитлаш да казаматыш шындаш кондат, кугыжа да вуйлатыше-влак ончыко намият.

¹³ Тунам те Мыйын нерген таныкледа.

¹⁴ Шкендам арален ойлымо нерген ончылгоч ида азаплане манын, шӱмышкыда пыштыза.

¹⁵ Мый тыланда тугай ушым да шомакым пуэм, ваштареш шогышо ик еҥат мутдам ӱчашен сеҥен але шомакланда тореш ойлен ок керт.

¹⁶ Тендам ача-авадат, иза-шольыдат, родо-тукымда да йолташда-влакат ужалат. Тендан кокла гыч южыштым пуштыт,

¹⁷ да Мыйын лӱмем верчын тендам чыланат ужмышудымо лийыт.

¹⁸ Но тендан вуй гычда ик ӱп пырчат ок йом.

¹⁹ Чытымыда дене шке чондам утарыза.

²⁰ Кунам Иерусалимым сарзе-влак йыр авырен налмым ужыда, палыза: тудын пытыме жапше толын шуын.

²¹ Иудейыште улшо-влак тунам тек курыкыш куржыт. А кӧ олаште – тек тудым коден кая, а кӧ воктенже, тек тушко ок пуро.

²² Тидыже ӱчым шуктымо кече-влак улыт: Возымаште мом каласыме, тунам чыла шукталтеш.

²³ Ойго лиеш тудо кечылаште мӱшкыран ӱдырамаш ден чызым пукшышо ава-влаклан! Тиде мландыште кугу нелылык лиеш, тиде калык ӱмбаке шыде возеш:

²⁴ шукышт пӱсӧ керде йымалан колат, весыштым чыла калык коклашке пленыш наҥгаят. Чын Юмым палыдыме-влак, нунын жапышт мучашыш шумешке, Иерусалимым тошкаш тӱҥалыт.

²⁵ Кечыште, тылзыште да шӱдырлаште палдарыше пале-влак лийыт. Теҥыз лӱшка, пудырана, да мланде ӱмбалсе калык-влакым кугу тургыжланымаш, йӧсылык авалта.

²⁶ Тӱняшке шучкылык лишеммым ужын, еҥ-влак лӱдын вучымышт дене колышаш гай лийыт, вет кавасе вий-влак вер гыч тарванат.

²⁷ Тунам еҥ-влак Айдеме Эргын кугу куат да чап дене пыл ӱмбалне толмыжым ужыт.

²⁸ Кунам тиде шукталташ тӱҥалеш, кынелза да вуйдам нӧлталза: тендам эрыкыш лукмо жап лишемеш».

²⁹ Иисус нунылан туштен каласен: «Ончалза смоквам да моло пушеҥгым.

³⁰ Кунам нунын лышташышт лекмым ужыда, те паледа: вашке кеҥеж толеш.

³¹ Тыштат тыгак: кунам ойлымемын шукталтмыжым ужыда, Юмын Кугыжаныш лишне улмым палыза.

³² Тыланда чынак ойлем: чыла тиде лиймешке, тиде тукым ок пыте.

³³ Кава ден мланде пытат, но Мыйын шомакем огеш пыте.

^34-35 Тыгеже, шекланыза, руштмо, чот йӱмӧ, тысе илыш верч тургыжланыме дене шӱмда ынже нелем, уке гын, тиде кече тендам вапшла вучыдымын леведеш, вет тиде кече тӱня кумдыкысо чыла илыше ӱмбаке толеш.

³⁶ Чыла тиде лийшашым чытен лекташ да Айдеме Эрге ончыко шогалаш йӧрышӧ лияш манын, эре шекланен шогыза да кумалза».

³⁷ Кече еда Иисус храмыште туныктен, а йӱдым, ола гыч лектын, Елеон манме курыкышто эртарен.

³⁸ А эрдене эрак уло калык Тудым колышташ храмыш погынен.