Лк 2 - У Сугынь

2 ГЛАВА 1-7 Иисусын шочмыжо. 8-21 Кӱтӱчӧ да Суксо-влак. 22-38 Иисусым храмыш кондат. 39-40 Назаретыш пӧртылмаш. 41-52 Латкок ияш Иисус храмыште.

¹ Тиде жапыште Август кесарь деч калыкым уло мланде мучко шотлен возаш кӱштымаш лектын.

² Тиде икымше шотлен возымашым Квиринийын Сирийыште вуйлатымыж годым эртареныт.

³ Чылан шке тукымыштын олашке возалташ каеныт.

⁴ Иосиф Давидын родо-тукымжо гыч лийын, сандене Галилейысе Назарет ола гыч Иудейышке, Давидын Вифлеем лӱман олашкыже, каен.

⁵ Возен шотлымашке Иосиф тудлан сӧрымӧ Мария ӱдыр дене пырля каен. Мария нелемше улмаш.

⁶ А кунам нуно Вифлеемыште лийыныт, Мариялан азам ышташ жап шуын.

⁷ Мария Икымше Шочшыжым, Эргым, ыштен, Тудым вӱдылын, шудо шерчаш пыштен. Унапӧртыштӧ нунылан вер лийын огыл.

⁸ Тудо кундемыште кӱтӱчӧ-влак пасушто лийыныт, нуно йӱдым кӱтӱм ороленыт.

⁹ Теве ончыкышт Господьын Суксыжо лектын да Господьын чапше нуным волгалтарен. Кӱтӱчӧ-влак чот лӱдыныт,

¹⁰ но Суксо каласен: «Ида лӱд! Мый тыланда кугу куаным увертарем, тидыже уло калыклан йывыртымаш лиеш:

¹¹ таче Давидын олаштыже тыланда Утарыше – Христос, Господь – шочын.

¹² Теве тыланда пале: те вӱдыл пыштыме Азам муыда, Тудо шудо шерчаште кия».

¹³ Кенета тиде Суксо дене пырля пылпомышсо сарзе-влак шукын лектыныт да Юмым чапландареныт:

¹⁴ «Юмылан кӱшнӧ чап лийже! Мландӱмбалне тыныслык, еҥ-влак дене Юмын поро кумылжо!»

¹⁵ Суксо-влакын пылпомышко пӧртылмекышт, кӱтӱчӧ-влак икте-весыштлан ойленыт: «Айста Вифлеемыш каена, Господь мо нерген увертарымым, тушто мо лиймым ончалына».

¹⁶ Нуно вашкен каеныт, мийымекышт, Мариям, Иосифым да шудо шерчаште кийыше Азам муыныт.

¹⁷ Нуным ужмекышт, тиде Йоча нерген Суксын мом ойлымыжым каласкаленыт.

¹⁸ Тидым колшо-влак кӱтӱчӧ-влакын каласкалымыштлан чылан чот ӧрыныт.

¹⁹ А Мария чыла тидым шӱмышкыжӧ пыштен да арален.

²⁰ Мом ужмо-колмыштлан Юмым моктен да чапландарен, кӱтӱчӧ-влак мӧҥгеш пӧртылыныт. Чылажат Суксо каласыме семынак лийын.

²¹ Кандашымше кече шумеке, кунам Азалан пӱчмӧ йӱлам эртараш жап шуын, тудлан Иисус лӱмым пуэныт. Аважын нелеммыж деч ончычак Суксо Тудым тыге лӱмден.

²² Моисейын законжо почеш эрныме йӱлам эртарыме кече шумеке, Иисусым, Господь ончык намияш манын, Иерусалимыш конденыт,

²³ вет Господьын законыштыжо возымо: «Эн ондак шочшо кажне эрге аза Господьлан святитлыме лийшаш».

²⁴ Тыгак нуно Господьын законышто ойлымо семын кок кедым але кок кӧгӧрчен игым надырлан пуышаш улыт улмаш.

²⁵ Иерусалимыште Симеон лӱман чын ыштыше да Юмым пагалыше еҥ лийын. Тудо Израильым лыпландарымым вучен, да ӱмбалныже Святой Шӱлыш лийын.

²⁶ Господьын Христосшым ужмо деч ончыч колымашым от уж манын, Симеонлан Святой Шӱлыш увертарен.

²⁷ Шӱлышын кумылаҥдымыж дене тудо храмыш толын. Кунам Иисусын ача-аваже, законышто возымо йӱлам Тудын шотышто шукташ манын, Азам тушко конденыт,

²⁸ Симеон Тудым кидышкыже налын, Юмым моктен каласен:

²⁹ «Ынде, Господь, шомакетым шуктен, шке тарзетым тыныслык дене колтет:

³⁰ мыйын шинчам Тыйын пуымо утарымашым ужо,

³¹ тудым Тый чыла калык ончылно ямдыленат.

³² Тудо чын Юмым палыдыме-влаклан чыным почшо волгыдо, Тыйын Израиль калыкетлан чап лиеш».

³³ Иисус нерген мом ойлымылан Иосиф ден Азан Аваже ӧрыныт.

³⁴ Симеон нуным благословитлен, а Азан Мария Аважлан каласен: «Теве Тудлан кӧра Израильыште шуко еҥ камвочшаш да шуко еҥ кынелшаш. Тудо ӱчашымашлан амал лиеш.

³⁵ Тыге шукыштын шӱмеш шылтыме шонымашышт почылтеш. Тыйынат чонет вошт керде эрта».

³⁶ Туштак Асир тукым гыч Фануилын Анна пророк ӱдыржӧ лийын. Тудо пешак шоҥго улмаш. Ӱдыр жапше деч вара Анна шым ий марийже дене пырля илен,

³⁷ а вара кандашле ныл ий теммешке тулык лийын илен. Храм деч тудо кораҥын огыл, йӱдшӧ-кечыже кумалын да пӱтым кучен Юмылан служитлен.

³⁸ Тиде жапыште Анна нунын деке миен да Юмым моктен, Иерусалимыште утарымым вучышо-влаклан чылаштлан Иисус нерген каласкален.

³⁹ Господьын законжо почеш чыла ыштымеке, нуно Галилейышке, шкеныштын Назарет олашкышт, пӧртылыныт.

⁴⁰ Йоча кушкын, шӱм-чон шӱлышыжӧ пеҥгыдемын, ушым поген. Юмын порылыкшо Тудын дене лийын.

⁴¹ Иисусын ачаж ден Аваже кажне ийын Иерусалимыш Кугече пайремыш коштыныт.

⁴² Тудлан латкок ий теммеке, нуно йӱла почеш ончычсо семынак Иерусалимыш пайремыш миеныт.

⁴³ Пайрем кече-влак пытымеке, нуно мӧҥгышкышт каеныт, а Рвезе Иисус Иерусалимеш кодын. Тидым Иосиф ден Тудын Аваже пален огытыл,

⁴⁴ Тудо пырля мийыше-влак дене ошкеда, шоненыт. Тыге нуно кечыгут каеныт, вара Эргыштым родо-тукым да палыме коклаште кычалаш тӱҥалыныт.

⁴⁵ Иисусым муын огытылат, Иерусалимыш пӧртылыныт да Тудым тушто кычалыныт.

⁴⁶ Иисусым кум кече гыч храмыште муыныт. Тудо туныктышо-влак коклаште шинчен, нуным колыштын да йодышым пуэден.

⁴⁷ Иисусым колыштшо-влак чылан Тудын уш-акылжылан да вашештымыжлан ӧрыныт.

⁴⁸ Тудым ужмеке, ачаж ден Аваже чот ӧрыныт. Аваже Тудлан ойлен: «Эргым, молан Тый мемнан дене тыге ыштенат? Тыйын ачат да Мый, чот ойгырен, Тыйым кычалынна».

⁴⁹ Тудо нунылан каласен: «Молан те Мыйым кычалында? Мо Ачамын, Мыйын тушто лийшашем але те пален огыдал?»

⁵⁰ Но нуно мом ойлымыжым умылен огытыл.

⁵¹ Иисус ачаж да Аваж дене пырля каен, Назаретыш пӧртылын да чыла шотыштат мутыштым колыштын. А Аваже чыла тидым шӱмыштыжӧ арален.

⁵² Иисус кушкын да ийгот ешаралтме семын ушым поген, Тудым Юмат, еҥ-влакат утларак да утларак йӧратеныт.