Лк 19 - У Сугынь

19 ГЛАВА 1-10 Йозакым погышо Закхей. 11-27 Лу мина окса нерген туштен ойлымаш. 28-44 Иисус Иерусалимыш пура. 45-48 Иисус храм гыч сатучо-влакым поктен луктеш.

¹ Иерихоныш пурымеке, Иисус ола гоч эртен.

² Туштак Закхей лӱман еҥ лийын, тудо йозак погышо-влакым вуйлатен, поян лийын.

³ Иисусым, Кӧ Тудо манын, пешак ужнеже улмаш, но изи капан улмыжлан калык шеҥгеч ужын кертын огыл.

⁴ Тунам тудо ончык куржын, Иисусым ужаш манын, Тудын эртышаш корно воктенсе смоква пушеҥгыш кӱзен.

⁵ Тиде верыш миен шумеке, Иисус кӱшкӧ ончалын, тудым ужын да каласен: «Закхей, писынрак воло! Мый таче тыйын мӧҥгыштет лийшаш улам».

⁶ Тудыжо писын волен да Иисусым, куанен, унам ыштен.

⁷ Тидым ужын, чылан ӧпкелен ойлаш тӱҥалыныт: «Языкан еҥ деке пурен!»

⁸ Закхей ончыко лектын да Господьлан каласен: «Господь, пел погем йорло-влаклан пуэм, а кӧ деч ондален налынам гын, ныл пачаш шукырак пӧртылтем!»

⁹ Иисус тудлан каласен: «Таче тиде пӧртыш утаралтмаш толын, вет тиде еҥат Авраамын эргыже.

¹⁰ А Айдеме Эрге йомшым кычал муаш да утараш толын».

¹¹ Тидым колыштшо-влаклан Иисус эше туштен каласкален, вет Тудо Иерусалим воктене лийын да, Юмын Кугыжаныш вашке толеш манын, еҥ-влак шоненыт.

¹² Иисус ойлен: «Лӱмлӧ тукым гыч лекше ик еҥ, кугыжа лийын пӧртылаш манын, мӱндыр элыш каен.

¹³ Кайымыж деч ончыч шкеж деке лу тарзыжым ӱжын, нунылан лу минам пуэн да каласен: ”Мыйын толмешкем, моштен кучылтса”.

¹⁴ Но тысе илыше-влакын тудым ужмышт шуын огылат, почешыже еҥ-влакым ”Тудо мемнан кугыжана ынже лий, тиде мыланна ок келше” манын каласаш колтеныт.

¹⁵ Кугыжа лийын пӧртылмекыже, кӧ мом ыштен налмым палаш манын, саде еҥ оксам налше тарзе-влакым шкеж деке ӱжаш кӱштен.

¹⁶ Икымше толын да каласен: ”Оза, тыйын ик минат лу мина парышым пуэн”.

¹⁷ ”Сай, поро тарзе, – тудлан кугыжа каласен. – Изи пашаште ӱшанле лийметлан мый тылат лу олам вуйлаташ пуэм.”

¹⁸ Кокымшо толын да каласен: ”Оза, тыйын ик минат вич мина парышым пуэн”.

¹⁹ Кугыжа тудлан каласен: ”Тыйым вич олам вуйлаташ шогалтем”.

²⁰ А кумшо толын да ойлен: ”Оза, теве тыйын минат. Шовычеш пӱтырал пыштен, мый тудым араленам.

²¹ Мый тый дечет лӱдынам. Тый чаманыдыме еҥ улат: мом пыштен отыл, налат, мом ӱден отыл, тудым тӱредат”.

²² Кугыжа тудлан каласен: ”Йӧрдымӧ тарзе, шке мутет денак тыйым судитлем. Тый паленат: мый чаманыдыме еҥ улам, мом пыштен омыл, налам, мом ӱден омыл, тудым тӱредам.

²³ Молан тый мыйын оксам торгайыше-влаклан пуэн отыл? Тунам мый, толмекем, оксам парыш дене налам ыле”.

²⁴ Вара воктенже шогышо-влаклан каласен: ”Тудын деч минам налза да, кӧн лу минаже уло, тудлан пуыза”.

²⁵ ”Оза, – каласеныт нунышт, – тудын лу минаже уло!”

²⁶ ”Мый тыланда ойлем: кӧн уло, тудлан пуалтеш, а кӧн уке, улыжат налалтеш.

²⁷ А нунын кугыжашт лиймем ваштареш шогышо тушманем-влакым тышке кондыза да ончылнем руал пуштса”».

²⁸ Тидым ойлымеке, Иисус умбакыже Иерусалим велке тайыл ваштареш кӱзен.

²⁹ Елеон манме курыкеш верланыше Виффагий ден Вифаний деке лишемме годым Иисус кок тунемшыжым колтен:

³⁰ «Ончылно койшо ялыш кайыза. Тушко пурымеке, йолыштен шогалтыме самырык оселым ужыда. Тудым але нигӧ нигунам кушкыжын огыл. Мучыштарыза да вӱден кондыза.

³¹ ”Молан мучыштареда?” манын, тендан деч иктаж-кӧ йодеш гын, тыге вашештыза: ”Тудо Господьлан кӱлеш”».

³² Колтымо тунемшыж-влак каеныт да Иисус каласыме семынак чыла лиймым ужыныт.

³³ Кунам нуно самырык оселым мучыштараш тӱҥалыныт, озаж-влак нунылан ойленыт: «Те молан оселым мучыштареда?»

³⁴ Нунышт вашештеныт: «Тудо Господьлан кӱлеш».

³⁵ Вара самырык оселым Иисус деке вӱден конденыт, тупшым вургемышт дене леведыныт да ӱмбакыже Иисусым шынденыт.

³⁶ Кайымыж годым еҥ-влак вургемыштым корнеш шареныт.

³⁷ Елеон курык гыч волаш тӱҥалме верыш Иисус миен шумо годым уло тунемшыж-влак куанымышт дене чыла ужмо чудылан кугу йӱкын Юмым мокташ тӱҥалыныт:

³⁸ «Тек Господь лӱм дене толшо Кугыжа моктымо лиеш! Пылпомышто тыныслык да кӱшнӧ чап лийже!»

³⁹ Калык тӱшкаште лийше фарисей-влак кокла гыч южышт Иисуслан каласеныт: «Туныктышо, тунемшет-влакым чаре!»

⁴⁰ Но Тудо нунылан каласен: «Тыланда ойлем, нуно шыпланат гын, кӱ-влак кычкыраш тӱҥалыт».

⁴¹ Иисус ола деке лишемын. Олам ужмеке, тудын верч шортын колтен

⁴² да каласен: «О, тыланет тыныслыкым мо конда, шке кечетын тыят палет ыле гын! Но кызыт тидым тыйын шинчат деч шылтыме.

⁴³ Теве тугай кече-влакым тыланет ужаш логалеш, кунам тушманет-влак йырет чашмам нӧлтат, тыйым авырен налыт да чыла могырым шыгыремдаш тӱҥалыт.

⁴⁴ Шке декет Юмо лишемме жапым пален отыл, сандене нуно тыйым мланде ӱмбаке сӱмыралыт да икшывет-влакым кырен пытарат да олмыштет кӱ ӱмбалан кӱм огыт кодо».

⁴⁵ Иисус храмыш пурен да тушто сатум ужалыше да налше-влакым поктен лукташ тӱҥалын.

⁴⁶ Нунылан ойлен: «Возымо: ”Мыйын пӧртем – кумалме пӧрт”, а те тудым агыше-влакын пыжашышкышт савыренда!»

⁴⁷ Иисус кече еда храмыште туныктен. Архиерей, закон туныктышо да калык вуйлатыше-влак Тудым пушташ йӧным кычалыныт.

⁴⁸ Но Тудын дене мом ышташ, нуно пален огытыл. Вет Иисус воктене эре калык лийын да тӱткын колыштын.