Лк 18 - У Сугынь

18 ГЛАВА 1-8 Тулык ӱдырамаш ден судья нерген туштен ойлымаш. 9-14 Фарисей ден йозак погышо нерген туштен ойлымаш. 15-17 Иисус да йоча-влак. 18-30 Поян вуйлатыше. 31-34 Иисус шке колымыж да ылыжмыж нерген кумшо гана каласкала. 35-43 Иерихон воктене сокыр кӱчызым паремдымаш.

¹ Нойыде эре кумалаш кӱлмӧ нерген Иисус тунемшыж-влаклан туштен каласкален:

² «Ик олаште судья лийын. Тудо Юмо деч лӱдын огыл, еҥ деч вожылын огыл.

³ Тиде олаштак тулык ӱдырамаш илен, судья деке шуко гана миен да ойлен: ”Мый денем тавалыше деч арален нал”.

⁴ Но тудыжо кужу жап нимом ынеж ыште улмаш, а вара шкаланже шке каласен: ”Мый Юмо дечат ом лӱд, еҥ дечат ом вожыл гынат,

⁵ тиде ӱдырамашым арален налам, вет тудо мылам ласкалыкым ок пу. Уке гын, тышке коштмыж дене мыйым нойыктара”».

⁶ Господь йодын: «Тиде чын огыл ыштыше судьян мом ойлымыжым те колыда?

⁷ Кеч вучыкта гынат, йӱдшӧ-кечыже полышым йодын сӧрвалыше, ойырен налме еҥже-влакым Юмо арален ок нал мо?

⁸ Тыланда ойлем: Тудо нуным вашке арален налеш. Но, толмекыже, Айдеме Эрге мланде ӱмбалне ӱшанымашым муэш мо?»

⁹ Чын ыштыше улына манын ӱшаныше да молыштым шотлыдымо южо еҥлан Иисус тыге туштен ойлен:

¹⁰ «Кок еҥ храмыш кумалаш пурен, иктыже фарисей лийын, весыже – йозак погышо.

¹¹ Фарисей шогалын да шке шотшо дене тыге кумалын: ”О, Юмо! Мый моло еҥ гай агыше, осалланыше, яжарланыше але тиде йозак погышо гай омыл, тидлан Тылат таум ыштем.

¹² Мый арнялан кок гана пӱтым кучем, ыштен налмем гыч луымшо ужашыжым Тылат пуэм”.

¹³ А йозак погышо ӧрдыжтырак шоген, шинчажымат пылпомышко ынеж нӧлтал улмаш, шкенжым оҥ гыч кырен ойлен: ”Юмо! Мыйым, языканым, чамане!”

¹⁴ Тыланда ойлем, фарисей огыл, а йозак погышо мӧҥгыжӧ чыныш лукмо пӧртылын. Вет шкенжым кӱшкӧ шындыше кеч-кӧат волтымо лиеш, а шкенжым ӱлыкӧ волтышо нӧлтымӧ лиеш».

¹⁵ Нунын деке тӱкныжӧ манын, Иисус деке изи йоча-влакымат нумал конденыт. Тидым ужын, тунемшыж-влак нуным чареныт,

¹⁶ но Иисус йоча-влакым Шкеж деке ӱжын каласен: «Йоча-влакым Мый декем пуртыза, нуным ида чаре, вет Юмын Кугыжаныш – нунын гай еҥ-влакын.

¹⁷ Тыланда чынак ойлем: кӧ Юмын Кугыжанышым йоча семын порын ок вашлий, тудо тушко пурен ок керт».

¹⁸ Вуйлатыше ик еҥ Иисус деч йодын: «Поро Туныктышо, курымашлык илышым налаш манын, мый мом ыштышаш улам?»

¹⁹ Иисус йодын: «Молан тый Мыйым поро манат? Юмо деч моло нигӧ поро огыл.

²⁰ Тудын кӱштымыжым тый палет: ит яжарлане, ит пушт, ит шолышт, шойыштын, еҥ ӱмбаке таныклен ит ойло, ача-аватым пагале».

²¹ Тудыжо Иисуслан вашештен: «Мый чыла тидым самырык годсекак шуктем».

²² Тидым колмеке, Иисус каласен: «Тылат эше икте ок сите: мо тыйын уло, чыла ужале да оксажым йорло-влаклан шеледен пу. Тунам пылпомышто тыйын поянлыкет лиеш. Вара тол да почешем кае».

²³ Тудыжо, тидым колмеке, чот ойганен. Тудо пешак поян лийын.

²⁴ Иисус, тудын ойганымыжым ужын, тыге каласен: «Поян еҥлан Юмын Кугыжанышыш пураш кунар йӧсӧ!

²⁵ Верблюдлан имышу вошт лекташ куштылго огыл, а поянлан Юмын Кугыжанышыш пураш эшеат нелырак».

²⁶ Колыштшо-влак Иисус деч йодыныт: «Тыгеже, кӧ утаралт кертеш?»

²⁷ Иисус вашештен: «Мом айдеме ыштен огеш керт, Юмо кертеш».

²⁸ Тунам Петр каласен: «А теве ме, чыла коден, Тыйын почешет каенна».

²⁹ «Тыланда чынак ойлем, – каласен Иисус, – кӧ гына Юмын Кугыжаныш верч пӧртым, ача-авам, иза-шольым, ака-шӱжарым, ватым але йоча-влакым коден,

³⁰ тудо кызытсе курымышто ятыр пачаш шуко налеш, а шушаш курымышто курымаш илышым налеш.»

³¹ Иисус латкок тунемшыжым Шкеж деке ӱжын да нунылан каласен: «Теве ме Иерусалимыш миен шуына, да Айдеме Эрге нерген пророк-влакын возымышт чылажат шукталтеш.

³² Тудым чын Юмым палыдыме-влакын кидыш пуат, игылташ, вурсаш, ӱмбакыже шӱведаш тӱҥалыт.

³³ Сола дене кырымеке, Тудым пуштыт, но кумшо кечын ылыж кынелеш».

³⁴ Но тунемшыж-влак тиде ойлымо гыч нимом умылен огытыл. Иисусын каласымаште мо нерген ойлымо, нунын деч шылтыме лийын, сандене ыҥлен огытыл.

³⁵ Кунам Иисус Иерихон деке лишемын, корно воктене ик сокыр йодышт шинчен.

³⁶ Воктечше еҥ тӱшка эртымым колмеке, йодын: «Мо тиде тыгай?»

³⁷ Тудлан Назорей Иисус эрта манын вашештеныт.

³⁸ Сокыр кычкыраш тӱҥалын: «Иисус, Давидын Эргыже! Мыйым серлаге!»

³⁹ Ончылно кайыше-влак тудлан шып лияш кӱштеныт, но тудо эшеат чот кычкырен: «Давидын Эргыже! Мыйым серлаге!»

⁴⁰ Иисус шогалын да тудым Шкеж деке кондаш кӱштен. Сокыр лишеммеке, Иисус тудын деч йодын:

⁴¹ «Тый Мый дечем мом ыштымым вучет?» «Господь, шинчам почылтшо», – вашештен тудо.

⁴² Иисус тудлан каласен: «Шинчат почылтшо! Тыйым ӱшанымашет утарен».

⁴³ Сокыр тунамак ужаш тӱҥалын да, Юмым чапландарен, Иисус почеш каен. Тидым ужын, уло калык Юмым моктен.