Лк 16 - У Сугынь

16 ГЛАВА 1-15 Ондалыше озанлык виктарыше нерген туштен каласымаш. 16-18 Закон да Юмын Кугыжаныш. 19-31 Поян ден Лазарь.

¹ Иисус тунемшыж-влаклан каласен: «Ик поянын озанлык виктарышыже лийын. Озан погым кучылт пытара манын, тудын ӱмбак вуйым шийыныт.

² Озаже тудым шкеж деке ӱжын да каласен: ”Тыйын нерген мый мом колам! Озанлыкым виктарымет нерген рашемден пу, ынде тыланет вуйлаташ ок лий”.

³ Тунам озанлык виктарыше шоналтен: ”Мом мылам ышташ? Оза мыйым тиде паша гыч луктын колта. Кӱнчаш вием ок сите, йодышт кошташ вожылам.

⁴ Палем, мом ышташ! Озанлык виктарыме паша гыч луктын колтымеке, мыйым пӧртышкышт налше еҥ-влакым кузе муаш палем”.

⁵ Озажлан парымыш пурышо еҥ-влакым кажныжым посна ӱжын. Икымшыж деч йодын: ”Мыйын озамлан кунар пуышашет уло?”

⁶ ”Шӱдӧ виса ӱйым”, – вашештен тудыжо. Озанлык виктарыше каласен: ”Кӱсын кагазетым нал, шич да писын возо: витле”.

⁷ Вара весе деч йодын: ”А тый кунар пуышаш улат?” ”Шӱдӧ виса шыдаҥым”, – тудыжо вашештен. Тудлан каласен: ”Кӱсын кагазетым нал да кандашле манын возо”.

⁸ Йӧным мумыжлан ондалыше вуйлатышым озаже моктен. Тиде тӱнян икшывыж-влак шке кокласе пашаштышт волгыдын шочшыж деч ушанрак ыштат.

⁹ Мый тыланда ойлем: чын огыл поянлык дене шкаланда йолташым ыштыза, тыге ыштеда гын, нужнаш кодмекыда, тендам курымашлык илыме верыш налыт.

¹⁰ Кӧ изиште ӱшанле, тудо кугуштат ӱшанле. Кӧ изиште ӱшанле огыл, тудо кугуштат ӱшанле огыл.

¹¹ Тыгеже те чын огыл поянлык шотышто ӱшанле лийын огыдал гын, кӧ тыланда чын поянлыкым ӱшана?

¹² Еҥ поянлык шотышто ӱшанле лийын огыдал гын, кӧ тыланда шкенданым пуа?

¹³ Нимогай тарзе кок озалан тарзыланен огеш керт: иктыжым ужмышудымо лиеш да весыжым йӧрата, але иктыжлан кумылын ышта, весыжым ок шотло. Те ик жапыштак Юмылан да поянлыклан служитлен огыда керт».

¹⁴ Оксам йӧратыше фарисей-влакат чыла тидым колыныт да Иисусым воштылыныт.

¹⁵ Но Тудо нунылан каласен: «Те еҥ ончылно чын ыштышыла кояш тӧчеда, но Юмо тендан шӱмдам пала. Мом еҥ-влак аклат, Юмын ончылно йырнык веле.

¹⁶ Закон ден пророк-влак Иоанн марте лийыныт. Тудо жап гыч Юмын Кугыжаныш увертарен туныкталтеш да керек-кӧат уло вийын тыршен тушко пура.

¹⁷ Но кава ден мланде пытат гынат, законышто ик удыралтышат ок йом.

¹⁸ Кӧ, шке ватыжым ойырен колтен, весым марлан налеш – тудо яжарлана. Марийжын ойырен колтымым марлан налшат яжарлана.

¹⁹ Ик еҥ поян улмаш, мотор шемалге-йошкар йытын вургемым чиен, кече еда ракатланен кочкын-йӱын.

²⁰ Тыгак Лазарь лӱман йорло еҥ лийын, тудо поянын капка ончылныжо йораҥше киен

²¹ да поянын ӱстембачше луктын кудалтыме кинде пудыргым кочнеже улмаш. Пий-влак тудын йоражым нулаш толыныт.

²² Вара Лазарь колен да Суксо-влак тудым Авраам воктеке наҥгаеныт. Поянат колен, тудым тоеныт.

²³ Тамыкыште орланымыж годым кӱшкӧ ончалын да тораште Авраамым, а воктенже Лазарьым ужын.

²⁴ Поян кычкыралын: ”Авраам, ачай! Мыйым чамане, Лазарьым мый декем колто, тек парнявуйжым вӱдеш нӧртен, йылмем юалтара. Мый тиде тулышто моткоч орланем”.

²⁵ Но Авраам вашештен: ”Эргым, шарналте, тый порылык ужашетым илымет годым налынат, а Лазарь – осал ужашым. Ынде тыште тудын ойгыжым кораҥдыме, а тый орланет.

²⁶ Тылеч посна мемнан ден тендан коклаш пеш кугу поргемым ыштыме: тендан деке вончаш шонышо вончен ок керт. Тушечат мемнан деке нигӧ вончен ок керт”.

²⁷ Тунам поян каласен: ”Тугеже, ачай, тый дечет йодам: Лазарьым ачамын суртышкыжо колто.

²⁸ Мыйын вич иза-шольым уло. Нунат тиде орлык верыш ынышт логал манын, тек тудо шижтара”.

²⁹ Авраам вашештен: ”Нунын Моисей ден пророк-влакышт уло, тек нуным колыштыт”.

³⁰ Поян каласен: ”Уке, Авраам ачай! Теве иктаж-кӧ колышо нунын деке мия гын, тунам, языкыштым касарыктен, Юмо деке савырнат”.

³¹ Но Авраам тудлан каласен: ”Моисей ден пророк-влакым огыт колышт гын, нуным колымаш гыч ылыж кынелшат ӱшандарен огеш керт”».