Лк 15 - У Сугынь

15 ГЛАВА 1-10 Йомшо шорык ден йомдарыме окса нерген туштен ойлымаш. 11-32 Йомын коштшо эрге нерген туштен каласымаш.

¹ Йозак погышо ден языкан-влак Иисус деке колышташ чылан толыныт.

² Фарисей ден закон туныктышо-влак ӧпкелен ойленыт: «Тиде Еҥ языкан-влакым Шкеж деке лишемда да нунын дене пырля кочкеш!»

³ Иисус тунам нунылан тыге туштен каласен:

⁴ «Тендан кокла гыч ик еҥын шӱдӧ шорыкшо уло да иктыжым йомдара гын, индешле индешыжым ир мландеш коден ок кае да йомшыжым мумешке ок кычал мо?

⁵ А мумеке, куана да шорыкшым вачышкыже пышта.

⁶ Мӧҥгыжӧ толмеке, йолташыж ден пошкудыж-влакым ӱжын, ойла: ”Мый денем пырля куаныза: мый йомшо шорыкем муынам!”

⁷ Тыланда каласем: языкым касарыкташ амалышт укеан индешле индеш чын ыштыше дене таҥастарымаште, шке языкшым касарыктыше да Юмо деке савырныше языкан ик еҥ верчат пылпомышто тидын семынак утларак куан лиеш.

⁸ Лу драхме оксаже уло да иктыжым йомдара гын, могай ӱдырамаш, лампым чӱктен, пӧртым ӱштын, мумешкыже тыршен ок кычал?

⁹ А мумеке, йолташ ӱдырамаш да пошкудыж-влакым ӱжеш да каласа: ”Мый денем пырля куаныза, мый йомдарыме оксам муынам!”

¹⁰ Тыланда ойлем: языкшым касарыктен Юмо деке савырныше языкан ик еҥ верчат Юмын Суксыж-влак коклаште тыгаяк куан лиеш».

¹¹ Иисус умбакыже ойлен: «Ик еҥын кок эргыже лийын.

¹² Изиракше ачажлан каласен: ”Ачай! Мылам логалшаш пого пайым ойырен пу”. Ача нунылан погым пайлен пуэн.

¹³ Икмыняр кече эртымеке, изирак эргыже чыла поген да тора элыш каен. Тушто шала илен да шке пайжым шоналтыде кучылтын.

¹⁴ Чыла шалатыл пытарымекше, тиде элыште кугу шужымаш тӱҥалын, да эргылан нужнам чыташ логалын.

¹⁵ Тудо тиде элысе ик еҥ деке пашаш пураш йодын миен, а садыже шке пасушкыжо сӧснам кӱташ колтен.

¹⁶ Тудо сӧсналан пукшымо отыза дене мӱшкыржым темаш шонен, но тидыжымат нигӧ пуэн огыл.

¹⁷ Тунам тудо шонаш тӱҥалын да шкаланже каласен: ”Ачамын кунар шуко тарлалтше еҥже уло, чылалан кинде утымеш сита, а мый шужен колем!

¹⁸ Каем, ачам деке пӧртылам да каласем: ’Ачай! Мый Пылпомыш ваштареш да тыйын ончылнет языкым ыштенам.

¹⁹ Ынде эргыч маналташат ом йӧрӧ, мыйым тарлалтше-влакет коклаш нал’”.

²⁰ Тудо кынелын да ачаж деке каен. Эше тораште улмыж годымак ачаже тудым ужын да чаманен, ваштарешыже куржын миен, шӱйжӧ гыч ӧндалын да шупшалын.

²¹ Эргыже тудлан каласен: ”Ачай! Мый Пылпомыш ваштареш да тыйын ончылнет языкым ыштенам. Ынде эргыч маналташат ом йӧрӧ”.

²² Но ача тарзыж-влаклан каласен: ”Эн сай вургемым кондыза да тудлан чиктыза. Кидышкыже шергашым да йолышкыжо йолчиемым пуыза.

²³ Ӧрдыктарыме презым вӱден кондыза да шӱшкылза, кочкаш да куан пайремым эртараш тӱҥалына!

²⁴ Мыйын тиде эргым колен ыле, ынде ылыжын, йомын ыле, ынде мумо”. Нуно куан пайремым эртараш тӱҥалыныт.

²⁵ А кугурак эргыже пасушто лийын. Пӧртылмыж годым, пӧрт деке лишеммеке, куанен мурымо йӱк-йӱаным колын.

²⁶ Тарзе-влак кокла гыч иктыжым ӱжын да йодын: ”Тиде мо тыгай?”

²⁷ Тудыжо вашештен: ”Тыйын шольыч толын. Тудо илыше да таза пӧртылынат, ачат ӧрдыктарыме презым шӱшкылын”.

²⁸ Кугурак эргыже сырен, пӧртышкат ынеж пуро улмаш. Ачаже лектын да тудым пураш ӱжын,

²⁹ но тудо ачажлан вашештен: ”Теве мый тыланет тынар ий пашам ыштем, тыйын кӱштыметым ик ганат шуктыде коден омыл, но тый мылам йолташем-влак дене пайремым эртараш каза пачамат пуэн отыл.

³⁰ А кунам тиде эргыч, яжар-влак дене коштын поянлыкетым пытарымеке толын, тый тудлан ӧрдыктарыме презым шӱшкылынат!”

³¹ Но ача тудлан каласен: ”Эргым, тый эре мый денем пырля улат. Мыйын мо уло, чылажат тыйын.

³² А кызыт куанаш да йывырташ кӱлеш: тыйын тиде шольыч колен ыле, ынде ылыжын, йомын ыле, ынде мумо”».