Лк 12 - У Сугынь

12 ГЛАВА 1-3 Сайла кояш тӧчымӧ ваштареш шижтарымаш. 4-7 Кӧ деч лӱдаш. 8-12 Иисусым палыме нерген почын ойлымаш. 13-21 Ушдымо поян нерген туштен каласымаш. 22-34 Тыршыме да тургыжланыме нерген. 35-48 Шке озажым вучышо тарзе. 49-53 Иисус – шелалтмашын амалже. 54-59 Жапын палыже.

¹ Тиде жапыштак тӱжемле еҥан тугай кугу тӱшка погынен, икте-весым шыгыремденыт. Иисус ондак Шкенжын тунемшыж-влаклан ойлаш тӱҥалын: «Фарисей-влакын руышт деч шекланыза, тидыже – нунын сайла кояш тӧчымышт.

² Нимо шылтен аралыме почылтде ок код, нимогай шолып чараш лекде ок код.

³ Мом те пычкемыште ойленда, волгыдо годым колыт. Мом кӧргӧ пӧлемыште пылышыш шып ойленда, пӧрт леведыш ӱмбач кычкыраш тӱҥалыт.

⁴ Мый тыланда, йолташем-влаклан, ойлем: кӧмыт капым пуштыт, но вара нимом ыштен огыт керт, нунын деч ида лӱд.

⁵ Кӧ деч лӱдаш, Мый тыланда ончыктем: пуштмеке, тамыкыш сӱмырал шуаш кӧн властьше уло, Тудын деч лӱдса. Туге, тыланда ойлем: теве кӧ деч лӱдса!

⁶ Вич пӧрткайыкым кок ассарий оксалан огыт ужале мо? А Юмо нунын кокла гыч иктыжымат монден огыл.

⁷ А тендан вуйысо ӱп пырчыдамат чыла шотлымо. Ида лӱд! Те чыла пӧрткайык деч шергырак улыда!

⁸ Мый тыланда ойлем: кӧ еҥ-влак ончылно Мыйым палымыж нерген почын ойла, Айдеме Эргат Юмын Суксыж-влак ончылно тудым палымыж нерген почын ойла.

⁹ А кӧ еҥ ончылно Мый дечем кораҥеш, тудат Юмын Суксыж-влак ончылно кораҥдыме лиеш.

¹⁰ Кӧ Айдеме Эрге ваштареш мутым каласа, тудлан тиде касаралтеш, но Святой Шӱлышым мыскылен ойлышылан ок касаралт.

¹¹ Кунам тендам синагоглашке кондат, вуйлатыше да власть улшан-влак деке намият, кузе аралалташ да мом ойлаш манын ида тургыжлане.

¹² Мом ойлаш кӱлеш, Святой Шӱлыш тендам тудо шагатыште туныкта».

¹³ Калык тӱшка гыч ик еҥ Иисуслан ойлен: «Туныктышо, мыйын изамлан наследствым мый денем пайлаш каласе».

¹⁴ Тудлан Иисус вашештен: «Айдеме, кӧ Мыйым тендан судьяда лияш але погыдам пайлаш шогалтен?»

¹⁵ Вара Тудо чылалан ойлен: «Ончыза, опкынланымаш деч шекланыза. Айдемын поянлыкше моткоч шуко гынат, погыжо тудлан илышым ок пу».

¹⁶ Иисус нунылан туштен каласен: «Ик поян еҥын пасужо сай лектышым пуэн

¹⁷ да тудо шке семынже шонкален: ”Мом мылам ышташ? Чыла поген налме лектышым нигушто аралаш”.

¹⁸ Вара каласен: ”Теве мом ыштем: клат-влакем рончем да кугурак-влакым чоҥем. Тушко уло киндем, погем чумырем

¹⁹ да шкаланем каласем: ’Чонем, тыйын шуко ийлан ситыше кугу погет уло. Кане, коч, йӱ, куанен иле’”.

²⁰ Но Юмо тудлан каласен: ”Ушдымо! Тиде йӱдымак чонетым тый дечет налыт. Тыйын ямдылымет кӧлан кодеш?”

²¹ Кӧ шкаланже поянлыкым пога, а Юмын ончылно поян огыл, тудын дене тыге лиеш».

²² А тунемшыж-влаклан Иисус каласен: «Сандене Мый тыланда ойлем: мом кочкаш манын, чонда верч ида азаплане, мом чияш манын, капда верч ида тургыжлане.

²³ Чон кочкыш деч да кап вургем деч шергырак.

²⁴ Кайык-влакым шекланыза: нуно огыт ӱдӧ, огыт тӱред, нунын клатыштат, амбарыштат уке, а Юмо нуным пукша. А те кайык деч кунаре шергырак улыда!

²⁵ Тендан кокла гыч кӧ тургыжланыме дене шке кап кугытшым кеч кынергут наре кужемден кертеш?

²⁶ А те тыгай изимат ыштен огыда керт гын, молыж нерген мом тургыжланеда?

²⁷ Кузе лилий пеледыш-влак кушкыт, шекланыза: нуно пашам огыт ыште, огыт шӱдырӧ. Но тыланда ойлем: Соломонат, поянлыкше дене чапланен гынат, нунын кокла гыч иктыж гаят чиен огыл.

²⁸ Таче пасушто кушшо, а эрла коҥгаш шуышаш шудым Юмо тыге чикта гын, тендамат, шагал ӱшаныше-влакым, ок чикте мо?

²⁹ Мом кочкаш, мом йӱаш ида кычал да тидын нерген ида тургыжлане.

³⁰ Тиде тӱнясе калык-влак чыла тидым кычалыт, а тендан Ачада тыланда тиде кӱлмым пала.

³¹ Эн ончыч те Юмын Кугыжанышым кычалза, тунам чыла тиде тыланда пырля пуалтеш.

³² Изи кӱтӱ, ит лӱд! Ачада тыланда Кугыжанышым пуаш сайлан шотлен.

³³ Погыдам ужалыза да оксажым йорло-влаклан пуыза, тӱганен кертдыме окса калтам шкаланда ыштыза, пытыдыме пылпомышсо поянлыкым погыза, тушко вор ок лишем, тушто когарш ок локтыл.

³⁴ Кушто тендан поянлыкда, туштак шӱмдат лиеш.

³⁵ Тек ӱштыда эре ӱшталме да лампыда чӱктымӧ лиеш,

³⁶ шкеныштын озаштым сӱан пайрем гыч вучышо еҥ-влак гай лийза. Кунам толеш да пералта, нуно тунамак тудлан почаш ямде улыт.

³⁷ Оза пӧртылмыж годым тарзыж-влакым малыде вучышым ужеш гын, пиалан улыт. Тыланда чынак ойлем, тудо шке ӱштыжым ӱшталеш, тарзыж-влакым ӱстелтӧрыш шында да нуным ончаш тӱҥалеш.

³⁸ Тудо йӱдым, кокымшо але кумшо орол годым, толеш гынат, тарзыж-влакын тыге ыштымыштым ужеш гын, нуно пиалан улыт.

³⁹ Пален лийза, вор мыняр шагатлан толшашым пӧрт оза пала ыле гын, ок мале да пӧртышкыжӧ кӱнчен пураш ок пу ыле.

⁴⁰ Теат ямде лийза: могай шагатыште те огыда вучо, тунам Айдеме Эрге толеш».

⁴¹ «Господь, тиде туштен каласымашым мыланна ойлет але чылалан?» – Петр Тудын деч йодын.

⁴² Господь вашештен: «Кӧ моло тарзым вуйлаташ да нунылан шке жапыштыже киндым висен шеледаш озан шогалтыме ӱшанле да ушан озанлык вуйлатыше?

⁴³ Толмекыже, тиде тарзын кӱлеш семын ыштымыжым оза ужеш гын, тарзыже пиалан.

⁴⁴ Тыланда чыным ойлем: уло погыжым ончаш тудым шогалта.

⁴⁵ А тудо тарзе шӱмыштыжӧ ”Мыйын озам эше ок тол” манын шоналта да кочкаш, йӱаш, рушташ, моло тарзе ӱдырамашымат, пӧръеҥымат кыраш тӱҥалеш гын,

⁴⁶ озаже вучыдымо кечын да палыдыме шагатыште толеш. Оза тудым покшеч руалын шелеш да ӱшаныдыме-влак дене ыштымыж семынак ышта.

⁴⁷ Тарзе озажын шонымыжым пала, ок ямдылалт да тудын шонымыж семын ок ыште гын, тудо чот кыралтеш.

⁴⁸ А тарзе озажын шонымыжым ок пале да кырымым сулышо иктаж-мом ышта гын, тудо шагалрак кыралтеш. Кӧлан шуко пуымо, тудын деч шуко йодалтеш, кӧлан шуко ӱшаныме, тудо шукырак пуышаш.

⁴⁹ Мый мланде ӱмбаке тулым кондаш толынам, ынде тулым йӱлаш тӱҥалшым пешак ужнем ыле!

⁵⁰ Тынеш пурымо дене Мый тынеш пурышаш улам. Тыге лийын шумешке, кузе Мый йӧсланем!

⁵¹ Мый мланде ӱмбаке тыныслыкым кондаш толынам манын, те шонеда мо? Уке, каласем Мый, шелалтмашым кондаш толынам.

⁵² Пӧртыштӧ визытын улыт гын, тылеч вара нуно шелалтыт: кумытын кокыт ваштареш, коктын кумыт ваштареш лийыт.

⁵³ Ача эргыж ваштареш лиеш, эрге ачаж ваштареш, ава ӱдыржӧ ваштареш, ӱдыр аваже ваштареш, авалийше шке шешкыж ваштареш, а шешке авалийшыж ваштареш».

⁵⁴ А вара Иисус калыклан каласен: «Касвел могырым пыл кӱзымым ужыда гын, те тунамак ойледа: ”Йӱр лиеш”. Тыгак лиеш.

⁵⁵ А кунам кечывалвел гыч мардеж пуа, шокшо лиеш маныда. Тыгак лиеш.

⁵⁶ Сайын кояш тӧчышӧ-влак! Мланде ӱмбаке да кавашке ончен, мом ужмыдам умылтарен моштеда, а кузе кызытсе жапым умылен огыда мошто?

⁵⁷ Кузе чын ышташ, молан шке ынеда умыло?

⁵⁸ Тыйым титаклыше еҥ дене вуйлатыше деке кайымет годым корнышто тудын дене мутланен келшаш чылажымат ыште, уке гын, тудо тыйым судьялан пуа, а судья – ороллан, тудыжо тыйым казаматыш шуа.

⁵⁹ Тылат каласем: пытартыш ыр марте тӱлымешке, тушечын от лек».