Лк 11 - У Сугынь

11 ГЛАВА 1-13 Кумалме нерген. 14-23 Иисус але веельзевул. 24-26 Осал шӱлышын пӧртылмыжӧ. 27-28 Чын пиал. 29-32 Палдарыше палым ончыкташ йодмаш. 33-36 Волгалтарыме нерген. 37-54 Фарисей ден закон туныктышо-влакым титаклымаш.

¹ Икана Иисус ик вере кумалын, а кунам чарнен, тунемшыж-влак кокла гыч иктыже Тудлан каласен: «Господь, кумалаш мемнам туныкто. Иоаннат шке тунемшыж-влакым туныктен».

² Иисус нунылан каласен: «Кумалмыда годым тыге ойлыза: Пылпомышто улшо мемнан Ачана! Тыйын святой лӱмет мокталтше, Тыйын Кугыжанышет толжо, Тыйын эрыкет мланде ӱмбалнат пылпомышсо гаяк лийже.

³ Мыланна илышаш киндым кече еда пу.

⁴ Мемнан языкнам кудалте, вет меат мыланна языкым ыштыше-влакын титакыштым кудалтена, языкышке мемнам ит пурто, осал дечын мемнам утаре».

⁵ Вара нунылан каласен: «Ала тендан кокла гыч иктаж-кудыжо пелйӱдлан шке йолташыж деке мия да ойла: ”Йолташ, мылам кум сукыр киндым кӱсын пу,

⁶ корныш лекше йолташем пурен, а мыйын ӱстембак шындаш нимо уке”.

⁷ А тудыжо пӧрт кӧргӧ гыч вашешта: ”Мыйым ит тургыжландаре. Омса ынде тӱкылмӧ, йочам-влак воктенем вакшышыште улыт, мый тылат тидым пуаш кынелын ом керт”.

⁸ Тыланда ойлем, йодшын йолташыже улмыжлан кӧра ок кынел да ок пу гынат, чарныде йодмыжлан кӧра кынелеш да кунар кӱлеш, тунар пуа.

⁹ Мый тыланда каласем: сӧрвалыза – тыланда пуалтеш, кычалза – муыда, пералтыза – тыланда почыт,

¹⁰ вет кажне сӧрвалыше налеш, кычалше муэш, пералтышылан почыт.

¹¹ Эргыда киндым йодеш гын, тудлан кӱ моклакам пуышо, але колым йодеш гын, тудлан кол олмеш кишкым пуышо ача тендан коклаште уло мо?

¹² Але эрге муным йодеш гын, тендан кокла гыч кӧ тудлан скорпионым пуа?

¹³ Тыгеже, те осал улмо ӱмбачат шочшыланда тӱрлӧ порым пуэн моштеда гын, пылпомышсо Ачана Тудын деч йодшылан Святой Шӱлышым огеш пу мо?»

¹⁴ Икана Иисус еҥ кӧргӧ гыч йылмыдыме иям поктен луктын. Кунам ия лектын, йылмыдыме еҥ ойлаш тӱҥалын, да калык чот ӧрын.

¹⁵ Но южышт ойленыт: «Веельзевулын, ия тӧран, вийже дене Тудо ия-влакым поктен луктеш».

¹⁶ А весышт, Тудым тергаш шонен, палдарыше палым ончыкташ йодыныт.

¹⁷ Но Иисус нунын шонымыштым пален да каласен: «Кеч-могай кугыжаныш шке кӧргыштыжӧ шелалтеш гын, тудо пустаҥеш, да суртышто шелалтмаш лиеш гын, тудо сӱмырла.

¹⁸ Сатана шке ваштарешыже шогалеш гын, кузе тудын кугыжанышыже шоген кертеш? А те ойледа, пуйто Мый ия-влакым веельзевулын вийже дене поктен луктам.

¹⁹ Мый нуным веельзевулын вийже дене поктен луктам гын, тендан эргыда-влак кӧн вий дене поктен луктыт? Сандене нуно тендам судитлыше лийыт.

²⁰ А Мый Юмын кидше дене иям поктен луктам гын, тыгеже Юмын Кугыжаныш тендан деке ынде шуын.

²¹ Кунам шке пӧртшым виян да саркуралан еҥ орола, погыжо аралалт кодеш.

²² А кунам тудын деч виянрак ӱмбакыже кержалтеш да тудым сеҥа, тудын ӱшанлылан шотлымо саркуралжым шупшын налеш да аген налмыжым шеледа.

²³ Кӧ Мый денем пырля огыл, тудо Мыйын ваштареш шога, да кӧ Мый денем пырля ок пого, тудо шалатылеш.

²⁴ Айдеме кӧргӧ гыч лекмеке, каналташ верым кычалын, осал шӱлыш вӱддымӧ кундемыште коштеш, но огеш му да ойла: ”Мый коден кайыме верышкем пӧртылам”.

²⁵ Пӧртылмекыже, тудым арун ӱштын да эрыктен шындымым ужеш.

²⁶ Тунам кая да шкеж деч осалрак шым шӱлышым пырля налеш, чыланат пурат да тушто илаш тӱҥалыт. Тиде айдемылан мучаште тӱҥалтыш годсо деч ударак лиеш».

²⁷ Кунам Тудо тидын нерген ойлен, калык кокла гыч ик ӱдырамаш йӱкым кугемден каласен: «Тыйым нумалше мӱшкыр да Тыйым пукшышо чызе поро пиалан улыт!»

²⁸ Иисус вашештен: «Юмын шомакым колыштшо да шуктен шогышо-влак поро пиалан улыт!»

²⁹ Иисус йыр калык шукырак погынен. Тудо нунылан ойлаш тӱҥалын: «Тиде тукым осал! Палдарыше палым йодеш, но пророк Ионан палыж деч моло тудлан ок пуалт.

³⁰ Кузе Иона Ниневийыште илыше-влаклан палдарыше пале лийын, Айдеме Эргат тиде тукымлан тыгак лиеш.

³¹ Кечывалвел ӱдырамаш кугыжа суд кечын тиде тукым еҥ-влак дене пырля кынелеш да нуным титаканыш луктеш, вет тудо Соломонын ушан мутшым колышташ мландын вес тӱржӧ гыч толын, а тыште Соломон деч Кугурак уло.

³² Ниневий олаште илыше-влак суд кечын тиде тукым дене пырля кынелыт да тудым титаканыш луктыт, вет Ионан увертарен туныктымыжым колмеке, нуно, языкым касарыктен, Юмо деке савырненыт. А тыште Иона деч кугурак уло.

³³ Лампым чӱктымеке, тудым нигӧ ок шылте але ате дене ок петыре. Пӧртыш пурышо-влак волгыдым ужышт манын, лампыпӱкеныш шындат.

³⁴ Капын волгалтарышыже – шинча. Тугеже, шинчат яндар лиеш гын, уло капет волгыдо лиеш, а шинчат начар гын, капетат пычкемыш лиеш.

³⁵ Шеклане, тыйын волгыдет пычкемыш ынже лий.

³⁶ Тыйын уло капет волгыдо да тушто нимогай пычкемыш вер уке гын, тый лампын йолгышо тулжын волгалтарыме гай волгыдо лият».

³⁷ Кунам Иисус ойлен пытарен, ик фарисей Тудым шкеж деке кочкаш ӱжын. Иисус пӧртыш пурен, ӱстелтӧреш верланен.

³⁸ Кочмо деч ончыч Тудо кидшым мушкын огылат, фарисей, тидым ужмеке, чот ӧрын.

³⁹ Но Господь тудлан каласен: «Теве те, фарисей-влак, ате ден кӱмыжым тӱжвач эрыктеда, а кӧргыда опкынланен агымаш да осаллык дене темын.

⁴⁰ Шонен моштыдымо-влак! Кӧ тӱжвалым ыштен, Тудак огыл мо кӧргыжымат ыштен?

⁴¹ Мода уло, тудым йорло-влаклан пуыза, тунам тыланда чылажат ару лиеш.

⁴² А тыланда ойго, фарисей-влак! Те пӱртньыкын, рута шудын да чыла пакчасаскан луымшо ужашыжым Юмылан пуэда, а шкендам чын кучымым да Юмым йӧратымым кӱлешлан огыда шотло. Тидыжымат ыштыман ыле, тудыжымат ӧрдыжеш кодыман огыл ыле.

⁴³ Тыланда ойго, фарисей-влак! Синагогышто ончылно шинчымым да калык погынымо верлаште тыланда вуй савымым йӧратеда.

⁴⁴ Ойго тыланда, закон туныктышо ден фарисей-влак! Те, сайла кояш тӧчышӧ-влак! Те шинчалан койдымо шӱгар-влак гай улыда. Нунын ӱмбалне еҥ-влак коштыт, но тидым огыт пале».

⁴⁵ Закон туныктышо кокла гыч иктыже Иисуслан каласен: «Туныктышо, тыгайым ойлен Тый мемнамат вурсет!»

⁴⁶ Но Иисус каласен: «Закон туныктышо-влак, тыландат ойго. Те еҥ ӱмбак пеш неле нумалтышым пыштеда, а шкеже тудым ик парня денат огыда тӱкалте.

⁴⁷ Ойго тыланда! Те пророк-влаклан чапле шӱгарым ыштеда, а нуным ачада-влак пуштыныт.

⁴⁸ Тыге те ачада-влакын ыштылмыштым палымыдам да сайлан шотлымыдам ончыктеда: нуно пророк-влакым пуштеденыт, а те пророк-влаклан чапле шӱгарым чоҥеда.

⁴⁹ Санденак Юмын Уш-акылже ойлен: ”Мый нунын деке пророк ден Апостол-влакым колтем, иктыштым нуно пуштыт, весыштым поктылаш тӱҥалыт”.

^50-51 Тыгеже, чыла пророкын тӱням ыштыме деч тӱҥалын йоктарыме вӱржӧ, Авельын вӱржӧ деч тӱҥалын, жертвенник ден святой вер коклаш пуштмо Захарийын вӱржӧ марте, тиде тукымлан тӱлыкталтеш. Туге, тыланда ойлем, тиде тукымлан тӱлыкталтеш.

⁵² Закон туныктышо-влак, ойго тыланда! Те шинчымашын сравочшым налында: шкеат пурен огыдал, пураш шонышыланат чаракым ыштенда».

⁵³ Кунам Иисус нунылан тидым ойлен, закон туныктышо ден фарисей-влак Тудым тушманла ончаш да шуко нерген йодышташ тӱҥалыныт,

⁵⁴ Тудым иктаж-могай мутеш кучаш да титаклаш тӧченыт.