Лк 10 - У Сугынь

10 ГЛАВА 1-12 Иисус шымле тунемшыжым колта. 13-16 Титакыштым шиждыме ола-влаклан ойго. 17-20 Шымле тунемшын пӧртылмыжӧ. 21-24 Иисусын куанже. 25-37 Поро чонан самарий еҥ нерген туштен ойлымаш. 38-42 Марфа ден Мариян мӧҥгыштышт.

¹ Тылеч вара Господь эше шымле тунемшым ойырен налын да Шкеж деч ончыч кажне олашке, кажне верышке, кушко Шке кайынеже улмаш, кокыт дене колтен.

² Тудо нунылан ойлен: «Тӱредшаш пеш шуко, а пашаеҥ шагал. Тыгерак, пашаеҥ-влакым тӱредаш колтыжо манын, лектышын Озаж деч йодын кумалза.

³ Кайыза! Мый тендам пача-влакым пире коклашке колтымо семын колтем.

⁴ Окса калтамат, сумкамат, йолчиемымат пеленда ида нал, корнышто нигӧ дене ида саламлалт.

⁵ Кунам иктаж-могай пӧртыш пуреда, ондак ойлыза: ”Тиде пӧртлан тыныс лийже!”

⁶ Тушто тыныслыкын еҥже уло гын, тендан тыныслыкда тудын дене кодеш, а уке гын, тендан деке пӧртылеш.

⁷ Тиде пӧртешак кодса, мом темлат, кочса, йӱза: пашаеҥ пашадаржым сулен налеш. Ик сурт гыч весыш ида кусныл.

⁸ Иктаж-могай олашке мийымеке, тендам порын вашлийыт гын, мом тыланда пуат, тудым кочса,

⁹ тушто улшо черле-влакым паремдыза да ойлыза: ”Юмын Кугыжаныш тендан деке лишемын”.

¹⁰ А иктаж-могай олашке мийымеке, тендам порын огыт вашлий гын, уремышке лекса да каласыза:

¹¹ ”Тендан олаште мемнан деке пижше пуракымат ме тыланда почкалтен кодена. Туге гынат палыза: Юмын Кугыжаныш ынде тендан деке лишемын”.

¹² Тыланда ойлем: суд кечын Содомлан тиде ола деч куштылгырак лиеш.

¹³ Ойго тылат, Хоразин! Ойго тылат, Вифсаида! Могай чудо-влак тендан дене лийыныт, тугаяк чудо-влак Тир ден Сидонышто лийыт ыле гын, нуно шукертак, чоштыра вургемым чиен да ломыжышто шинчен, языкыштым касарыктен, Юмо деке савырнат ыле.

¹⁴ Но суд кечын Тир ден Сидонлан тендан деч куштылгырак лиеш.

¹⁵ А тый, кавашке шумеш нӧлтымӧ Капернаум, тамыкыш сӱмыралме лият!

¹⁶ Кӧ тендам колыштеш, тудо Мыйым колыштеш, кӧ шкеж деч тендам кораҥда, Мыйым кораҥда. А кӧ шкеж деч Мыйым кораҥда, Мыйым Колтышымат кораҥда».

¹⁷ Шымле тунемшыже куанен пӧртылыныт да ойленыт: «Господь, Тыйын лӱмет верч мутнам ия-влакат колыштыт!»

¹⁸ Но Иисус нунылан каласен: «Мый пылпомыш гыч волгенче семын сатана камвочмым ужынам.

¹⁹ Теве тыланда кишкым, скорпионым да тушманын уло вийжым тошкалаш властьым пуэм – нимоат тыланда эҥгекым ок ыште.

²⁰ Но шӱлыш-влак мутдам колыштмылан огыл, а тендан лӱмдам пылпомышто возымылан куаныза!»

²¹ Тиде татыштак Иисус Святой Шӱлыш дене йывыртен да каласен: «Ачай, пылпомышын да мландын Господьшо! Тый уш-акылан дечат, кугу ушан дечат тидым шылтенат да изи-влаклан почынат, сандене Тыйым чапландарем! Теве, Ачай, тыгай лийын Тыйын поро эрыкет!»

²² Тунемшыж-влак деке савырнен, Тудо ойлен: «Ачам Мылам чыла пуэн. Эрге кӧ улмым Ача деч моло нигӧ ок пале, Ача кӧ улмым Эрге да кӧлан Эрге почаш шона, тудын деч моло нигӧ ок пале».

²³ Вара, тунемшыж-влак деке савырнен, нунылан посна каласен: «Те мом ужыда, тудым ужшо шинча пиалан!

²⁴ Мый тыланда ойлем: мом те ужыда, тудым шуко пророк ден кугыжа ужнешт ыле, но ужын огытыл, мом те колыда, тудым колнешт ыле, но колын огытыл».

²⁵ Иисусым тергаш шонен, закон туныктышо ик еҥ кынел шогалын да каласен: «Туныктышо, курымашлык илышым налаш манын, мый мом ыштышаш улам?»

²⁶ Иисус йодын: «Законышто мом возымо? Тушто тый мом лудат?»

²⁷ Тудо вашештен: «Шкендын Господь Юметым уло шӱмет дене, уло чонет дене, уло виет дене да уло умылымашет дене йӧрате. Лишылетым шкендым йӧратыме семынак йӧрате».

²⁸ Иисус каласен: «Тый чын вашештышыч. Тыге ыштет гын, илаш тӱҥалат».

²⁹ Но закон туныктышо, шкенжым чыныш лукташ шонен, Иисус деч йодын: «А кӧ мыйын лишылем?»

³⁰ Иисус тудлан вашештен: «Ик еҥ Иерусалим гыч Иерихоныш каен да агыше-влакын кидышкышт логалын. Нуно тудын вургемжым кудаш налыныт, кырен сусыртеныт да пеле колышым кудалтен каеныт.

³¹ Тиде корно денак иерейлан волаш логалын. Кийышым ужмеке, корно вес могыр дене эртен каен.

³² Левий тукым еҥат тыгак ыштен: тиде верыш миен шумеке, сусыргышым ужын, корно вес могыр дене эртен каен.

³³ А Самарий гыч ик корныеҥ тудын деке миен лектын, а ужмеке, чаманен,

³⁴ лишемын, сусыржым ӱй да йошкар арака дене мушкын пидын, шке оселжо ӱмбаке кӱзыктен шынден, унагудыш наҥгаен да тудым ончен.

³⁵ А вес кечын, тушеч кайымешке, унагудо озалан кок динарийым луктын пуэн да каласен: ”Тудым ончо, мом утыжым кучылтат гын, пӧртылмем годым мый тылат ешарен пуэм”.

³⁶ Тыйын шонымаште, агыше-влак кидыш логалше еҥлан нине кумыт гыч кудыжо лишыл лийын?»

³⁷ Закон туныктышо вашештен: «Кӧ тудлан порым ыштен, тудо». Иисус каласен: «Кае, тыят тыгак ыште».

³⁸ Корно дене эртымышт годым Иисус ик ялыш пурен. Тыште Марфа лӱман ӱдырамаш Тудым шке пӧртышкыжӧ пуртен.

³⁹ Ӱдырамашын Мария лӱман шӱжарже лийын. Тудыжо Иисусын йол воктекыже шинчын да ойлымыжым колыштын.

⁴⁰ Марфан унам ончымо сомылкаже пеш шуко лийын. Лишке миен, тудо каласен: «Господь! Шӱжарем уло сомылым шкетланем кудалтен. Тидын нерген Тый от шоналте мо? Тудлан каласе, мылам полшыжо!»

⁴¹ «Марфа, Марфа! – вашештен Иисус. – Тый шуко верч тургыжланет, азапланет,

⁴² а кӱлешанже икте веле. Мария сай ужашым ойырен налын, тидыже тудын деч ок налалт.»