Лк 1 - У Сугынь

1 ГЛАВА 1-4 Ончылмут. 5-25 Тынеш Пуртышо Иоаннын шочмыж нерген ончылгоч каласымаш. 26-38 Иисусын шочмыж нерген ончылгоч каласкалымаш. 39-56 Елисавета деке Мария ужаш мия. 57-66 Тынеш Пуртышо Иоаннын шочмыжо. 67-80 Захарийын пророкла ойлымыжо.

¹ Мемнан коклаште мо лийме да сайын палыме паша нерген шукын возаш тӱҥалыныт.

² Нуно тӱҥалтыш гычак чыла тидым ужшо да Шомаклан служитлыше-влакын мыланна каласкалымыштым возат.

³ Сандене мыят, тӱҥалтыш гыч чыла шымлен лекмеке, тидым тыланет, кугун пагалыме Феофил, радамын возаш шонен пыштышым.

⁴ Тыланет мом туныктымын ӱшанле улмыжым палет манын, мый ужнем.

⁵ Иудейын Ирод кугыжаже годым Авийын черетыштыже служитлыше Захарий лӱман иерей улмаш. Тудын ватыжат Аарон тукым гыч улмаш, лӱмжӧ Елисавета лийын.

⁶ Нуно коктынат Юмын ончылно чын ыштыше лийыныт, Господьын уло кӱштымыж да шӱдымыж почеш шылталаш лийдымын иленыт.

⁷ Но Елисавета йочам ыштен кертдыме улмаш, сандене нунын йочашт лийын огыл. Нуно коктынат шоҥго лийыныт.

⁸ Икана Захарий радам почеш шке черетше дене Юмын ончылно служитлен.

⁹ Иерей-влакын йӱлашт почеш шывагам кучымекышт, тудлан Господьын храмышкыже тӱтыраш пураш логалын,

¹⁰ а тамле пушым тӱтырымӧ годым шуко калык тӱнӧ кумалын.

¹¹ Тунам Захарийлан Господьын Суксыжо кончен, тудо тӱтырымӧ жертвенник деч пурла могырышто шоген.

¹² Тудым ужмеке, Захарий чот ӧрын, тудым лӱдмаш авалтен.

¹³ Но Суксо тудлан каласен: «Захарий, ит лӱд. Тыйын сӧрвалыметым колмо. Елисавета ватет тылат эргым ышта, да тый тудым Иоанн манын лӱмдет.

¹⁴ Тыланет куанымаш да йывыртымаш лиеш, эргычын шочмыжлан шукын йывырташ тӱҥалыт.

¹⁵ Господь ончылно тудо пеш кугу лиеш. Тудо йошкар аракамат, моло руштыктарышымат йӱаш ок тӱҥал, ава кӧргыштӧ лиймыж годымак Святой Шӱлыш дене темалтеш.

¹⁶ Израиль эрге кокла гыч шукыштым Господь деке, нунын Юмышт деке, пӧртылта.

¹⁷ Господь ончыко ямдылыме калыкым лукташ манын, Илиян гай вий-куат да шӱлыш дене тудо Господь деч ончыч толеш, ача-влакын шӱмыштым шочшышт деке пӧртылта, чын ыштыше-влак семын шонаш мут колыштдымо-влакым савыра».

¹⁸ Захарий Суксылан каласен: «Тиде чын улмым кушеч мый палем? Мый шоҥго улам, ватемат ынде самырык огыл».

¹⁹ Суксо вашештен: «Мый Гавриил улам, Юмын ончылно шогем, тыланет ойлаш да тиде куан уверым каласаш мыйым колтымо.

²⁰ Теве тый мутланен кертдыме лият, чыла тиде шукталтме кече марте ойлен от керт. Шке жапыштыже шукталтшаш шомакемлан тый ӱшанен отыл, сандене тыге лиеш».

²¹ А калык Захарийым вучен да храмыште юватылмыжлан ӧрын.

²² А лекмеке, Захарий нунылан нимом ойлен кертын огыл. Нуно умыленыт: храмыште тудо кончымашым ужын. Захарий кидше дене ончыктылын, но йылмыдымак кодын.

²³ А служитлыме кечыже-влак эртымеке, Захарий мӧҥгыжӧ пӧртылын.

²⁴ Икмыняр жап гыч Елисавета ватыже нелемын, тудо вич тылзе шылын илен да ойлен:

²⁵ «Тидым мылам Господь ыштен! Тиде кечылаште Тудо ӱмбакем ончалын, еҥ-влак деч чытен илыме намысем ӱмбачем кораҥден».

²⁶ Кудымшо тылзын Юмо Гавриил Суксым Галилейысе Назарет манме олашке колтен.

²⁷ Тудо Давид тукым гыч Иосиф лӱман пӧръеҥлан сӧрымӧ ӱдыр деке колтымо улмаш. Ӱдырын лӱмжӧ Мария лийын.

²⁸ Суксо Тудын деке пурен да каласен: «Поро пӱрымашан, йывырте! Тый денет Господь. Ӱдырамаш-влак коклаште Тый благословитлыме улат!»

²⁹ А Мария, тудым ужмеке, тыгай мутлан аптыранен да саламлымаш мом ончыкта манын шонкален.

³⁰ Суксо Тудлан каласен: «Мария, ит лӱд. Тый Юмын порылыкшым налынат.

³¹ Тый нелемат да Эргым ыштет. Тудлан Иисус лӱмым пуэт.

³² Тудо пеш кугу лиеш да Кӱшнысӧ Юмын Эрге манын лӱмдалтеш. Господь Юмо Тудлан Давид ачажын престолжым пуа.

³³ Тудо курымеш Иаков тукымын Кугыжаже лиеш, Тудын кугыжа улмыжлан мучаш ок лий».

³⁴ Суксылан Мария каласен: «Кузе тиде лийын кертеш? Мый пӧръеҥым ом пале».

³⁵ Суксо Тудлан вашештен: «Ӱмбакет Святой Шӱлыш вола, Кӱшнысӧ Юмын куатше Тыйым леведеш. Санденак шочшаш Аза святой лиеш, Тудым Юмын Эрге манын лӱмдат.

³⁶ Теве Тыйын Елисавета родетат, шоҥго гынат, мӱшкыран, тудын эрге шочеш. Тудым чылан йочам ыштен кертдымылан шотленыт, ынде кудымшо тылзе Елисавета нелемше.

³⁷ Юмын ик мутшат ышталт кертдыме ок лий».

³⁸ Мария каласен: «Мый Господьын тарзыже улам. Тек Мыланем ойлымет семынак лиеш». Суксо Тудын деч кораҥын.

³⁹ Тиде кечылаште Мария тарванен да курыкан кундемысе Иудан олашкыже вашкен каен.

⁴⁰ Тудо Захарийын пӧртышкыжӧ пурен да Елисаветам саламлен.

⁴¹ Кунам Мариян саламлымыжым Елисавета колын, мӱшкырыштыжӧ азаже тарванен, да Елисавета Святой Шӱлыш дене темын.

⁴² Тудо виян кычкыралын: «Ӱдырамаш-влак коклаште Тый благословитлыме улат! Тый дечет Шочшат благословитлыме!

⁴³ Мый декем Господемын Аваже толын. Кушеч мылам тыгай пиал!

⁴⁴ Кунам саламлымет пылышышкем шоктыш, кӧргыштем азам куанен тарваныш.

⁴⁵ Ӱшаныше – поро пиалан, вет Господьын Тудлан каласымыже шукталтеш».

⁴⁶ Мария каласен: «Мыйын чонем Господьым мокта,

⁴⁷ Юмылан, Мыйым Утарышылан, кӧргӧ шӱлышем куана.

⁴⁸ Тудо ӱҥышӧ тарзе Ӱдыржӧ веке ончалтышыжым савырен, тиде жап гыч чыла тукым Мыйым поро пиалан манаш тӱҥалеш:

⁴⁹ куатан Юмо Мылам моткоч кугу порылыкым ыштен. Тудын лӱмжӧ святой!

⁵⁰ Тудлан лӱдын кумалше-влаклан тукым гыч тукымыш Тудо шке порылыкшым ончыкта.

⁵¹ Тудо шке кидшын куатшым ончыктен, кугешныше шонымашым шӱмыштышт кучышо-влакым шалатен колтен.

⁵² Виян-влакым престол гыч сӱмыралын, ӱҥышӧ-влакым нӧлталын,

⁵³ шужышо-влакым поро дене темен, пойышо-влакым нимо деч посна колтен.

^54-55 Мемнан ачана-влаклан ойлымыж семын, Авраам ден тудын тукымжылан порылыкшым курымеш шарнен, Тудо Шкенжын Израиль шочшыжым йӧратен налын».

⁵⁶ Елисавета дене Мария кум тылзе наре лийын, вара мӧҥгыжӧ пӧртылын.

⁵⁷ Елисаветалан азам ышташ жап шуын, тудо эргым ыштен.

⁵⁸ Господь тудын деке моткоч поро лийме нерген пошкудо да родо-тукымжо колыныт да тудын дене пырля куаненыт.

⁵⁹ Кандашымше кечын азалан пӱчмӧ йӱлам эртараш толыныт да тудым ачажын лӱмжӧ дене Захарий манын лӱмдынешт улмаш.

⁶⁰ Но азан аваже каласен: «Уке. Тудым Иоанн манын лӱмдена».

⁶¹ Елисаветалан каласеныт: «Но тыгай лӱманже тыйын тукымышто иктат уке».

⁶² Кид дене ончыктыл, азан ачаж деч тудым кузе лӱмдынеже манын йодыныт.

⁶³ Захарий изи оҥам йодын да возен: «Тудын лӱмжӧ Иоанн». Чылан ӧрыныт.

⁶⁴ Тунамак Захарийын умшаже почылтын, йылмыже рудалтын, тудо ойлаш да Юмым чапландараш тӱҥалын.

⁶⁵ Тыште илыше-влак чылан чот лӱдыныт. Чыла тидын нерген Иудейын курыкан кундемже мучко каласкаленыт.

⁶⁶ Кӧ тидын нерген колын гын, чылан шӱмыш пыштеныт да ойленыт: «Тиде йоча мо лиеш?» Вет тудын пелен Господьын кидше лийын.

⁶⁷ Иоаннын ачаже, Захарий, Святой Шӱлыш дене темын да пророкла ойлен каласкален:

⁶⁸ «Израильын Господь Юмыжо моктымо лийже! Тудо шке калыкше деке лишемын да тудлан эрыкыш лекмашым ямдылен.

^69-70 Ожнысо святой пророкшо-влак гоч мом сӧрымыжым ыштен: Давид шочшыжын тукымжо гыч Тудо мыланна виян Утарышым луктын.

⁷¹ Тушманна-влак деч, мемнам ужмышудымо-влакын чыланыштын кидышт гыч Господь утара.

⁷² Тыге Тудо ачана-влаклан порылыкшым ончыкта да Шкенжын святой сугыньжым шарна.

^73-75 Авраам ачаланна товатлымыжым монден огыл: мемнам тушман кид йымач эрыкыш луктеш, да, Тудын ончылно святойын да чын ыштен, Тудлан илышаш кечына мучко лӱдде служитлен кертына.

⁷⁶ А тый, йоча, Кӱшнысӧ Юмын пророкшо манын лӱмдалтат, Господь ончылно кает, Тудлан корным ямдылет да

⁷⁷ Тудын калыкшылан утаралтмаш языкыштым кудалтымыж дене лиймым палдарет.

⁷⁸ Тыге мемнан Юмына шӱм порылыкшо дене кӱшыч мыланна Эр Волгыдым колтен –

⁷⁹ Тудыжо пычкемыште да колымаш ӱмылыштӧ шинчыше-влакым волгалтара да тыныслык корныш мемнан ошкылнам виктара».

⁸⁰ А йоча кушкын да шӱм-чон шӱлышыжӧ пеҥгыдемын. Израиль калык ончык лекшаш кече шумешке, тудо ир мландыште илен.