СВЯТОЙ АПОСТОЛ ИАКОВЫН УЛО ЧЕРКЫЛАН КОЛТЫМО СЕРЫШЫЖЕ 5 - У Сугынь

5 ГЛАВА 1-6 Поян-влакым шижтарымаш. 7-20 Чытымаш да кумалмаш.

¹ А поян-влак, колыштса: ӱмбакыда толшаш орлыклан мӱгырен шортса.

² Тендан поянлыкда шӱйын пытен, вургемдам когарш кочкын,

³ шӧртньӧ ден шийда рӱдаҥыныт. Нунын рӱдаҥшышт тендан ваштареш таныклымаш лиеш да тул семын тендан кап ден чондам кочкеш. Те тиде пытартыш кечылан поянлыкым погенда.

⁴ Теве пашаеҥ-влак пасудам тӱредыныт, но те пашадарыштым ондален кучен коденда, пашадарышт вуйшийын кычкыра, да тӱредше-влакын кычкырымышт Господь Саваофын пылышышкыже шуын.

⁵ Те мланде ӱмбалне ракатланенда, шкаланда келанымашым кычалында, пуйто шӱшкылмӧ кечылан шӱмдам ӧрдыктаренда.

⁶ Те чын ыштышым титаканыш луктында да пуштында, тудо тыланда торешланен огыл.

⁷ Тугеже, иза-шольо-влак, Господь толмешке, чытыше лийза. Теве мланде пашаеҥ шошо да шыже йӱр толмым, мландын шергакан саскажым чытен вуча.

⁸ Теат шуко чытыше лийза да шӱмдам пеҥгыдемдыза, вет Господьын толмо жапше лишемеш.

⁹ Иза-шольо-влак, икте-весыда ӱмбаке вуйым ида ший, уке гын те шке судитлыме лийыда: теве Судья омса воктенак шога.

¹⁰ Иза-шольым-влак, Господьын лӱмжӧ дене ойлышо пророк-влакын чытен орланымыштым да кужун чытымыштым ончыза да нунын семынак ыштыза.

¹¹ Теве ме чытен лекше-влакым поро пиалан манын моктена. Иовын чытымыж нерген те колында да Господьын пытартышлан тудлан мом ыштымыжым ужында, вет Господь чот чаманыше да поро.

¹² Иза-шольым-влак, эн ондак тидым шарныза: ида товатле. Пылпомыш денат, мланде денат, нимогай вес товатлыме дене ида товатле. Тек тендан «туге» манмыда «туге» лиеш, «уке» манмыда – «уке», уке гын те судитлалтмашке логалыда.

¹³ Тендан коклаште иктаж-кӧ орлана гын, тек кумалеш. Кӧ поро кумылан – тек Юмым чапландарен мура.

¹⁴ Тендан кокла гыч иктаж-кӧ черле гын, тек Черкын пресвитерже-влакым ӱжеш, нунышт, Господь лӱмеш ӱйым шӱрен, тек тудын верч кумалыт.

¹⁵ Ӱшанен кумалмышт черлым паремда, да Господь тудым кынелта, а языкым ыштен гын, титакшым кудалта.

¹⁶ Паремаш манын, титакдам икте-весыланда почын ойлыза да икте-весыда верч кумалза. Чын ыштышын тыршен кумалмыже шуко ыштен кертеш.

¹⁷ Илият мемнан гаяк айдеме лийын. Йӱр ынже лий манын, тудо сӧрвален кумалын, да мланде ӱмбалне йӱр кум ий да куд тылзе лийын огыл.

¹⁸ Вара угыч кумалын, да пылпомыш йӱрым пуэн, мланде шке саскажым куштен.

¹⁹ Иза-шольым-влак, тендан кокла гыч иктаж-кӧ чын деч кораҥеш да иктаж-кудыжо тудым пӧртылта гын,

²⁰ тек пала: языканым йоҥылыш корныж гыч пӧртылтышӧ тудын чонжым колымаш деч утара да шуко языкым леведеш.