СВЯТОЙ АПОСТОЛ ИАКОВЫН УЛО ЧЕРКЫЛАН КОЛТЫМО СЕРЫШЫЖЕ 4 - У Сугынь

4 ГЛАВА 1-10 Юмым колыштса. 11-12 Весым судитлыме деч шижтарымаш. 13-17 Моктаныме деч шижтарымаш.

¹ Тендан коклаште кучедалмаш да вашпижмаш кушеч лектеш? Тендан капыштыда кучедалше кумыл шупшмашда деч огыл мо?

² Те тӱрлым налнеда, но тендан нимо уке, те пуштедеда да кӧранеда, а шонымашкыда шуын огыда керт. Те вашпижыда да кучедалыда, а тендан нимо уке, вет Юмо деч огыда йод.

³ Йодыда гынат, огыда нал, вет порылан огыл йодыда, шкендан кумыл шупшмаштыда кучылташ манын веле тидым йодыда.

⁴ Те, Юмо деч кораҥше, яжарланыше-влак! Тӱнян йолташыже лиймаш Юмын тушманже улмым огыда пале мо? Тугеже, кӧ тӱнялан йолташ лийнеже гын, тудо Юмын тушманже лиеш.

⁵ «Мемнан кӧргыш илаш пурышо шӱлыш кӧранымаш марте йӧрата» манын, Возымаш арам ойла шонеда мо?

⁶ Но Юмо кугурак порылыкым пуа. Сандене Возымаш ойла: «Юмо кугешныше-влак ваштареш шога, а ӱҥышӧ-влаклан порылыкым пуа».

⁷ Тугеже Юмын мутшым колыштса, а диаволлан ваштареш шогалза, тыге тудо тендан деч куржеш.

⁸ Юмо деке лишемза, тунам Тудат тендан деке лишемеш. Языкан-влак, киддам мушса, кок семын шонышо-влак, шӱмдам эрыктыза.

⁹ Ойгаҥза, шӱлыкаҥза да йӱкын шортса. Воштылмыда тек шӱлыкыш савырна, а куанда – ойгышко.

¹⁰ Господь ончылно шкендам ӱлыкӧ шындыза, да Тудо тендам кӱшкӧ нӧлталеш.

¹¹ Иза-шольо-влак, икте-весыда ӱмбаке осалым ида ойло. Иза-шольо ӱмбаке осалым ойлышо але тудым судитлыше айдеме закон ӱмбаке осалым ойла да законым судитла. А тый законым судитлет гын, тый законым шуктышо огыл, а судья улат.

¹² Законым Пуышо ден Судья – икте: Тудо, Кӧ утарен да пытарен кертеш, а лишылетым судитлаш тый кӧ улат?

¹³ А ынде те, «Таче але эрла ме тыгай олаш каена да тушто ик ий илена, ужалкалаш-наледаш тӱҥалына да парышым налына» манын ойлышо-влак, колыштса.

¹⁴ Те эрла мо лийшашымат огыда пале. Тендан илышда – тиде мо? Тиде – тӱтыра, тудо кӱчык жаплан шарла, а вара шалана.

¹⁵ Тидын олмеш те тыге ойлышаш улыда: «Господьлан йӧра гын, ме илаш да тидым але тудым ышташ тӱҥалына».

¹⁶ Но ынде кугешнылше улыда да моктанеда. Чыла тыгай моктанымаш – осал.

¹⁷ Тыгеракын, кӧ поро пашам ыштышашым пала, но ок ыште гын, тиде тудлан язык лиеш.