СВЯТОЙ АПОСТОЛ ИАКОВЫН УЛО ЧЕРКЫЛАН КОЛТЫМО СЕРЫШЫЖЕ 3 - У Сугынь

3 ГЛАВА 1-12 Йылмым сорлыклымо нерген. 13-18 Кӱшыч толшо уш-акыл.

¹ Иза-шольо-влакем, шукынжо туныктышо лияш ида толаше. Мемнам, туныктышо-влакым, утларак пеҥгыдын судитлымым паледа.

² Чылан ме шуко языкыш пурена. Кӧ мутышто языкыш ок пуро, тудо тичмашлыкыш шуын да уло капшымат сорлыклен кертеш.

³ Мемнам колыштшо манын, теве ме имньын умшашкыже сорлыкым чиктена да уло капшым виктарен кертына.

⁴ Теве корабль-влакымат, нуно тугай кугу улыт да виян мардеж покта гынат, виктарыше еҥ моткоч изи кӱсмен дене кушко шона, тушко виктара.

⁵ Тыгак йылмат: капын изи ужашыже веле, но кугун моктана. Теве могай изи ойып кугу чодыраш тулым пижыкта!

⁶ Йылмат – тул, шоякын сӧрастарышыже. Тыге тудо кап ужашна кокла гыч уло могырым лавырта да, шкеже тамык тул дене ылыжынат, илыш оравам ылыжта.

⁷ Вет кеч-могай янлык ден кайык-влакым, нушкын коштшо ден теҥызыште илыше-влакым айдеме кидше йымалне кучен кертеш да тидым ыштен.

⁸ А йылмым ик еҥат кид йымалныже кучен ок керт: тудо – кучен кертдыме осал, колымашым кондышо аяр дене темын.

⁹ Тудын дене Юмым да Ачам моктена, тудын денак айдемым, Юмо тӱсаным ыштымым, каргена.

¹⁰ Тудо умша гычак моктымаш да каргымаш лектеш. Иза-шольым-влак, тыге лийшаш огыл!

¹¹ Ик памаш шинча гыч тамле да кочо вӱд йога мо?

¹² Иза-шольо-влакем, оливым смоква пушеҥге але смоква саскам виноград вондер шочыктен кертеш мо? Ик памашат ик жапыште шинчалан да шере вӱдым йоктарен ок керт.

¹³ Кӧ тендан коклаште уш-акылан да ушан? Тек уш-акылжым шкенжым сайын кучымо дене да уш-акыл гыч лекше тыматле пашаж дене ончыкта.

¹⁴ Но шӱмыштыда кочо кӧранымаш да шке верч тыршымаш уло гын, ида моктане да чын нерген шоям ида ойло.

¹⁵ Тиде кӱшыч толшо уш-акыл огыл, а мландысе, чон гыч лекше, ия деч шочшо уш-акыл.

¹⁶ Вет кушто кӧранымаш да шкалан тыршымаш, тушто шотдымылык да чыла тӱрлӧ уда паша.

¹⁷ Но кӱшыч толшо уш-акыл, эн ондакше, яндар, а вара тынысле, тыматле, мут колыштшо, чаманымаш да поро саска дене темше, еҥ-влакым ойыркалыдыме, сайла кояш тӧчыдымӧ.

¹⁸ Тыныслыкым ыштыше-влакын тыныс дене ӱдымӧ саскашт – тиде чын ыштымаш.