СВЯТОЙ АПОСТОЛ ИАКОВЫН УЛО ЧЕРКЫЛАН КОЛТЫМО СЕРЫШЫЖЕ 2 - У Сугынь

2 ГЛАВА 1-13 Еҥ-влакым ойыркалыме деч шижтарымаш. 14-26 Ӱшанымаш да тудым илышыш пуртымаш.

¹ Иза-шольым-влак, Иисус Христослан, чапланыше мемнан Господьлан, ӱшанеда гын, еҥ-влакым ида ойыркале.

² Погынымашкыда шӧртньӧ шергашан, поян вургеман еҥ пура, тыгак шӱкшӧ вургеман йорло еҥ пура гын,

³ поян вургемым чийышым ончен, те тудлан каласеда: «Тышке шич, тыште сай вер». А йорлылан ойледа: «Тый тушан шогал» але «Тышан, мыйын йол воктекем, шич».

⁴ Тыгеже те шкендан коклаште еҥ-влакым огыда ойыркале мо, чын огыл шонымашан судья лийын огыдал мо?

⁵ Йӧратыме иза-шольым-влак, колыштса: кӧмыт тиде тӱняште йорло улыт, нуным Юмо ӱшанымаште поян лияш ойырен налын огыл мо? Юмым йӧратыше-влаклан Тудо Кугыжанышым сӧрен, нуно тиде Кугыжанышын наследникше лийыт.

⁶ А те йорло еҥым шотлен огыдал. Поян-влак огыл мо тендам шыгыремдылыт, да нуно огыл мо тендам судыш шупшкедат?

⁷ Тендам могай поро лӱм дене лӱмдымӧ, нуно огыл мо тудым мыскылат?

⁸ «Лишылетым шкендым йӧратыме семынак йӧрате» манме, Возымаште пуымо кугыжа законым шуктеда гын, сай ыштеда.

⁹ А еҥ-влакым ойыркаледа гын, языкым ыштеда, да законым пудыртышо улмыдам закон ончыкта.

¹⁰ Кӧ уло законым куча, но иктыште языкым ышта, тудо пӱтынь закон ончылно титакан.

¹¹ Вет «Ит яжарлане» манын Кӧ ойлен, Тудак каласен: «Ит пушт». Тый от яжарлане, но пуштат гын, тугеже законым пудыртышо улат.

¹² Эрыкын законжо почеш судитлалтшаш еҥ семын ойлыза да ыштыза.

¹³ Чаманыде ыштыше еҥлан суд чаманыдыме лиеш. А чаманымаш суд деч кӱшнырак шога.

¹⁴ Иза-шольо-влакем, иктажше «ӱшанымашем уло» манын ойла гынат, но поро пашаже уке гын, тыште могай пайда? Тыгай ӱшанымаш тудым утарен кертеш мо?

¹⁵ Иза-шольын але ака-шӱжарын вургемышт ок сите да кечылан ситыше кочкышышт уке гын,

¹⁶ а тендан кокла гыч иктаж-кудыжо «Тыныслык дене кайыза, ырыза, кочса» манын нунылан каласа, но капыштлан мо кӱлмым ок пу гын, могай пайдаже?

¹⁷ Ӱшанымаш денат тыгак: поро паша деч посна тудо колышо.

¹⁸ Но иктаж-кӧ каласа: «Тыйын ӱшанымашет уло, а мыйын поро пашам уло». Тый мыланем ӱшанымашетым пашат деч посна ончыкто, а мый тыланет пашам гоч ӱшанымашемым ончыктем.

¹⁹ Юмо икте манын, тый ӱшанет. Сай ыштет. Ия-влакат тидлан ӱшанат да чытырат.

²⁰ Но палынет мо, умылыдымо айдеме: поро паша деч посна ӱшанымаш колышо.

²¹ Шкенжын Исаак эргыжым жертвенникыш пыштымыж годым мемнан Авраам ачана пашаж дене огыл мо чыныш лектын?

²² Ӱшанымаш тудын пашажлан полшен да пашаже ӱшанымыжым тичмашлыкыш шуктен манын, тый ужат?

²³ Тыге Возымашын шомакше шукталтын: «Авраам Юмылан ӱшанен, сандене Юмо тудым чын ыштышылан шотлен», да Авраамым Юмын йолташыже манын лӱмдымӧ.

²⁴ Айдеме ӱшанымаш дене веле огыл, пашаж дене чыныш лукталтеш манын, те ужыда?

²⁵ Шолып ончаш толшо-влакым пуртышо да нуным вес корно дене колтышо яжар Раав денат тыгак лийын. Тудат шке пашаж дене чыныш лукмо лийын огыл мо?

²⁶ Тыгеракын, кузе чон деч посна кап колышо, тугак поро паша деч посна ӱшанымашат колышо.