СВЯТОЙ АПОСТОЛ ИАКОВЫН УЛО ЧЕРКЫЛАН КОЛТЫМО СЕРЫШЫЖЕ 1 - У Сугынь

1 ГЛАВА 1 Саламлымаш. 2-8 Ӱшанымаш ден уш-акыл. 9-11 Йорлылык да поянлык. 12-18 Тергымаш да алгаштарымаш. 19-27 Юмын шомакшым колыштмаш да шуктымаш.

¹ Юмын да Господь Иисус Христосын Иаков тарзыже тӱрлӧ вере илыше латкок тукымлан: куаныза.

² Иза-шольым-влак, кунам тӱрлӧ тергымашке логалыда, тидым кугу пиаллан шотлыза.

³ Ӱшанымашдам тергыме деч чытымаш шочеш манын, те паледа.

⁴ Те чыла шотыштат тичмашлыкыш шуза да ситыдымаш деч посна лийза манын, чытымаш шке пашажым тичмашлыкыш шуктышаш.

⁵ А тендан кокла гыч иктаж-кудыжын уш-акылже ситышын огыл гын, тек Юмо деч йодеш. Тудо мом йодмыжым налеш, вет Юмо чылалан кумылын да шылталыде пуа.

⁶ Но тек ӱшанен, изишат кокытеланыде йодеш, вет кокытеланыше еҥ – мардеж лупшымо да кышкыме теҥыз толкын гай.

⁷ Господь деч иктаж-мом налам манын, тек тыгай еҥ ок шоно,

⁸ тудо – кок семын шонышо, мом гына ышта, нимоштат пеҥгыде огыл.

⁹ Изиэш ужмо иза тек кӱкшытшылан куана,

¹⁰ а поян – ӱлыкшӧ улмыжлан, вет поян еҥже шудо пеледыш гай пыта.

¹¹ Кече нӧлтеш, лӱп шокшо лиеш да шудым кошта, шудо пеледыш велеш, йытыра тӱсшӧ йомеш. Поянат шке корныштыжо тыгак лывыжга.

¹² Тергымашым чытен кертше айдеме пиалан, вет тергымашым эртымеке, тудо илыш вуйшӱдышым налеш, тидым Господь Тудым йӧратыше-влаклан сӧрен.

¹³ Алгаштарымашке логалмеке, Юмо мыйым алгаштара манын, тек нигӧ ок ойло. Юмым осаллык алгаштарен ок керт, Шкежат нигӧм ок алгаштаре.

¹⁴ Кажным шкенжын сутланымыже алгаштара, тудым шупшеш да ондален конда.

¹⁵ А вара сутланымаш, иланымеке, языкым шочыкта, а язык – колымашым.

¹⁶ Йӧратыме иза-шольым-влак, ида ондалалт.

¹⁷ Чыла поро да тичмаш пӧлек кӱшычын, волгыдо-влакын Ачашт деч, вола, Тудын дене вашталтмашат, весемме ӱмылат уке.

¹⁸ Ме Тудын ыштымыжын тӱҥалтыш саскаже лийшаш улына, сандене Тудо шке шонымыж почеш мемнам чынын шомакше дене шочыктен.

¹⁹ Тыгеракын, йӧратыме иза-шольым-влак, тек кажне айдеме колышташ писе, ойлаш вашкыдыме, шыдешкаш вашкыдыме лиеш,

²⁰ вет айдемын шыдыже Юмын чынжым ок шукто.

²¹ Сандене чыла ару огылым да чыла тӱрлӧ осалым кораҥдыза. Туныктымо шомакым ӱҥышын шӱмышкыда пыштыза, тудо тендан чондам утарен кертеш.

²² Шомакым шуктышо лийза, а колыштшо веле огыл, нуно шкеныштым шке ондалат.

²³ Вет кӧ шомакым колыштеш да ок шукто гын, тудо пӱртӱс пуымо чурийжым воштончышышто ончышо айдеме гай.

²⁴ Шке ӱмбакыже ончалмеке, тудо кораҥеш да могай улмыжым тунамак монда.

²⁵ Но тичмаш законым, эрыкын законжым, кӧ тӱткын онча, куча да мом колмыжым ок мондо, а пашам шукта гын, ыштымаштыже пиалан лиеш.

²⁶ Тендан кокла гыч кӧ Юмым чын пагалем манын шотла да йылмыжым ок кучо, а шке шӱмжым ондала гын, тудын Юмым пагалымыже арам веле.

²⁷ Юмым арун да яндарын пагалымаш Юмо да Ача ончылно теве мо лиеш: тиде тулык йочалан да тулык ӱдырамашлан орлыкышт годым полшымаш да тӱнясе шакшыланыме деч шкем аралымаш.