Ин 9 - У Сугынь

9 ГЛАВА 1-12 Сокыр шочшо еҥым паремдымаш. 13-34 Фарисей-влак паремме нерген йодыштыт. 35-41 Сокыр чон.

¹ Иисус, эртышыжла, шочынак сокыр еҥым ужын.

² Тунемшыж-влак Иисус деч йодыныт: «Равви, тудо молан сокыр шочын? Кӧ языкым ыштен: тудо шке але ача-аваже?»

³ Иисус вашештен: «Тудо шкенжын языкшылан, ача-аважын языкыштлан кӧра огыл сокыр, а Юмын пашаже тудын ӱмбалне почылтшаш.

⁴ Кечывал кече улмо годым Мыйым Колтышын пашажым ыштышаш улам; йӱд лиеш, тунам нигӧ пашам ыштен ок керт.

⁵ Тӱняште улмем годым тӱнялан волгыдо улам».

⁶ Тыге ойлымеке, Иисус мланде ӱмбаке шӱвалын, шӱвылжым рок дене варен, сокырын шинчашкыже вартышым шӱрен

⁷ да тудлан каласен: «Силоам йӱштылмӧ верышке кае да мушкылт». Силоам «колтымо» манме лиеш. Тудо каен, мушкылтын да ужын кертше пӧртылын.

⁸ Тудын пошкудыжо да сокыр улмыжым ончыч ужшо еҥ-влак йодыныт: «Тидыже кӱчен шинчышет огыл мо?»

⁹ Иктышт каласеныт: «Тиде – тудо». Весышт ойленыт: «Тиде тудла коеш веле». Шкеже каласен: «Тиде мый улам».

¹⁰ Нуно йодыныт: «Кузе тыйын шинчат почылтын?»

¹¹ Тудо ойлен: «Иисус манме Еҥ вартышым ыштыш, шинчашкем йыгыш да каласыш: ”Силоамыш, йӱштылмӧ верышке, кае да мушкылт”. Мый кайышым, мушкылтым да ужаш тӱҥальым».

¹² «Кушто тиде Еҥже?» – нунышт йодыныт. «Ом пале», – тудо вашештен.

¹³ Ондак сокыр лийше тиде еҥым фарисей-влак деке конденыт.

¹⁴ Кунам Иисус вартышым ыштен да сокырын шинчажым почын, шуматкече лийын.

¹⁵ Фарисей-влакат кузе ужаш тӱҥалмыж нерген йодыныт. Тудо вашештен: «Тиде Еҥ мыйын шинчаш вартышым пыштыш, мый мушкылтым да ынде ужам».

¹⁶ Тунам фарисей кокла гыч южышт каласеныт: «Тиде Еҥ Юмо деч огыл. Шуматкече нерген законым ок шукто». Весышт ойленыт: «Но языкан еҥ тыгай палдарыше пале-влакым ыштен кертеш мо?» Тыге нуно кок тӱшкалан шелалтыныт.

¹⁷ Сокыр деч адак йодыныт: «Тый шкеже Тудын нерген мом каласет? Вет тыйын шинчатым почын». Тудыжо вашештен: «Тиде – пророк».

¹⁸ Ужаш тӱҥалшын ача-аважым ӱжын кондымешке, тиде еҥ сокыр лиймылан да ужаш тӱҥалмылан иудей-влак ӱшанен огытыл.

¹⁹ Ача-аваже деч йодыныт: «Тиде тендан эргыда? Сокыр шочын манын, те ойледа? Ындыже кузе тудо ужеш?»

²⁰ Ача-аваже вашештеныт: «Тиде мемнан эрге да тудо сокыр шочын манын, ме палена.

²¹ А кузе ынде ужаш тӱҥалын да шинчажым кӧ почын, тидым ме огына пале. Шкеж дечын йодса. Тудо кугу, шке каласен кертеш».

²² Иудей-влак деч лӱдынытат, ача-аваже тыге вашештеныт, вет кӧ Иисусын Христос улмыжлан ӱшанымыжым почын ойла, кажнымат синагог деч кораҥдаш иудей-влак кутырен келшеныт.

²³ Сандене сокыр шочшын ача-аваже каласеныт: «Тудо кугу, шкеж дечын йодса».

²⁴ Сокыр лийше еҥым кокымшо гана ӱжыныт да тудлан каласеныт: «Юмым чапландаре! Ме палена, тиде Еҥ языкан».

²⁵ Тудо вашештен: «Языкан але уке, мый ом пале. Иктым палем: мый сокыр лийынам, а ынде ужам».

²⁶ Нуно адак йодыныт: «Тый денет мом ыштен? Кузе шинчатым почын?»

²⁷ Сокыр лийше вашештен: «Мый тидым тыланда каласенам, а те ышда колышт. Молан те эше икана колнеда? Ала теат Тудын тунемшыже лийнеда?»

²⁸ Нуно вурсен ойленыт: «Тиде тый Тудын тунемшыже улат, а ме Моисейын тунемшыже улына.

²⁹ Ме палена, Моисейлан Юмо ойлен. А тиде Еҥ кушеч, ме огына пале».

³⁰ Тиде еҥ вашештен: «Тидыжак ӧрыктара: Тудын кушеч улмыжым те огыда пале, а Тудо мыйын шинчам почын.

³¹ Ме палена, языкан-влакым Юмо ок колышт, а Тудын деч лӱдшым да Тудын эрыкшым шуктышым колыштеш.

³² Сокыр шочшын шинчажым иктаж-кӧ почмо нерген нигунам колалтын огыл.

³³ Тиде Еҥ Юмо деч ок лий гын, нимом ыштен ок керт ыле».

³⁴ Нуно каласеныт: «Тый тӱрыснек языкеш шочынат, а эше мемнам туныктет!» Вара тудым поктен луктыныт.

³⁵ Сокыр лийшым поктен лукмо нерген Иисус колын да, вашлиймеке, йодын: «Юмын Эргылан тый ӱшанет?»

³⁶ Тудо вашештен: «Господь, ӱшанен керташ манын, кӧ Тудо, мылам каласе».

³⁷ Иисус каласен: «Тый Тудым ужынат. Кӧ тый денет мутлана – Тудо».

³⁸ «Ӱшанем, Господь!» – манын да Тудлан, сукен, вуйым савен.

³⁹ Иисус каласен: «Тиде тӱняшке Мыйын толмем тӱнялан суд лиеш: сокыр-влак ужаш тӱҥалыт, а ужшо-влак сокыр лийыт».

⁴⁰ Тидым колмеке, Иисус воктене шогышо южо фарисей Тудлан каласен: «Меат сокыр улына мо?»

⁴¹ Иисус вашештен: «Те сокыр лийыда ыле гын, титакан огыда лий ыле. Но те ойледа: ”Ме ужына”, сандене тендан титакда ӱмбаланда кодеш».