Ин 21 - У Сугынь

21 ГЛАВА 1-14 Тивериада теҥыз воктене тунемшыж-влаклан Иисусын кончымыжо. 15-19 Иисус ден Петр. 20-25 Иисус да йӧратыме тунемшыже.

¹ Тылеч вара Иисус Тивериада теҥыз воктене тунемшыж-влаклан адак кончен. Теве кузе тиде лийын.

² Симон-Петр, Йыгыр манын лӱмдымӧ Фома, Галилейысе Кана гыч Нафанаил, Зеведейын эргыж-влак да Иисусын эше вес кок тунемшыже пырля лийыныт.

³ Симон-Петр нунылан ойлен: «Кол кучаш каем». Молышт каласеныт: «Меат тый денет пырля каена». Нуно тунамак каеныт да пушыш шинчыныт, но тудо йӱдым нимом кучен огытыл.

⁴ А кунам эр шуын, серыште Иисус шоген. Но тунемшыж-влак тиде Иисус улмым пален огытыл.

⁵ Нунылан Иисус каласен: «Икшыве-влак, тендан иктаж-могай кочкышда уло?» «Уке», – нуно вашештеныт.

⁶ Иисус ойлен: «Вапшым пуш деч пурла могырыш кудалтыза, тунам кучеда». Нуно вапшым кудалтеныт да кол шукылан кӧра мӧҥгеш луктын кертын огытыл.

⁷ Иисусын йӧратыме тунемшыже Петрлан каласен: «Тиде Господь!» Тиде Господь манмым колмеке, Симон-Петр кудашме вургемжым кыдалешыже кылден да теҥызыш тӧрштен.

⁸ А моло тунемшыже, кол дене темше вапшым шупшын, сер деке пуш дене ийын миеныт. Сер деке тора лийын огыл, кок шӱдӧ кынергут наре.

⁹ Серыш лекмекышт, нуно йӱлышӧ тулшолым ужыныт, тудын ӱмбалне кол киен, тушто киндат лийын.

¹⁰ Иисус нунылан каласен: «Кызыт кучымо колдам кондыза».

¹¹ Симон-Петр миен да кугу кол дене темше вапшым мланде ӱмбаке шупшын луктын, чылаже шӱдӧ витле кум кол лийын. Кол тынар шуко лийын гынат, вапш кушкедлен огыл.

¹² Иисус нунылан ойлен: «Толза, кочса». Тый кӧ улат манын, тунемшыж-влак кокла гыч нигӧ Тудын деч йодаш тоштын огыл. Тиде Господь улмым нуно ынде паленыт.

¹³ Иисус миен, киндым налын да нунылан пуэн, кол денат тыгак ыштен.

¹⁴ Колымаш гыч ылыж кынелмыж деч вара шке тунемшыж-влаклан Иисус ынде кумшо гана кончен.

¹⁵ Кочмекышт, Иисус Симон-Петрлан каласен: «Симон, Ионан эргыже, нунын деч чот Мыйым йӧратет мо?» Петр вашештен: «Туге, Господь. Тый палет, мый Тыйым йӧратем». Иисус ойлен: «Мыйын пачам-влакым кӱтӧ».

¹⁶ Кокымшо ганат тудын деч йодын: «Симон, Ионан эргыже, тый Мыйым йӧратет мо?» Петр вашештен: «Туге, Господь. Тый палет, мый Тыйым йӧратем». Иисус каласен: «Мыйын шорыкем-влакым кӱтӧ».

¹⁷ Кумшо ганат Иисус тудлан ойлен: «Симон, Ионан эргыже, тый Мыйым йӧратет мо?» Кумшо гана «Мыйым йӧратет мо?» манын йодмыжлан Петр ойганен. Иисуслан тудо каласен: «Господь, Тый чыла палет. Тый палет, мый Тыйым йӧратем». Иисус каласен: «Мыйын шорыкем-влакым кӱтӧ.

¹⁸ Чынак, чынак тылат ойлем: кунам тый самырык лийынат, ӱштым тый шке ӱшталынат да кушко шоненат, тушко каенат. А кунам шоҥгемат, кидет шаралтет да весе тыйым ӱшталта да, кушко ынет кай, наҥгая».

¹⁹ Могай колымаш дене Петр Юмылан чапым кондышаш улмаш, Иисус тиде мутшо дене палдарен. Тидым ойлымеке, Петрлан каласен: «Почешем кае!»

²⁰ Петр савырнен ончалын да Иисусын йӧратыме тунемшыжым ужын. Тудыжо почешышт ошкылын. Тиде тунемшак кас кочкыш годым Иисусын оҥешыже эҥертен да йодын: «Господь, кӧ Тыйым ужала?»

²¹ Петр, тудым ужмеке, Иисус деч йодын: «Господь, тудын дене мо лиеш?»

²² Иисус тудлан ойлен: «Мыйын толмешкем тудо илыше кодшо манын шонем ыле гын, тылатше мо? Тый почешем кае».

²³ Тиде тунемше ок коло манын, иза-шольо-влак коклаште ойлыштмаш теве молан шарлен. Но тудо ок коло манын, Иисус каласен огыл. Тудо ойлен: «Мыйын толмешкем тудо илыше кодшо манын шонем ыле гын, тылатше мо?»

²⁴ Тиде тунемшак тидын нерген таныкла да чыла тидым возен. Тудын таныклымыже чын улмым ме палена.

²⁵ Эше шуко весымат Иисус ыштен. Чыла тидым радам дене возаш гын, уло тӱняште тынар шуко книгалан вер ок сите ыле, шонем. Аминь.