Ин 20 - У Сугынь

20 ГЛАВА 1-10 Иисусын ылыж кынелмыже. 11-18 Мария Магдалиналан Иисус конча. 19-23 Иисус тунемшыж-влаклан конча. 24-31 Иисус ден Фома.

¹ Шуматкече эрлашыжым, эрдене эрак, волгалташ тӱҥалмешке, Мария Магдалина шӱгар деке миен да ужын: аҥысе кӱм кораҥден пыштыме.

² Мария тушеч куржын да Симон-Петр ден Иисусын йӧратыме вес тунемшыж деке миен, нунылан ойлен: «Господьым шӱгар гыч наҥгаеныт, а кушко Тудым пыштеныт, ме огына пале».

³ Петр да вес тунемшыже тунамак лектыныт да шӱгар деке каеныт.

⁴ Нуно пырля куржыныт, но вес тунемше Петр деч писынрак куржын да шӱгар деке ондакрак миен шуын.

⁵ Тудо ончалаш манын пӱгырнен да тушто вынер кийымым ужын. Но кӧргыш пурен огыл.

⁶ Тудын почеш Симон-Петр толын. Тудо шӱгарыш пурен да тушто кийыше вынерым

⁷ да Иисусын вуйжым пӱтырымӧ шовычым ужын. Шовычшо вынер дене пырля огыл, а вес верыште посна вӱдылмӧ киен.

⁸ Тунам шӱгар деке эн ондак куржын толшо вес тунемшыжат пурен. Тудо ужын да ӱшанен.

⁹ Иисус колымаш гыч ылыж кынелшаш манын Возымаште ойлымым нуно але пален огытыл.

¹⁰ Вара тунемшыж-влак мӧҥгеш пӧртылыныт.

¹¹ А Мария тӱжвалне шӱгар воктене шортын шоген. Шортшыжла шӱгарыш пӱгырнен ончалын

¹² да ужын: ондак Иисусын капше кийыме верыште ош вургеман кок Суксо шинча – иктыже вуй тураште, весыже йол мучаште.

¹³ Нуно йодыныт: «Ӱдырамаш, тый молан шортат?» Тудыжо вашештен: «Мыйын Господем наҥгаеныт, да кушко Тудым пыштеныт, мый ом пале».

¹⁴ Тыге ойлышыла, савырнен ончалын да тушто Иисус шогымым ужын. Но тиде Иисус улмым тудо пален огыл.

¹⁵ Иисус тудлан манын: «Ӱдырамаш, тый молан шортат? Кӧм кычалат?» Тидыже садыште ыштыше манын, Мария шоналтен да Тудлан ойлен: «Поро еҥ, тый Тудым наҥгаенат гын, мылам каласе, кушан пыштенат, мый Тудым налам».

¹⁶ Иисус тудлан ойлен: «Мария». Мария савырнен шогалын да Тудлан каласен: «Раввуни!» Тидыже «туныктышо» манме лиеш.

¹⁷ Иисус тудлан ойлен: «Мый декем ит тӱкнӧ, Мый але Ачам деке пылпомышко кӱзен омыл. Мыйын лишылем-влак деке кае да каласе: Мый шке Ачам да тендан Ачада деке, шке Юмем да тендан Юмыда деке кӱзем».

¹⁸ Мария Магдалина тунемше-влак деке толын да нунылан «Мый Господьым ужынам» манын увертарен. Вара мом Иисус каласен, тудым нунылан ойлен.

¹⁹ Тудо кечынак, арнян икымше кечынже, иудей-влак деч лӱдынытат, тунемшыж-влак кастене омсам тӱкыленыт да пырля шинченыт. Тыгодым Иисус толын да нунын коклашкышт шогалын каласен: «Тыланда тыныслык лийже!»

²⁰ Тыге каласымеке, нунылан шке кидшым, [йолжым] да ӧрдыжшым ончыктен. Тунемшыж-влак, Господьым ужын, чот куаненыт.

²¹ Иисус кокымшо гана ойлен: «Тыланда тыныслык лийже! Кузе Ача Мыйым колтен, Мыят тендам тугак колтем».

²² Тыге ойлымеке, нунын ӱмбаке пуалын да каласен: «Святой Шӱлышым налза.

²³ Кӧн языкшым кудалтеда, тудын языкше кудалтыме лиеш, а кӧн ӱмбалан кодеда, тудын ӱмбалан кодеш».

²⁴ Но Иисус толмо годым латкок тунемшыж гыч иктыже, Йыгыр манме Фома, нунын дене лийын огыл.

²⁵ Моло тунемше-влак тудлан каласеныт: «Ме Господьым ужынна!» Тудо вашештен: «Тудын кидыште пуда деч кодшо сусырым ужде, пуда сусырышкыжо парням да ӧрдыжышкыжӧ кидем пыштен ончыде, ом ӱшане!»

²⁶ Кандаш кече гыч Иисусын тунемшыж-влак адак пӧртыштӧ пырля лийыныт, Фомат нунын коклаште улмаш. Омса тӱкылымӧ лийын гынат, Иисус нунын коклашкышт толын шогалын да каласен: «Тыланда тыныслык лийже!»

²⁷ А вара Фомалан ойлен: «Парнятым тышке шуялте да Мыйын кидем ончал. Кидетым шуялте, тудым ӧрдыжышкем пыште. Ӱшаныдыме огыл, ӱшаныше лий!»

²⁸ Фома вашештен: «Мыйын Господем да мыйын Юмем!»

²⁹ Иисус тудлан ойлен: «Мыйым ужынат, садлан тый ӱшанет. Кӧмыт ужде ӱшанат, нуно пиалан улыт».

³⁰ Иисус шке тунемшыж-влак ончылно тыгак шуко моло палдарыше палым ыштен, нунышт нерген тиде книгаште возымо огыл.

³¹ Иисус – тиде Христос, Юмын Эрге, улмылан ӱшаныза, ӱшанымыда дене Тудын лӱмжылан кӧра илышым налза манын, тидым возымо.