Ин 16 - У Сугынь

16 ГЛАВА 5-16 Святой Шӱлыш нерген. 17-24 Шӱлык куаныш савырна. 25-33 Иисус тӱням сеҥен.

¹ Тидым Мый тыланда ида ондалалт манын ойленам.

² Тендам синагог-влак гыч поктен луктыт, да тугай жап лиеш, кунам пуштедышыда-влак тидын дене Юмылан служитлена шонат.

³ Ачамат, Мыйымат огыт пале, садлан нуно тыге ыштат.

⁴ Тыгай жап толмеке, тидын нерген Мыйын каласымем шарныза манын, тыланда тидым ойленам. Але марте тендан дене пырля лийынам, сандене тидын нерген ончыч ойлен омыл.

⁵ Ынде Мыйым Колтышо деке каем, а кушко кает манын, тендан кокла гыч нигӧ Мый дечем ок йод:

⁶ тидым тыланда каласымемлан кӧра шӱмда шӱлык дене темын.

⁷ Но Мый чыным ойлем: Мыйын кайымем тыланда сайрак лиеш. Мый ом кай гын, тендан деке Йывыртыктыше ок тол; а каем гын, Тудым тендан деке колтем.

⁸ Тудо, толмекыже, язык, чын да суд шотышто тӱнян йоҥылыш шонымыжым чарашке луктеш:

⁹ язык шотышто – Мыланем огыт ӱшане, языкше тиде;

¹⁰ чын шотышто – Мый Ачам деке каем да тылеч вара те Мыйым огыда уж, чынже тиде;

¹¹ суд шотышто – тиде тӱнян тӧражым ынде судитлыме, судшо тиде.

¹² Тыланда ойлышашем эше шуко уло, но кызытеш тидым шыҥдарен огыда керт.

¹³ Но кунам Тудо, Чынын Шӱлышыжӧ, толеш, тендам чыла чынлан туныкта, вет мом Тудо каласа, Шке гыч огыл ойла: мом колеш, тудым каласа да тыланда ончыкылыкым увертара.

¹⁴ Тудо Мыйын чапем почын ончыкта, вет мом Тудо тыланда увертара, чыла Мый дечем налеш.

¹⁵ Мо Ачан уло, чылажат Мыйын. Теве молан ”Мый дечем налеш да тыланда увертара” манын каласышым.

¹⁶ Икмыняр жап эрта, да те Мыйым огыда уж, но шукак ок эрте, те Мыйым угыч ужыда, вет Мый Ача деке каем».

¹⁷ Тунам тунемшыж-влак южышт шке коклаштышт ойленыт: «Икмыняр жап эрта, да те Мыйым огыда уж, но шукак ок эрте, те Мыйым угыч ужыда манмыж дене Тудо мом каласынеже? Молан ”Мый Ача деке каем” манеш?»

¹⁸ Нуно икте-весе деч йодыныт: «Икмыняр жап манмыже мо тиде тыгай? Мо нерген Тудо ойла, ме огына умыло».

¹⁹ Тудын деч йодаш шонымыштым Иисус пален, сандене каласен: «Икмыняр жап эрта, да те Мыйым огыда уж, но шукак ок эрте, те Мыйым угыч ужыда манмем нерген те икте-весе деч йодыда мо?

²⁰ Чынак, чынак тыланда ойлем: те шорташ да ойгыраш тӱҥалыда, а тӱня куанаш тӱҥалеш. Те шӱлыкаҥыда, но тендан шӱлыкда куаныш савырна.

²¹ Азам ыштыме годым ӱдырамаш йӧслана, вет тудын жапше шуын, но, азам ыштымеке, тӱняшке айдеме шочмылан куана да йӧсланымыж нерген ынде ок шарне.

²² Теат ынде шӱлыкан улыда, но Мый тендам адак ужам, тунам шӱмда куан дене темеш, тиде куаным тендан деч нигӧ шупшын ок нал.

²³ Тудо кечын те Мылам нимогай йодышым огыда пу. Чынак, чынак тыланда ойлем: Мыйын лӱмем дене Ача деч мом йодыда, тыланда чыла пуа.

²⁴ Те але марте Мыйын лӱмем дене нимом йодын огыдал. Йодса – тунам налыда, да тендан куанда тичмаш лиеш.

²⁵ Мый тыланда тидым туштен ойленам, но жап шуэш, кунам Мый туштен ойлаш ом тӱҥал, а Ача нерген вик увертарем.

²⁶ Тудо кечын те Мыйын лӱмем дене йодаш тӱҥалыда, а Мый тендан верч Ачам сӧрвалаш тӱҥалам манын ом ойло.

²⁷ Те Мыйым йӧратеда да Юмо деч толмемлан ӱшанеда, садлан Ача Шке тендам йӧрата.

²⁸ Мый, Ача деч лектын, тӱняш толынам. Кызыт, тӱням коден, Ача деке каем».

²⁹ Тудлан тунемшыж-влак каласеныт: «Теве ынде Тый раш, туштыде, ойлет.

³⁰ Ынде ме палена: Тый чыла шинчет да нигӧн йодышыжо Тылат ок кӱл. Сандене ме ӱшанена: Тый Юмо деч толынат».

³¹ Иисус каласен: «Ынде ӱшанеда?

³² Теве жап шуэш, тиде жап ынде шуын, кунам те кажныже шке велкыда шаланен пытеда да Мыйым шкетем кодеда. Но Мый шкет омыл, Мый денем пырля Ача.

³³ Мый денем ушнен шогымаште тендан тыныслыкда лийже манын, тыланда тидым ойленам. Тӱняште те орланаш тӱҥалыда, но лӱддымӧ лийза: Мый тӱням сеҥенам».